ملتقى طلاب الصف الثالث الثانوى (علمى علوم) 2014

[lally adel]

المشاركة الأصلية كتبت بواسطة عبق الماضى2

عارفة يا دكتور كلامك اوحى لى بشئ كان محيرنى كتير

وهو ليه فى ناس مش بتعرف تجيب مجموع فى ثانوى كبير

اصل انا عيلتى معظمهم دخل علمى وحو ل فى 3 عشان المجموع بيكون صغير

لان معظم الناس بترمى كتاب المدرسة وتتجه لمذكرة المستر اللى بتكون مختصرة كلام كتير اوووووى ومركزة عالنقط التافهة او بمعنى اصح الواضحة وسايبة اللى بين السطور

اصل انا كنت بكلم بنت عمى وقالتلى "الثانوية العامة دى حظ يعنى انا ذاكرت مذكرة المستر وحفظتها وراجعت المنهج 3 مرات ومجبتش مجموع "

بس طبعا الكلام ده هى نفذته بس المصحح زى ما المدرس بتاعك كان بيقولك بيتلكك وحكاية الكونتم لا يتجزء دى فعلا دقيقة اوى
وناس كتير مش بتركز فيها وزيها كتير وكتير

العيب مش فى المادة او الامتحان او الثانوية بزاتها

العيب فى مذاكرتنا احنا اللى غلط ومش بنلتزم بكتاب الوزارة بس انا الصراحة فى ابتدائى واعدادى كنت بذاكر منها وكنت متفوقة وكان الامتحان بيجى منها بالكلمة والرقم

ربنا يعينا يارب ويوفقنا للى فيه الخير

وادخل اسنان ان شاء الله

ربنا يكرمك ويجزاكى كل خير يارب بصراحة انتى عملتى معانا اللى كل الناس معملتهوش وتعبتى معانا جامد
وكلنا والله بنحبك جدا لانك مبتبخليش علينا بحاجة
يارب اشوف الناس كلها كده وبتحب الخير لبعض وانا ان شاء الله هتعلم منك ومش هبخل على حد بحاجة وهنصح كل صحابى يقرو كلامك الجميل ده

وفى النهاية كل واحد والله بياخد نصيبه

صح كده برافو عليكى ..
بصي انا كنت قلت هنا قبل كده .. ممكن حد يذاكر و يموت نفسه مذاكرة و مايجبش مجموع .. او مايجبش المجموع اللى كان مستنيه .. و يقول انا اتظلمت و التصحيح و الناس و الدنيا ..
طبعا مغيش خلاف ف حتت العك اللى بيحصل ف التصحيح .. بس و الله العظيم ربنا بيبقاله حكمه من كده ..
ابسط مثال .. انا عندى واحده صحبتى كانت علمى رياضه .. و كانت مش شايفه قودامها غير هندسة .. زى كل طلبه علمى رياضه .. حتى لما كنت اقولها حطى لنفسك بديل بحيث انك ماتلقيش نفسك تايهه لو لا قدر الله هندسة مجتش .. كانت تقولى لا مفيش قدامى غير هندسه .. المهم لما النتيجة طلعت جابت 94 % و دخلت مرحلة تانية ف التنسيق .. ف كده طبعا هندسه كانت طارت .. الدنيا اسودت ف عينها و فضلت تقولى انا اتظلمت و مش عارف ايه و قررت تعمل تظلم .. كنت فى الفترة دى بحاول اقنعها بحاسبات و معلومات او تخطيط عمرانى او فنون تطبيقيه .. بس هى كانت رافضه كل دة ..
لحد ما جه وقت ملو الرغبات بتاعتهم ف التنسيق و كتبت حاسبات بعد هندسة .. ف الفترة دى بقى قعدت نقرا عن حاسبات و اقسامها و مجالات شغلها و تتكلم مع ناس فيها .. لحد ما اقتنعت بيها جداااا . اتحمست ليها اكتر من حماسها لهندسه .. لدرجة انها اختارت حاسبات حلوان بدل القاهرة عشان حلوان فيها قسم مش موجود ف القاهرة .. و هى عايزة القسم ده ..
بعد كده بقى نتيجة التظلم طلعت و اخدت درجات فعلا وصلت ل 97.5% .. قلتلها هااا هتحولى هندسه القاهرة قالتلى لا .. قولتلها لا ليه بقى ما انتى كنتى هتموتى عليها .. المهم قعدنا نتكلم استشفيت منها انها متمسكة بحاسبات و مش هتحول ..
قلت ما بينى و بين نفسي سبحان الله .. عشان ربنا عالم انها هتحب مجال اادراسه ف حاسبات اكتر و يمكن تكون ناجحة فيه اكتر من مجالات هندسه .. و لانها عمرها ما كانت هتفكر ف حاسبات لو كان مجموعها جاب هندسه من الاول .. ف ربنا سخر المصححين انهم يظلموها عشان تفكر ف ااكليه اللى هتبدع فيها ان شاء الله بغض النظر هى كليه قمة و لا لا .. و بعد كده برضه ربنا رجعلها حقها .. ماسبهاش مظلومة ..بس بعد ما باعتلها علامة على الطريق الصح .. ربنا يوفقها ..
اللى عايزة اقوله يا شباب ان و الله العظيم بجد كل واحد بياخد على اد تعبه المهم انك تتعب و تتعب صح .. انت لو مسكت بلونة مخرومة و فضلت تحاول تنفخها لحد ما نفسك يتقطع هتتعب .. بس هتتعب ف الطريق الغلط .. و دة هيخلى النتيجة ف الاخر صفر

ربنا يوفقكو كلكو و يهديكو يااااارب