أفيدونـــى و أرشدونى ؟؟

[Dr.Michael]

أعزائى الدكاتره
أنـــا طالب ثانوى عام جبت بالظبط 401.5 يعنى 97.93%
طـــبعا انا مش عارف لسه هل ده ممكن يدخلنى طب عشان الحد للأدنى للمرحلة الاولى 96.34 % ولكن بأذن الله املى فى الله كـــبير
حــــاليا أنا عاوز استفسر أنى حيران بين طب بشرى و أسنان و أغلب الناس قالتلى أن بـــشرى أفضل و البعض التــانى بيقولى لا اسنان أقـــل وتتخرج منها تشتغل أسرع
أنا شـــايف أن بشرى طبعا أفضل و أنا الصراحة حابب مجالها و هكون متمتع بدراستها و انى هحب مذاكرتها ولكن المشكلة الوحيده اللى مخوفانى هى المناهج وعدد السنين بتاعها الكبير و ان بعدها لسه فيه تكليف و ماجيستر وخلافه و بعدين انا عندى جيش
فأنا حبيت أسأل أهل الخبره إيه رأيهم و مين أفضل و هل أخش طب و ومش مشكلة موضوع السنين ولا إيه ؟؟
فبجد ناقشونى قبل يوم الاتنين وهو تسجيل الرغبات

[هاوى إبداع]

طالما حاببها يبقي ادخلها وميهمكش طول عدد السنين
احلي ايام هي ايام الجامعه
ونصيحه اخيره
" عش علي قدر يومك"

[Dr.Michael]

أنــــا حابب أفهم طيب بعد ما أخلص ال 6 سنين دراسة و اخد السنة الامتياز
إيه الخطوات اللى بعدها علطول ؟؟
وفعلا هل النتيجة و اللى همارسه و هشوفه ما بعد الكليه هيهون سنين الدراسة و هيخلينى انساها ؟؟

[Asmaa Soliman]

المشاركة الأصلية كتبت بواسطة مستر مايكل

أنــــا حابب أفهم طيب بعد ما أخلص ال 6 سنين دراسة و اخد السنة الامتياز
إيه الخطوات اللى بعدها علطول ؟؟
وفعلا هل النتيجة و اللى همارسه و هشوفه ما بعد الكليه هيهون سنين الدراسة و هيخلينى انساها ؟؟

الف مبرووك على المجموع
طالما حابب الكلية يبقى ادخلها
والسنين بتعدى بسرعة جدااااااااا

والصحبة بتهون كتيير
بس تدخلها وتبقى عارف انك هتتعب شوية احسن ما تدخلها وتتصدم بعد كده


بعد امتياز ان شاء الله
بيبقى فى سنة تكليف فى وحدة صحية على حسب تقديرك
بعد كده بيجيلك التخصص وبتشتغل فى مستشفى
ومش مسموح تفتح عيادة الا بعد الماجستير طبعا
بس فى ناس بتفتحها عادى نصب كده

لكن الجيش بقى مش عارفة ايه النظام لو دخلت وكده

ربنا يوفقك

[ابراهيم100]

الكلام ده ان شا الله يفيدك
بس بعد ما تقرا الكلام الكتير ده ادخل الى انت حابه وطب اصلا دراسه ممتعه هى المشكله ف كبر المنهج ومنظمه التعليم ككل

هوا الل بيحصل كالتالي:
أول تلات سنين بتدرس مواد نظرية: تشريح..كيميا حيوية.. وظائف أعضاء.. حاجة بنت ***** كده اسمها فارما 'أدوية يعني' وهكذا. من رابعة لساتة بتبدأ تدرس فرع فرع من الطب بقى... الل هوا نسا جراحة وهكذا.
خامسة بتبقى سنة ونص (مبتاخدش اجازة صيف مع الناس هما بيخلصوا وانتا مكمل دراسة لحد ماتلضم ف السنة الل وراها)
ساتة زي خامسة .. فالبالتالي عدد سنين الدراسة عمليا سبع سنين مش ستة.. وده نظام عام ف أي كلية طب ف مصر.

