دفعة ثانوية عامة 2016

[رفيقة الامل]

المشاركة الأصلية كتبت بواسطة Mohamed_Hamza

كام حاجة كدا افتكرتها وعايز اقولها
ماتسمعش كلام اي مدرس يقولك الدرس دا سيبك منه مش جاي والكلام الفاضي بتاع المدرسين دا، ذاكر كل حاجة..
متبقاش شاطر اوي وحالل وتظهر شطارتك لزمايلك، لو بحسن نية ممكن تتحسد، لو بسوء نية ممكن تتحسد بردو وشطارتك دي هتتقلب عليك وتلاقي نفسك ضعت، عشان انت كدا ما اخلصتش المذاكرة، وعايز تتعب زمايلك نفسيا حرام عليك.. محدش مهتم انت حليت قد ايه ولا انت شاطر ازاي، كل واحد ملهي في نفسه فخليك انت كمان في نفسك..
النحو انتوا مطالبين بقواعد السنين اللي فاتت كلها يعني ماتستغربش لو لقيته في الامتحان بيسألك في درس اسناد الافعال للضمائر (من اعدادي) او درس اسم الفعل مثلا، فخد بالك من الحاجات دي وراجع النحو كله وحل عليه..
الادب يا جماعة وما اداراك ما الادب، بص هو سؤال الادب واجابة النموذج بالنص من كتاب المدرسة، فاقرأ الادب كذا مرة من النهاردا لحد ليلة الامتحان من كتاب المدرسة..
التعبير اتدرب اعمل موضوعين دلوقتي احسنلك بكتير والله، هيوفر معاك وقت في الامتحان، لو بياخد معاك ساعة كويس، عشان في الامتحان مفروض تعمله في حدود ساعة بردو (دا الابداعي بس)..
النصوص متنساش تعليقها عشان عامل زي الادب كدا بيجي بالنص من كتاب الوزارة..
القصة في الوقت دا حاول تقرأ نصها مش س & ج وبس..
ماتحسسش نفسك بالتقصير وتقعد تلوم نفسك وتضيع وقتك، انت عملت اللي قدرت عليه، حتى لو معملتش حاول تحسس نفسك انك عملت اللي عليك، عشان احساسك هينعكس عليك وعلى اداءك في الامتحان، فكل واحد يخلي باله من احاسيسه..
وانت داخل الامتحان واثناء الامتحان كمان خلي فبالك دايما انك داخل تقفل وانك اشطر واحد في اللجنة..
ومتسهرش ليلة الامتحان..
بس ليلة الامتحان بردو تتأكد ان معاك كل حاجة تلزمك للامتحان، ومن ضمنها ساعة يد، وتحدد كل سؤال في الورقة هياخد منك وقت قد ايه عشان الوقت مايسرقكش (مهم جداً) يعني مثلا التعبير ساعة والتعبير الوظيفي ربع ساعة وباقي الاسئلة كل سؤال منهم ربع ساعة.. لو خلصت سؤال منهم بدري يبقى خير وبركة هيتبقى معاك وقت في الاخر راجع فيه ع النحو مثلا او فكر في سؤال كنت سايبه للاخر..
وانت رايح الامتحان حافظ على هدوءك ومترحش ع الامتحان على طول (بالذات اول يوم) لأ اوصل المدرسة قبلها بعشر دقايق كدا..
مش تكلم حد في المنهج خالص في العشر دقايق دول، هتلاقي ناس متوترة ويقولولك احنا ناسيين المنهج والكلام دا.. سواء هما كدا فعلا او بيعملوا كدا عشان يوتروك انت، مهما يكن، سيبك منهم..
