اي التخصصين اختار؟

[rudfa]

المشاركة الأصلية كتبت بواسطة magic 2015

انا شغوف جدا بموضوع الهندسة الوراثية والتكنولوجيا الحيوية وانا كنت جيبت 91 في المئة ثانوية عامة علمي علوم سنة 2014 وبسببها انا دخلت كلية التمريض ودلوقتي محتار انا بفكر ادخل جامعة مصر للعلوم كلية البيوتكنولوجي او كلية زراعة قسم بيوتكنولوجي او لو التنيسق نزل السنة ده ممكن التحق بعلوم واقدر اتخصص في البيوتكنولوجي ولكني خايف من اتخاذ قرار زي ده هيكون تأثيرة علي حياتي كلها خصوصا ان تخصص البيوتكنولوجي والهندسة الوراثية مجال الشغل محدود بينما التمريض شغله مضمون ولكني اشعر بالخجل من كليتي انا كنت فاكر ان ده في مصر بس التريقة من كلية التمريض اكتشفت انها بره في دول متقدمة دخولي تمريض كان بسبب ارغام اهلي لي عليها ولكني كل ماشوف الناس بتتريق علينا وتقول تمرجية والقرف ده واخر حاجة اني لما بنام تجيلي افكار عن يوم لما اجي اتقدم لواحدة وابوها يسألني عن وظيفتي واقولوا ممرض انا مكنش نفسي ادخل الكلية وانا مش بقلل من الكلية والله بس انا مش هقدر استحمل الشعور بأني ادني من الناس علما ان جيبت السنة ده في كلية تمريض تقدير جيد جدا وانا دلوقتي محتار جدا ومش عارف اعمل ايه ارجو من اي حد انو يساعدني انا بجد مش عارف اعمل ايه وملاحظة بسيطة لو حد هيرد بسخرية او تهجم او يقولي انت عبيط علشان بيهمك رأي الناس وكل الكلام ده ياريت ميردش احسن لأن رينا يعلم الحيرة اللي انا فيها نفسي فأنا مش ناقص سخرية من ناس تانية نفسي اعرف اختار تخصص بحبه وهشعر بارتياح كبير ولكن اجازف بمستقبلي بسبب فرص العمل المحدودة ولا اختار تخصص هيخليني معايا فلوس وفرصة عمل مضمونة 100 في ال100 مع فرص للعمل في الخارج واموال كثيرة لأن تمريض ده فعلا وده حاجة انا متأكد منها العاملين في المجال ده بيخدوا فلوس كتير ولكن مجال هشعر فيه بالخجل وعدم الارتياح ومش هحبه والشعور ده هيفضل مستمر طوال حياتي

والله شئ مشرف جدا إن حضرتك شغوف بعلم البيوتكنولوجي .. انا برضه طالب في علوم المنصورة وقريت عن العلم ده كتير جدا وبقيت متحمس جدا لدراسته .. وناوي بإذن الله احول لقسم بيوتكنولوجي اللي عندنا في الكلية (بمصاريف) .. علم البيوتكنولوجي علي حسب ما كل الطلبة اللي سألتهم سواء اللي اتخرجوا او اللي حضروا فيه دراسات عليا قالولي إنه علم شيق جدا وممتع .. محدش تقريبا شتملي أو قالي إنه قسم مش حلو .. يمكن كانت غلطتك في البداية إنك قررت ترضخ لقرار اهلك وتدخل كلية مانتش مقتنع بيها .. موضوع تحول وتسيب تمريض عشان تحول لكلية أو قسم بيوتكنولوجي .. دي هتكون خطوة كبيرة جدا واعتقد لازم تعقد فيها مع أهلك تتناقشوا معاها .. بس شوف كلية تمريض مش وحشة أوووي للدرجة دي وان كنت زعلان من التريقة اللي بتتعمل عليكم .. احنا برضه في علوم بيتريقوا علينا ويقولوا علينا مدرسين وفنيين .. وفي صيدلة بيقولوا عليهم بقالين .. وفي طب بيقولوا عليهم حلاقين .. وخريج هندسة بيتقال عليه صنايعية .. يعني كله محصل بعضه .. ده غير أصلا ان نظرة المجتمع اتجاه كلية التمريض بدأ يتغير بشكل كبير في الفترة الأخيره .. وخد بالك إن علم البيوتكنولوجي ده طريقة طويل وشاق جدا .. وهيحتاج تقريبا منك دراسات عليا بعد التخرج .. فمن رأيي ونصيحتي انك ترضي بما قسمه الله لك (وعسي ان تكرهوا شيئا وهو خير لكم) ... محدش عارف الخير فين .. فأنا رأيي أنك تكمل في تمريض وخصوصا انك تفوقت فيها وجبت جيد جدا .. إلا إذا كنت شغوف جدا بعلم البيوتكنولوجي فعلا .. ساعتها هتبقي بتظلم نفسك في تمريض .. لإنك ساعتها هتفضل تعيييش بقية حياتك في وظيفة مش حاببها .. وانصحك تصلي صلاة استخارة وتشوف قليك هييرتاح لإيه .. معلومة اخيرة عايز اقولهاك انك متقدرش تخش كلية علوم طول ما كان تنسيقك في سنتك مش جايبها .. لما بتيجي تخش أي كلية بتخشها علي حسب تنسيقك في السنة بتاعتك مش في أي سنة تانية .. وبتمنالك التوفيق .. ولو في أي سؤال تاني انا تحت أمرك