بعد ساتة فيه اجازة صغيرة بتخش بعدها سنة التدريب ف المستشفى..
الهدف المعلن من سنة الامتياز:إنك تختلط بالعيانين وتدرب عليهم 'أو فيهم' قبل ماتخرج لسوق العمل.
الهدف الحقيقي: توفير عمالة مجانية ف المستشفى.
مهامك ف السنة دي بتبقى إنك تخلص مشاوير للدكتور الكبير الل مفروض يعلمك ' ف مقابل انه يعلمك او ميعلمكش هوا ومزاجه بقى' نوعية المشاوير دي بتبقى: روح هات كيس بلازما من بنك الدم.. انزل احجز معاد اشعة للعيان.. اجري هاتلي فطار... انتا اكيد مش داخل الكلية عشان تكتسب مهارة احضار كياس الدم .. بس هوا النظام كده:كل ما عر** اكتر للدكتور وعملت مشاوير ونفذت طلبات مهينة أكتر... بتبقى جودة المعلومات الل بيديهالك أفضل. المعلومات الل بالمناسبة مش موجودة ف الكتب لان الل بتدرسه منفصل عن التطبيق العملي.ً

لما السنة دي بتخلص بتبقى تميت 8 سنين من يوم دخولك الكلية. لحد المرحلة دي مش هيدوك لسه شهادتك ومش هتبقى اتقيدت ف النقابة... فرسميا ملكش حق مزاولة المهنة... بس انتا بتنزل تشتغل ف سنة التدريب دي 'مش رسمي' تشتغل ف مستشفيات خاصة عشان انتا قدام أهلك بتبقى اتخرجت وبتشتغل ' ف سنة التدريب انتا موظف حكومي بتروح تمضي كل يوم حضور وانصراف.. بس بمرتب 250 جنيه ف المتوسط'
شيفت الشغل الخاص ده ملوش سعر معين ممكن يبقى ثابت (بيتراوح من 40 ل 100 جنية ف الست ساعات) وممكن يبقى متغير يعني ليك نسبة من عدد الكشوفات الل هتعملها.

لما تخلص السنة التدريب بتقدم على حاجة اسمها التكليف.
هتشتغل دلوقتي دكتور بتاع كله.. نسا تعالج .. اطفال تعالج... بص عارف الدكتور ربيع؟ بالظبط.
وده التقديم له زي تنسيق الثانوية العامة ..
الحكومة عندها وحدات صحية ف كل مدينة وقرية ونجع، بتقدم ع النت باسمك ومجموعك 'الل هوا بتاع الست سنين' وترتب كل مدن الجمهورية بحسب انتا عايز تروح فين وانتا ومجموعك لو عالي رغبتك الاولى هتجيلك وتشتغل ف الحتة الل عايزها لو قليل هتشتغل ف الحتة الل الحكومة عايزاها.

بعد 3-4 شهور من استلامك الشغل ده بينقسم الناس إلى:
الل لهم تعيين ف الجامعة.. والل ملهمش.. وأهل الأعراف الل لهم نيابة من غير تثبيت.

الل لهم تعيين:
هناخد أعلى ناس جايبين مجاميع ف الدفعة ونعينهم ف المستشفى الجامعي ....
الناس دي هنلمهم ف يوم ونقعدهم مع بعض كلهم ..كل قسم 'تخصص' بيقول هوا محتاج كام شخص يشتغل فيه السنادي... مثلا قسم النسا ف مستشفى الجامعة بتاعتك عايز 2 دكاترة يشتغلوا فيه الجراحة 10 الخ... بيلموا التخصصات دي ف ورقة ويعلقوها .. وكل واحد من الاوائل الل قاعدين دول ' بترتيب مجموعهم' بيقف ويبص ع الورقة ويقول انا عايز قسم كزا... ونروح شاطبين عليه وننقل ع الل بعده..وهكذا...
( لاحظ معايا لو انتا نفسك ف نسا والاتنين الل فوق منك ف المجموع قاموا وخدوها قبلك ...فالل سبق كل النبق خلاص).
ساعتها هتستلم الشغل ف الجامعة ومش هترجع التكليف وتبقى خلاص كده اتخصصت وتبدأ تحضر ماجستير ف التخصص ده... والل بيقعد حوالي أربع سنين.

