النموذج الرسمي مع سقراط

[amothman123]

المشاركة الأصلية كتبت بواسطة To Be Is To Do

انا اينعم دلوقتى ف اولى جامعه يعنى كنت 3 ثانوى السنه اللى فااتت بس انا متابع يعنى الامتحانات السنادى بجد بجد والله نموذج الاجابه سخيف جدا جدا جدا جدا جدا يعنى

توزيع اجابته على هيئه نقط كل نقطه ب نص وخصوصا سؤال المشكله السكانيه تحس انه توزيعته لدرجه السؤال بيقول للناس عينى عينك " انا عايز انتتقم منكم "

حضرتك حترد عليا تقولى احنا فى التصحيح بنعلم فى صالح الطالب .. عارف كده بس فيه مدرسين ربنا يهديهم مفكرين ان النموذج قرآن أنزل من السما (( ده بالنسبه للمدرسين اللى ايدهم مش فى الماده طول السنه )) واساسا ليه النموذج ييجى بالاسلوب السخيف ده

بطريقته دى بتقروا ان الماده ما هى الا مجرد حفظ من الكتاب وكوبى باست فى الامتحان رغم انه المفروض يعنى يحط الاجابه على بعضها كلها ويكتب مثلا 3 درجات عشان اللى ينسى نقطه مش حتأثر من ضمن 6 نقط فى سؤال المشكله السكانيه اللى هى اصلا فى الكتاب على ما اتذكر يعنى كانوا 8 نقط

بجد مبقاش فيه اى اهتمام بالثانويه لا امتحانات ولا نماذج اجابه ولا رقابه بدليل تسريب الامتحانات لتانى سنه على التوالى

الله ينور عليك بالظبط دة وجه اعتراضى
نفسى أفهم أية لازمة نموذج الإجابة دة ؟! أية أهميته ؟! هو مين الى بيصحح الامتحان ؟! مش مدرس المادة ؟! عاملينله نموذج إجابة ليه نفسى أفهم ؟!
السنة الى فاتت فى درس الأحياء كان مدرس الأحياء بيقولنا فى 2007 نموذج الإجابة كان جاى فى إجابات غلط علشان كدة سنتها محدش قفل الامتحان كانت سنة سواسية على كل .. سألته نفس السؤال : أية لازمة نموذج الإجابة دة ؟! هو مين الى بيصحح مدرس أحياء و لا سواق تاكسى ؟! ما هو مدرس و المفروض عارف الصح من الغلط .. قام هو قالى فى نماذج الإجابة فى التعليم برة بيكتبله " كلمة " واحدة بس فى الإجابة لو المصحح لقاها فى إجابة يعرف إنه ماشى مية مية و يديله الدرجة .. إنما عندنا أحنا هنا اسطمبة .. فبتبقى على حسب .. لو مدرس فاهم و لقى الطالب كاتب إجابة سليمة بس مش بنفس نص النموذج يديله الدرجة .. واحد تانى لو لقاه فى امتحان أحياء إنجليزى نسى يكتب " the " قبل كلمة يقوم منقصه نص درجة !!
و قبل كدة سألت مدرسة الفرنساوى نفس السؤال : أية لازمة نموذج الإجابة ؟!
قامت قالتلى علشان لو المدرس مش عارف إجابة سؤال يشوفه فى نموذج الإجابة !!!!!!!!!!!!!!!!!!!!!!!!!!!!!!!!!!!!!!!!!!!!!!!!!! !!!!!!!!!!!!!!!!!!!!!!!!!!!!!!!!!!!!!!!!
يعنى المدرس الى بيصحح مش عارف الإجابة يبقى الطالب العبقرى هو الى هايعرف ؟!
الواحد كره التعليم فى مصر بسبب نماذج الإجابة العقيمة الى بيعملوها للامتحانات
و وضع مستقبل الطالب تحت رحمة المصحح !!