دفعه ثانويه عامه 2015

[Mido6]

المشاركة الأصلية كتبت بواسطة ra2fat jego

حلوة فكرة الموضوع وربنا يوفق الجميع

طبعا ثالثة ثانوي محتاجة مجهود جامد ولازم انك تكون مدرك انك في سنة مصيرية

في طلبة بيبقوا واخدنها بجد وفي غيرهم واخدها هزار
بس المفروض ان السنة دي تتاخد جد لأن انت مش فيها لوحدك انت تقريبا داخل بعيلتك فعيب قوي لما ناس بتعمل كل اللي عليها عشان ترضيك ومترفضلكش طلب وانت مش فارق معاك حاجة

وفيه فرق كبير بين واحد عمل اللي عليه بس ربنا اراته ان الطالب ده ميجبش مجموع كبير وبين واحد تاني واخدها لعب ومش فارقة معاه والمهم يعدي وخلاص

وانا شايفة ان انت لو معندكش طموح لحاجة وهدفك هو انك تفشل فبلاش تؤذي اللي حواليك وتخيب آمالهم واقعد في بيتكوا احسن
انا بزعل اوي لما اشوف طلبة بتاخد دروس كتير ومبتزاكرش ده بجد حراااااام
وفي الآخر مش كل الناس زي بعضها

من تجربتي في الثانوية العامة احب اقول كام حاجة:
1-ابعد عن اي صاحب ممكن يعطلك عن المذاكرة لان ده كده لا عارف مصلحته ولا مصلحتك
2-مرجعك هو كتاب المدرسة ومتسمعش كلام اي حد يقولك ده مش مهم بالعكس ده فيه اسئلة بتيجي منه بالنص
3-اي مدرس يختصر ويقولك ده مهم وده متذاكرهوش سيبه وامشي لان ده شغل ابتدائي مفيش الكلام ده في ثانويه عامة
4--حل كتير وفي اكتر من كتاب ووانت بتذاكر خلي جمبك ورقة تكتب فيها اي حاجة عايز تسأل عنها أو مش فاهمها عشان المدرس يشرحها ليك بعد كده
5-انك تاخد اكتر من درس في مادة واحدة ده تضييع وقت لان في فترة هتيجي عليك مش هتلاحق تذاكر ايه ولا ايه ومش هتلاقي وقت
6-(رحم الله امرئا عرف قدر نفسه)المفروض تبقى عارف قدراتك متبقاش ضعيف في الرياضة وتخش علمي رياضة ده اسمه هبل
أنا في تانية ثانوي دخلت علمي علوم مرتحتش فصليت استخارة ودخلت ادبي والحمد لله جبت
97.56

7-بالنسبة لطريقة المذاكرة فدي بتختلف من شخص للتاني والوقت كمان ففيه طالب ممكن يذاكر عشر ساعات عشان يستوعب درس معين في حين ان ممكن طالب تاني يستوعب الدرس ده في نصف الوقت فده مش معناه كروته بس الموضوع نسبي ودي قدرات

8-وعن تجربة في الانجليزي احب انصحكوا بحاجة احفظوا كلمات على قد ما تقدروا لان الامتحان معتمد على حصيلتك من الكلمات الخارجية وده واضح في التعبير اللي بتكتبوا والترجمة والقطعتين ولو انتوا دخلتوا على قسم الانجليزي في المنتدى هتلاقوا الاساتذه حطين كلمات مهمة للترجمة صدقوني هتفيدوا جدا والله

ومتغطوش على نفسكوا ولو عايزين تبدأوا من دلوقتي ابدأوا على خفيف

احفظوا كل يوم كلمتين او تلاتة من كلمات الترجمة وحلوا مثلا قطعتين للترجمة واحدة عربي والتانية انجليزي هتلاقي نفسك ان شاء الله على اخر السنة perfect وفوق كده هتلاقي حصيلة كلمات عندك هتساعدك جدا في كتابة ال paragraph
انا اسفة على الاطالة بس حبيت أساعد

وربنا يوفق الجميع

نصايح قيمة ومش تعتذرى ع الاطاله لان الكلام دا فعلا مهم
بس ممكن سؤال بما أنك خلصتى !
عاوز انزل اشترى ملخصات ومش عارف اشترى ايه ؟؟ بما انك مجربه تنصحى بأيه ؟؟

[Ra2fat Jego]

المشاركة الأصلية كتبت بواسطة mido6

نصايح قيمة ومش تعتذرى ع الاطاله لان الكلام دا فعلا مهم
بس ممكن سؤال بما أنك خلصتى !
عاوز انزل اشترى ملخصات ومش عارف اشترى ايه ؟؟ بما انك مجربه تنصحى بأيه ؟؟

انت قصدك ملخصات بالنسبة لايه بالضبط
معلش يا ريت بس توضحلي؟؟