دفعة ثانوية عامة 2016

[رفيقة الامل]

المشاركة الأصلية كتبت بواسطة Mohamed_Hamza

يا جماعة محدش يعدي عليه شهر خمسة دا الا ويكون فاهم المنهج كله ومذاكره كويس جدا في كل المواد، يعني آخر خمسة تكون مستعد تمتحن اي مادة مش ناقصك حاجة.
علشان ليالي الامتحان لو قرأت حاجة جديدة عليك هتزعل وتضايق انك مش عرفتها من بدري، وممكن مش تستوعبها كمان وتتعقد وتقول مش هدخل الامتحان.
فملوش داعي دا كله، ذاكر كل حاجة من دلوقتي...

مثلا تجارب الكيميا واستنتاجات الفيزيا مش تسيبهم لحد قبل الامتحان لا من دلوقتي ذاكرهم واحفظهم كويس اوي.

اياك تسيب التعليق ع النص.

اياك تذاكر الادب والتعليق ع النص من برا كتاب الوزارة.. نموذج الاجابة بيكون كوبي بست منه.

اياك تسيب الرسم البياني (اخر سؤال) في الفيزيا لحد ليلة الامتحان، لا من دلوقتي اتدرب عليهم وانت بتحل امتحانات.

اياك تسيب رسومات الاحياء والجيولوجيا وتقول هلمهم قبل الامتحان، هتروح في داهية وهياخدوا منك ليلة الامتحان كلها وهتدخل مش مراجع.. دا غير انهم بيحتاجوا تدريب.

اياك تسيب قراءة الريدنج بتاع كل يونت، اللي مش هيقرأه لازم هينقص في سؤال choose و find ... بنسبة 100% هينقص.

اياك متقرأش نص القصة، سواء عربي او انجلش وتعتمد على س & ج بس، لأ ممكن يجيلك سؤال برا اللي انت بتحفظ فيهم دول ومش هتعرف تحله، فاقرأ القصة عشان خاطري، ولو قصة الانجلش ممكن تقول ترجمة الفقرة اللي انت بتقرأها بالعربي عشان تثبت اكتر بس وتعرف تتخيل الموقف.

اياك تنسى ترسم الدايرة اللي جوا حلقة البنزين، هتودي نفسك فداهية، اصلا من غيرها ميبقاش البنزين بنزين.

اياك تشوف فكرة جديدة فمسألة فيزيا او كيميا او اي مادة ومش تعلم عليها بالماركر او تسجلها عندك، عشان انت قبل الامتحان هتشوف الافكار اللي انت معلم عليها دي كلها تاني ومش هيكون ناقصك حاجة، فأي فكرة مهمة حاسس انك هتنساها لازم تعلم عليها ابوس ايدك.

اياك تسيب المواد اللي مش بتضاف لحد ليلة الامتحان.

اياك تسيب التفاهات او مش تديها حقها وتطنشها، انت مفروض تخاف منها عشان دي بتتجمع مع بعض كدا وبتنزلك عدد محترم من الدرجات، الرواسب اللي في وادي النطرون كربونات صوديوم مش كبريتات... اهي حاجات زي دي هي اللي بتنقص الشطار.

إياك تشتت نفسك بكذا بكتاب، شوف انهي اشمل كتاب فيهم وليه اجابات وحله وسيبك من الباقي.

اياك تمشي بالبركة، اهم حاجة النظام الشهر دا، عشان تتأكد انك بتدي كل مادة حقها.

اياك تأجل اي حاجة، تكون كاتب لنفسك انك هتذاكر كذا النهاردا وبعدين ماتلحقش وتقول هذاكره بكرا، اول ما تلاقي نفسك بتقول "بكرا" ابشر بالضياع، فعشان كدا وانت بتعمل لنفسك جدول خليك واقعي وشوف قدراتك بجد، بلاش تاخدك الجلالة اوي وانت بتعمله.

اياك تضيع النعمة اللي في ايدك، انت فنعمة مش حاسس بيها والله، فيه ملايين نفسهم يكونوا مكانك دلوقتي عشان يمتحنوا من تاني، بدل ما تخلص الثانوية وتندم وتحس باحساس وحش جدا ويكون نفسك ترجع الثانوية تاني عشان تشد حيلك وتحسن مجموعك، ودا مستحيل عشان التحسين اتلغى اصلا،، طيب ليه من دا؟ مانت في ايدك تغير دا كله من دلوقتي.

إياك تخاف اوي من الامتحانات، هتلاقيها عبيطة خالص والله، كل الاسئلة اللي في الامتحان هتلاقيك حليتها قبل كدا عشرين مرة، انت بتخش تكتب على طول اصلا، اللي بيعملوا الامتحان اصلا الظاهر دماغهم قفلت فمش هتلاقي جديد فيه يعني، هيجيبوا من السنين اللي فاتت وكتاب المدرسة، الاسئلة معروفة بس مين يذاكر.

اياك تفوت صلاة او ماتدعيش ربنا:
"إنَّ ربكم حيي كريم، يستحي من عبده إذا رفع إليه يديه أنَّ يردهما صِفْراً خائبتين"

إياك تفقد الأمل، تفاءل ووالله لتوصل للي انت عايزه بس انت تفاءل واصبر على الكام يوم دول،
ربنا معاكوا

لو سمحت يادكتور انا عايز اظبط مواعيد النوم بتاعتى بس مش عارفة ازااااااااااااااااااااااااااااى
وممكن تقولى طريقة احفظ فيها او افهم الكهربية ف الكينيا الخلايا مش عارفة تثبت معايا
ومش فاهمة قاعدة لوشاتيلة