جـروب 3 ثـانوى ( علمـى ريـاضه )

[bright stars]

المشاركة الأصلية كتبت بواسطة yes we can

تنبيـه : مش انـا اللى كـاتب الكلام ده .. عشان انـا ادبـى

بس لقيـت ممكـن تكون مفيده ليكـم

بالتوفيق . . .

نبدأ . .

ريـاضه 2


كونك واخد رياضيات معنى كدا انك ناوى ان شاء الله هندسه أو حتى عشان تثبت لنفسك انك متفوق أوعشان بتحبها أو لسبب تانى

فبالرغم من ان امتحان الرياضيات بتاعنا كان زى ما الناس بتقول صعب جدا لكنها هيا الماده الوحيده الى أنا بقفلها الخمسين
وأى حد فاهم الرياضيات وحاببها يقدر وبكل سهوله يقفلها
ولكن أولا رياضيات تالته غير تانيه تالته الرياضيات بتاعتها طويله حبه
فعندك 3 فروع
الميكانيكا ودى فيها استاتيكا وديناميكا
والتفاضل والتكامل
والجبر والهندسه الفراغيه أحب فرع ليا

فازاى تذاكر الرياضيات
أولا الرياضيات فهمى ليها
هوا انها قوانين انت بتحفظ القوانين دى
وبيجيلك مسائل على كل قانون انت بتعرف هوا عايز أى قانون من المطلوب
وانت بتحل المسأله باستخدام القانون والمعطيات الى ف المسأله

لكنك فى الدرس أول ما هاتبدأ مع المدرسين فى الدروس غالبا هوا هايبدأ معاك بالتفاضل
وممكن يشتغل معاك فى الكتاب المدرسى فلما تشوف كتاب التفاضل وكتاب الميكانيكا
وكتاب الجبر والهندسه هاتخاف من الحجم وتقول أمال فى الامتحان هايجيبلى ايه من كل دا

لكنك هاتكتشف فى الأخر ان امتحانات الثانويه العامه فى الرياضيات نفس الكلام الى فى تانيه
وانت شوفت بنفسك الأسئله بتتكرر فكرتها لكن الأسلوب و الأرقام بتتغير

فمذاكرتك أول بأول مع مدرسك من البدايه هايساعدك فى النهايه وفى المراجعه واهتم بالقوانين وطرق الحل وانت ان شاء الله هتقفلها وهيا ماده من 3 مواد الخمسينات

يمكن هايجى وقت وتقول الرياضيات دى صعب قوى انى أقفل الخمسين فيها ...علشان تلت فروع ..وكل فرع صعب والكلام دا...
لكن انت جزأها ماتبصلهاش على انها كدا كبشه واحده...خد كل فرع لوحدوا ..وذاكره واديلها الاهتمام..وشوف ملخصه للقوانيين ايه..وحل عليه امتحانات كتيير وانت هتبقى تمام التمام ان شااء الله

أى ماده من مواد الخمسينات اديلها اهتمامها الكافى لأنها مواد بتفرق كتيير فى المجموع






أولا الميكانيكا

الميكانيكا بتتكون من استاتيكا وديناميكا يمكن انت هاتسمع الكلمتين دول تانى فى منهج تالته ثانوى فى ماده غير الرياضيات وهاتعرف ان الاستاتيكا يعنى الثبات والديناميكا يعنى الحركه
الميكانيكا فى الامتحانات بيكون فرع من فروع الرياضيات ال3 ودا أكبر فرع فى الدرجات عليه 20 درجه
يمكن الديناميكا هيا الى اصعب شيويه من الاستاتيكا فاديها اهتمام اكبر
وفى الامتحان لم بيحب يقرص فى ماده الرياضيات بيقرص فى الميكانيكا بالزات..لأنها كبيره وممكن يتوهك ...رعبتك كدا أنا ؟؟
بس ياعم والله والله لو مذاكر وفاهم ..لو عمل الالى حتى قدامك هاتيجبها وتقفلها..انا مش بقول انها صعبه
بالعكس سهله وكل حاجه ويمكن كمان امتحانها يجى أسهل من التفاضل والهندسه...بس وليه ..حصن انت نفسك فيها
ذاكر الفرع دا أزيد شيويه من الفروع التانيه فى الرياضيات...وحل ليه امتحانات كتيير ...والكتاب المدرسى جايب تمرينات وحلولها على كل قانون...أول ماتغلط فى مسأله فى اى امتحان على اى قانون ..ارجع تانى لكتاب المدرسه الجزء الى على القانون دا..واقرا هوا بيقول ايه وعاوز ايه..وحل عليه المسائل المحلوله الى فى الكتاب ..وارجع تانى للمسأله هاتحلها انشاء الله

