الشهادات والكورسات التى يجب أن يحصل عليها معلم اللغة الإنجليزية واى معلم ناجح

[Beleh]

المشاركة الأصلية كتبت بواسطة رضا عبد الحميد عبد الرازق

بسم الله الرحمن الرحيم
بدايةً الكورسات والدوارات مش كل حاجة ولكن بتحط رجلك على اول طوبة تحت أول سلمة فى طريق اتقان اللغة الإنجليزية المتحدثة وسأحكى تجربتى ان شاء الله بالتفصيل مع الكورسات وكيف استفدت منها غدا ان شاء الله

فى انتظار تجربتك استاذ رضا على احر من الجمر
لك كل الود وخالص التحية

[رضا عبد الحميد عبد الرازق]

بسم الله الرحمن الرحيم

سأبدأ من الأول أرجوا ألا تملوا

تخرجت من كلية الأداب جامعة المنصورة وهى كما تعلمون دراسة اكاديمى لا تهتم بالنطق كثير المهم كان كل همى أحفظ شوية جرامر علشان شغل الدروس والتدريس وربنا وفقنى وعملت سمعة ومكانه الحمد لله ولكن أنا لست راضيا عن نفسى مدرس انجليزى مش عارف يقول كلمتين على بعض حاولت مع نفسى بس مش عارف اعمل وأبدأ ازاى وبعد حوالى 7 سنوات شغل تدريس ذهبت الى المنصورة رغم انها تبعد حوالى 45 ك عن قريتى التى أعيش فيها "الستامونى " وأخذت ليفل محادثة فى المعهد البريطانى وكانت البداية عرفت مستوايا وانا فين بالظبط وكانت المحاضرة تكبرنى بعام أو اثنين ولكن معها ماستر من الامعة الأمريكية ولما علمت انى مدرس خافت ازاى انت جاى تاخد كورس محادثة وكدة يعنى المهم تحججت انى من قرية وادرس بالعربى وليس هناك فرصة ان اتكلم انجليزى مع الطلاب ....رغم انى لم أستفد كثيرا الا انها كانت البداية لى وعرفت من اين أبدأ بدأت اخش على النت وادور وأبحث على فيديوهات وعلى صوت وسأذكر خطوات

1- فى البداية سجلت لنفسى وانا بتكلم انجليزى فى أى موضوع أى كلام فى أى كلام المهم اتكلم

2- الخطوة التانية كل يوم لازم اسمع انجليزى وخصص جزئية معينة اسمعها واسمعها واسمعها لغاية ما ودانى تورم من السمع بدأت ألقط طريقة النطق زى العيل الصغير بالظبط وهى نفس الفكرة الأستماع المهم ودانى خدت تعبيرات أصلا لا أعرف انطق غيرها الأن مثل more and more انت بتنطقها مور أند مور لالالالالالالالا قل وراى

مُر ان مور وحاجات كثير لسى ربنا يقدرنى وأذكرها بالتفصيل





يتبع

[رضا عبد الحميد عبد الرازق]

نكمل من تانى
إبدأ اتكلم حتى لو مع نفسك تخيل أى موضوع وان فى حد بيكلمك وسجل لنفسك واسمع نفسك وشوف انت نطقت ازاى هتلاقى فى البداية غلطات مش هتصدق ان انت مدرس انجليزى اصلا بس ولا يهمك كل ده ولا حاجة لما توصل لنتيجة مرضية ان شاء الله المهم انك تسمع كثيييييير جدا وتتكلم بالطريقة اللى قلت عليها أما بالنسبة لشغلك فى الفصل حتى لو الطلاب مش فاهمين انجليزى اشرح بالأنجيزى وترجم اللى انت قلته مباشرة حتى يفهم الطلاب لدرجة ان الموجه دخل حصة ليا وكان فى نص استماع وقرأته مرتين بس بطريقتى الجديدة الحلوة قراءة أنجليزى على حق زى الفراشة مش الجماعة اللى بيضغطوا على كل كل لغاية ما يخرروها دم أسف على التعبير بس دى حقيقة مثل leave it حضرتك بلاش حضرتك لاحسن تزعل منى انا كنت بقول " لييف إإتت " وعايز اتنين يضغطوا معايا لالالالالا قل ورايا " ليفيت "

المهم بقى الخيبة الثقيلة لما تيجى تشرح بالإنجلزي مش هاتعرف قل ليه لأنك لازم تحضر جميع الجمل والمفردات اللى انت محتاجة وهتخدمك فى الناحية زى مثلا عايز تقول الفعل يتبع بــــ أو يسبق بــ مثلا فلازم تذاكر شوية جرامر من كتب انجليزية الأصل مش ملخص