الناس التانيين:
بتستنى ف التكليف ده... ' دي المرحلة الل الولاد بتنطلب فيها للتجنيد بقى' بعد سنة التكليف (هيا عمليا بتتراوح من تسع شهور لسنة وتلات شهور) بتستنى نيابات الصحة... وده يعني نفس الل حصل فوق ده بس بدل مانلم الناس ونقعدهم مع بعض... بيقدموا ف تنسيق ع النت... ترتب التخصصات الل انتا عايزها وانتا ومجموعك.
بعد ماتتقبل ف تخصص وتستلم شغلك فيه ف مستشفيات وزارة الصحة.. بتستنى سنة كمان عشان يسمحولك تبدأ تحضر ماجستير فيه.

هنا ممكن تتقبل ف تخصص بس تيجي تحضر فيه ماجستير متعرفش، عشان تتقبل ف تحضير ماجستير ف تخصصات معينة لازم تبقى جايب امتياز او جيد جدا والا هتتعطل شوية على ماحد يقبلك.

القسم التالت شرحه صعب ومش هيهم ف حاجة.

لما تتعين ف تخصص سواء ف الجامعة او مستشفيات الصحة انتا كده ملكش قانونا تفتح عيادة لإنك لسه مبقتش أخصائي كزا. يسمحولك تفتح عيادة أو تسافر تشتغل بره امتى؟ بعد ما تاخد الماجستير.
أمال وضعك إيه ساعتها؟
بتبقى حاجة كده اسمها نايب.. حلقة ضعيفة ف السلسلة برضو... بتشتغل ساعات شغل كتير بتوصل ساعات ف تخصصات زي الجراحة ف أول سنة تعيين لكل يوم اسبوعيا ماعدا 12 ساعة راحة ' 12 ساعة ف الأسبوع'... بتستحمل بهدلة وقلة قيمة من الدكاترة الأكبر منك. المقابل المادي لده بيبقى من ألف لألف ونص لو ف الجامعة بيبقى أزيد شوية ف الفلوس وف البهدلة برضو

ده الطريق العام للمهنة.. فيه طرق فرعية فهمها بالنسبالي خد حوالي تلات شهور بس الخط الزمني مبيفرقش كتير...بتضحي بحاجات قصاد حاجات... بتختصر سنة مثلا ف عمرك عشان تاخد ماجستير بدري ف مقابل انك هتشتغل من غير فلوس ف السنة دي... وهكذا.

أفتكر من أبسط حقوقك إنك تكون عارف الموضوع هيرسى معاك على إيه..
مهم برضو تعرف المدد الزمنية المتوقعة والمردود المادي المنتظر.

بالنسبة لنقطة مهمة وهيا لو والدك او والدتك دكاترة ف الجامعة.. ساعتها ملكش دعوة بالل انا قلته ده خالص... انتا مينطبقش عليك معظم الحجات ال فوق دي .. انتا تغمض وتخش.. انتا برنس ف نفسك ومحدش هيقدر يبؤ معاك...
وهنا طبعا تقدر تفهم لو انتا ابوك او امك مش دكاترة ف الجامعة الوضع هيبقى عامل ازاي.

بالنسبة لنقطة أهم وهيا: "كفاية إني هساعد الناس واخفف آلامهم"..
ف ممكن اقولك إني بكتب البوست الطويل ده بدافع الملل ... عشان قاعدة زهقانة ف الوحدة لان معندناش ادوية لحد اخر رمضان والناس مبتجيش تكشف عشان متضطرش تجيب دوا من بره...
فساعد نفسك وخفف آلامك الأول يبني.

انا مقرأتش البوست ده قبل كده ليه !!

#cpd

[Dr.Michael]

امممم
شكرا للرد يعنى الواحد مش هيقدر يفتح عياده قـــبل 28 سنة تقريبا على حسب ما فهمتوا من كلامكوا