ذاكر مع مدرسك ومن المذكرات .. اقرأ القوانين كويس وحل عليها مسائل كتيير واغلط فى الأول وبعدين هاتحل صح وتتعود على الاجابه الصح ان شاء الله








ثانيا التفاضل والتكامل

التفاضل والتكامل التفاضل لو بنترجمها باللغه العربيه يبقى هانقول التفريق والتكميل
فتقريبا الاتنين عكس بعض تفاضل يبقى طريقه تانيه ثانوى بتاعت المشتقات ...وتكامل يعنى ترجع المشتقه الى أصلها يعنى
لو التفاضل بيطلع للأمام التكامل بيرجع للخلف
التفاضل والتكامل امتحان عليه 15 درجه معظمه التفاضل والتكامل هوا الجزء الأصغر فيه




ثالثا الجبر والهندسه الفراغيه

هيا الفرع التالت فى الرياضيات وعليها 15 درجه
فرع سهل جدا وانا بعتبره أسهل فروع الرياضيات ..يمكن فى ناس يتشوفه انه صعب علشان المسائل وكدا
لكن صدقنى والله طول فتره الشرح وكدا ...انت ممكن تحس بانها صعبه ..لكن فى وقت المراجعه والامتحانات..هتلاقى ان المسائل تقريبيا كلها أفكار واحده وبتتكرر فى معظم الامتحانات..لأنه مش هايجيبلك من برا ..هوا هايجيبلك على القوانييين الى عندك...
يعنى لو فرع زى الجبر والهندسه دا...فى الامتحان هتلاقى الجزء الأول هوا أكمل....شوف تلت امتحانات بس..هتلاقى أكمل دى كلها متكرره..وبعدين سؤال هوا بيقولك انا محددلك الجزء الى هايجى فيه..وهوا السؤال الى على النظريات الى عندك الأربعه..يبقى كتر خيره ..هوا بيقولك انا هاجيبلك فى الامتحان سؤال عن دى ..يبقى تحفظهم بقى وسيبك من التوقع فى حاجه مضمونه زى دى...وبعدين الأسله الى بعدها ..على القواعد والنظريات الى انت أخدتها..وهتلاقيها كلها نفس النهج..السؤال الاخير بيكون عن قاعده واحده وكدا
...كل دا بحل امتحانات كتيير ..وبردوا مش تحل امتحانات كتيير ..






الامتحانات والمراجعات

فى المراجعه بقى ان شاء الله هتلاقى ان كل ماده من دول لها تلخيص بسيط
للقوانين الى فيها وطريقه الحل
بصراحه حلك للامتحانات ممكن تستغنى عنه فى كل المواد الا ماده الرياضيات
الامتحانات شىء لابد منه عشان الرياضيات مسائل وعايزه حل ولازم تتدرب على حل المسائل
ودايما ابدأ بامتحانات محلوله واسمح لنفسك انك تشوف طريقه الحل
وبعدين حاول تحل من نفسك وتشوف حلك صح ولا غلط
ومش مشكله انك بتغلط كتير فلازم انك هاتتجه للصواب بعد كل خطأ

وااااااااااو جميل جدا يامارك تسلم يارب

فعلا نصائح جميله جدا

ربنا يجزيك ويجزي اللي كاتبها كل خير

بالتوفيق لينا كلنا يارب