على فكرة يا جماعة انا بتكلم بتلقائية واللى شايف ان الكلام ده احتمال يكون خايب وان ما فيش مدرس انجليزى بالمواصفات اللى انا بقولها يا ريت ما يثبتش همتنا ولعل وعسى يكون فى مدرس خايب زى حالتى ويستفيد منها

يتبع

[رضا عبد الحميد عبد الرازق]

بعد ذلك بعد ما دربت نفسى شوية وبدأت أخد ثقة فى نفسى شويتين طبعا زملائى كانوا شموا خبر عن كورس المحادثة اللى انا أخذته وهو لا كورس ولا حاجة ده مجرد ليفل واحد لا راح ولا جه المهم جلست مع زميل دراسة ومدرس مثلى ولكن ملبوخ شوية فى الدروس ومش عايز يصرف على المادة اللى هى مصدر رزقه لا عنده كمبيوتر ولا نت ولالالا على فكرة انا مش بغتابه أه بس أنا بوضح بس والأنكت من كده ان صاحبى ده عند مرونة فى الكلام بس الأول كنت بخاف من الشوية دول وطلبت من صديقى هذا قلتله بما اننا مدرسين انجليزى تيجى نكلم بعض بالأنجليزى وكانت المفاجئة لقد شهد لى صديقى وقال ان مستوايا فى النطق والطلاقة فى الكلام تحسن كثيرا لأنى فعلا بدأت أطبق اللى انا بسمعه وتحمست أكثر وسمعت انجليزى اكثر وأكثر
يتبع

[Beleh]

الله عليك يا استاذ رضا وعلى اسلوبك الجميل، محدش كبير على العلم والشخص الناجح هو اللى بيتعلم من اخطاءه .. متابعين مع حضرتك ....

[رضا عبد الحميد عبد الرازق]

معذرة على التأخير لأنى كنت متعب قليلاً وكنت مشغول فى الإعتذار عن تصحيح الأعدادية
نأتى بعد ذلك الى نقطة مهمة جدا هل ستتحدث أمريكى أم بريطانى ومش هتفرق كتير بس وجهتى نظر المتواضعة أنا أفضل الأمريكى لأنه الأفرب لوسائل الإعلام أفلام برامج وأشيك طبعا والغريب عندما ذهبت الى المعهد البريطانى وجدت المحاضرة تتحدث أمريكى ومن هنا بدأ تعلقى بالأمريكى وأوصت لنا بكتاب أسمه المحادثة الإنجليزية لجميع الدارسين لواحد أسمه أديب بساده لو انت من المنصورة هتلاقيه فى مكتبة الجلاء

بعد كده ذهبت الى معهد ILC أو Harvest فى المنصورة عند الجامعة وأخذت ليفل محادثة وأشترط ان المحاضر يكون أجنبى وهو بالفعل كان موجود تبع المركز وكان أسمه دافين من كندا بس العجيب فى الكورس انى عملت تيست وأجتازته بتفوق ومع ذلك لقيت نفسى مستوى واحد وحطين معايا فى الكورس طالبه تانية أعدادى وناس لسى فى الجامعة وطب بيطرى المهم هيصة يا معلم وطبعا كل ده علشان الفلوس لأن بصراحة أهم حاجة عندهم الفلوس تستفيد أو لا مش فارقة المهم الفكة بس كان معا اتنين مرسين تانين وطبعا كنا واخدين الكورس لحسابنا والباقى يا عينى غلابة وده مش ذنبى ولا ذنبهم دى غلطة المركز اللى مش فارقة معاه

ده بالنسبة للكورسات اللى أخدتها بس أرجع وأقول كله بيعتمد عليك انت تستعين بالله وتنوى وتبدأ من الأن تسمع بدايه لو هتتكلم أمريكى ودى نصيحتى شوف القناة

http://www.youtube.com/user/AccurateEnglish/videos?view=0&flow=grid
أسمع وشوف وقل رأيك

وواحد تانى أسمه a j hoge
http://www.youtube.com/user/ajhoge
ودى قناته وليه ملفات صوت غايه فى الروعة ودى اللى انا أستفدت منها أسمها power English ممكن تنزلها من النت
متشوق لسماع تجاربكم بالله عليكم لا تكتفوا بالمشاهدة جايز تقول معلومة يستفيد منها غيرك وتبقى فى ميزان حسناتك ليوم الدين وللحديث بقية بعد الردود والتفاعل مع الموضوع وشكرا والسلام عليكم فى حفظ الله