ممكن؟!

[To Be Is To Do]

المشاركة الأصلية كتبت بواسطة dr.samira mousa

السلام عليكم ورحمة الله وبركاته

فى البداية انا طالبة فى الصف الثانى الثانوى وواخدة المادة التانية فرنساوى عشان المكان اللى انا فيه مفيش فيه مدرسين المانى او ايطالى ...المهم انى اخدت المادة اضطرار رغم الناس اللى بتقول انها سهلة والكل بيقفلها خدتها واتكلت على الله من اولى ثانوى والحمد لله مقفلاها من اولى لحد دلوقتى وبجيب اعلى درجة فى امتحانات الشهور ...بس المشكلة بقى انى بكرهها اصلا وكرهت الدرس والمدرس ...وكل حاجة اول مبدخل الدرس بتخنق وبكون عاوزة اروح على طول والكتب والمذكرات بكون عاوزة اقطعها اخلص منها ...وكل شوية اقول دى حالة وهتعدى بس مش قادرة اتغلب عليها ...هتقولولى اروح عند مدرس تانى المدرس ده اشطر واحد والمدرسين التانيين مش شغالين وبيفوتوا فى المنهج اى حاجة كدة ...فالطلبة اللى بيجبوا اعلى الدرجات بيكون عند المدرس ده لانه بيقول حاجات وبيركز عليها مش زى المدرسين التانيين بيعينوها فى الشهادات يدوها فى الخصوصى ومش بيكونوا عارفينها ساعات ونموذج الاجابة بييجى زى مالمدرس ده بيقول ...مش عارفة اعمل ايه انا دلوقتى؟؟
-----
المشكلة التانية ان انا زى مبيقولوا طالبة متفوقة عشان يعنى فى جميع المراحل الدراسية بتفوق على زمايلى وبجيب اعلى منهم ولو زادوا عنى بيكون يااما فى مواد ادبية او كان الاعدادى كمبيوتر ...انا فى الترم الاول ده جبت 109.2 من 112 وده والله من غير مذاكرة وكمان مظلومة فى الدرجات المادة الوحيدة اللى كنت بفتحها هى الرياضيات عشان المدرس كان بيدينا واجب كتير يصل ل 40 فما فوق مسألة
وانا اصلا بحب الرياضيات وجايبة اعلى درجة فى الميكانيكا فى المدرسة وحليت مسائل زمايلى معرفوش يحلوها ... فيعتبر مكنتش بحل الا رياضيات عشان انا حباها
والمواد التانية يمكن الكتاب مكنش بيتفتح الا فى الدرس وليلة الامتحان فكنت بدخل كل الامتحانات على شرح المدرس ...المهم انى مش عارفة حاسة انى متحطمة وتعبانة جسمانيا ونفسيا مخنوقة كدة مش عاوزة اروح اى دروس عاوزة ابعد عن زمايلى بقعد سرحانة فى الدروس فى كلام الناس اللى تقول اهم حاجة مجموع الثانوية
انا بتدايق من الكلمة دى كام واحد بيتخرج من كليات القمة اللى الناس معتقدة انها ياطب ياهندسة بس بيتخرج الاف كل سنة لو بنحسب نسبة الطلبة ونسبة الاكتشافات او الاختراعات مفيش اصلا نسبة ال 7 سنين بتوع طب لما تروح تشتغل الدكتور يقولك انسى كل اللى اتعلمته وركز معايا ايه لازمتها دول بقى والطلبة نفسها يتقطع من المحاضرات والمذاكرة والتقدير...وكذلك الحال فى الهندسة اللى هى اصلا اساس الدماغ والتشغيل والفكر كله عادت مجرد كلية عشان تاخد اسم بس وتبقى اسمك مهندس او مهندسة مفيش اهتمام خالص كل الحاجات دى عملالى عقدة اينشتين بيقول لا تكافح من اجل النجاح بل كافح لتكون ذا قيمة انا مش عارفة اوصل للتانية دى خالص ..
ودى حاجة مديقانى حاسة ان فى تالتة هخيب ظن اهلى فيا اللى انا والله بحبهم اكتر من نفسى وعاوزة اسعدهم باى طريقة ....بصوا انا عارفة ان فكرى متخلف شوية زى مكل الناس بتقول ورجعية والكلام ده بس انا مش عارفة اغير حاجة من نفسى خالص خاصة تفكيرى ده ....ساعات بحس انى مخى شغال وساعات تانية بحس انى اغبى انسانة فى الدنيا ...
انا مخنوقة اوى معلش ياجماعة انا بفضفض بس

بالنسبه للمشكله الاولى فدى مش حقدر اتكلم فيها اوى لانى كنت (( ألمانى )) بس طالما انتى متفوقه فيها ومقفلاها يبقى ازاى كارهاها عايزه تقطى الكتب و و و ... ممكن تكون بس دى حاله كده انما لو انتى كارهه الماده عمرك ما حتحلى فيها ولا تقفلى امتحانها يستحيل ... هى بس وساوس لا اكثر صدقينى

ويا ريت حد اخد فرنش يفيدك اكتر منى

المشكله التانيه : ما شاء الله مجموع التيرم الاول جميل جدا ومتميز ( وده ومكنتيش بتزاكرى اوى او فتحتى المنهج ليله الامتحان ) يبقى فين المشكله من الاساس
( متحطمه وتعبانه نفسيا ومخنوقه ) ليه ليه ليه ده كله ومن ايه .. اولا مجموعك عال يعنى درجات كويسه يعنى المفروض تنبسطى وده يشجعك للتيرم التانى انك تكونى اعلى كمان وتتفوقى اكتر مش تحبطى

بصى حقولك على حاجه حته ان الواحد مش بيتعلم فى الكليه وان بنتخرج وبنلغى كل اللى اتعلمناه فيها ( ده صحيح ) بس هو ده حال البلد .. حنعمل ايه طيب ؟

على فكره لو انتى حابه مجال تانى غير الكليات دى لا تتردى واسعى ليه عشان تتفوقى فيه ومتبقيش زى الاف الدكاتره والمهندسين اللى دخلوها لمجرد بس " كليه قمه "
اه الواحد بيبقى عايز مركز وقيمه برده بس مثلا مثلا يعنى واحد اصلا ف الرياضه مش حلو وكارها بس مجموعه جاب هندسه فدخلها رغم انه مش حابب رياضه فساعتها كان احسنله يدخل كليه هو حابب مجالها عشان يعرف يمشى فيها ويتفوق فيها ... وقيسى على كده بالنسبه لباقى الكليات مش طب وهندسه بس

انا حاسس من كلامك انك مهزوزه جدا يعنى انتى ما شاء الله عليك متفوقه لانك بتاخدى منهج 2 اللى كان ثانويه عامه وما شاء الله باقل مجهود جايبه درجات كويسه .. طب ليه الخوف والقلق والاحباط .. لا ده انتى تتشجعى فى 3 انك تجيبى اعلى واعلى
ولا تفكيرك متخلف ولا حاجه ده القلق الطبيعى العادى بتاع اى حد فى المرحله دى

ثقى فى نفسك أكتر من كده شويه إنتى داخله السنه الجايه على ثانويه عامه ( أكون أو لا أكون ) عايز ثقه انتى كويسه وشاطره اهووو وباقل المجهود بنلاقى نتيجه كويسه جدا اومال بقى لو زاكرنا جامد يبقى حنلاقى مجموع كويس جدا جدا فى 3 ان شاء الله
متوهميش نفسك بحاجات مش موجوده ثقتك بربنا اهم حاجه صدقينى

ربنا يوفقك ان شاء الله