لما تستلم الورقة شوف الاسئلة كلها، هتلاقي اسئلة سهلة عارفها واسئلة عارفها بس مش عارف تجمع الاجابة واسئلة ناسيها، الاسئلة اللي انت عارفها واجابتها حاضرة فدماغك وليكن سؤال قراءة مثلا، ابدأ بيه، شوف الاسئلة اللي قبله هتاخد كام صفحة سيبهم وجاوب القراءة، يعني انت محدد قبل الامتحان مثلا ان التعبير الوظيفي وافكار الابداعي هياخدوا منك اول صفحة والتعبير الابداعي 3 صفحات وسؤال القصة شوفته انت لقيته هياخد منك صفحة بردو، يبقى كدا 5 صفحات، سيبهم وابدأ جاوب سؤال القراءة في الصفحة رقم 6، وانت بتجاوب السؤال السهل دا هتلاقي اجابات الاسئلة اللي انت ناسيها جت على بالك، وانا متأكد من الحكاية دي.. لما تيجي اي حاجة زي كدا فبالك سجلها على ورقة الاسئلة قبل ماتنساها..
حل سؤال واحد بس من الاختياري عشان مفيش وقت تحل الاتنين..
لما تطلع من الامتحان ماتراجعش مع حد، نكررها تاني وتالت ماااتراااااجعششش مععع ححددد، يا اما هتلاقي نفسك حالل صح فهتتحسد، يا اما هتكتشف انك حالل غلط فهتُحبط ومش هتذاكر للمادة الجايه كويس..
الدين والاحصا محدش سمع الكلام وذاكرهم، في النص ساعة اللي قبل امتحان الدين احفظوا الاحاديث بمعانيها واقرأوا في اي وقت اليومين دول قصص الصحابة اللي في الاخر والباقي افتي فيه..
والاحصا نصها احتمال ودي المفروض انها سهلة يعني، وخدناها في اعدادي ف هتفتكرها بسرعة، اقرأ قوانين الاحتمال وشوف مسألتين متجاوبين عليهم من اي ملزمة وليكن اللي بعتهالكوا دي وخلاص.. دا مش هياخد منك ساعتين على بعض.. بعدين راجع فيزيا وسيبك من الاحصا عشان الفيزيا اهم طبعا..
اهم حاجه الثقه والهدوء وانك تكون واثق ان الخير جايلك..
متخفش كده والامتحان بيجي سهل خالص محتاج واحد بس واثق في نفسه وانه داخل يقفل واي حاجه صعبه هتيجي هيحلها لانه احسن واحد في اللجنه..
وصلي ركعتين قضاء حاجه قبل ماتنزل الامتحان
ومتضيعش وقتك اليومين دول..
وخلص الامتحان وروح.. وتخرج من الامتحان تقول الحمد لله حتى لو خارب الدنيا جوا
ولو حد سألك عملت ايه في الامتحان اياك تكدب، قول اللي حصل بالظبط او قول الحمد لله.. دي اهم حاجة.. اياك والخبث..
ولو عرفت بأي طريقة انك غلطت في الامتحان متزعلش، نصيبك كدا، احمد ربنا من قلبك، واتأكد ان الخير جايلك مفيش شك في ده، دا اختبار لايمانك مش اكتر، وافتكر ان كل حاجة متحددة من يوم ماتولدت..
يالا ربنا معاكوا ..

[COLOR="Purple"]الف شكر لييييييييييييك يادكتور
بس الواحد كله اللى ناقصة الثقة بالنفس مش عارفه اكتسبها ازاى الحته دى
نفسى اتخلص منها
وحاجة تانى
[هو عادى لحد دلوقتى احس انى متعبتش
انا حاسة ان سنة طويلة عريضة محسيتش انى تعبت فيه بجد والله مش حاسة انى تعبانة
لدرحة امى تدعيلى تقولى ربنا يديكى ع قد تعبك اقولها بلاش الدعوة دى ده عادى
وحاجة الواحد مش حاسس انه هيبقة ف لجنة بعد 5 ايام
انا كده طبيعة ولا ايه الدنيا
وحاجة تالته
هو الواحد والله مش عارف هو عمل اللى عليه ولا لا
انا حاسه انى مش عارفه عارفة حاجة ف اى حااااااااااااااااااااااااااااااجة
سواء الدنيا او المنهج احساس التوهااااااااااااااااااااااااااان ده
بس الواحد عشمه ف ربنا عشان امه وابوه والله حتى مش عشان نفسى انا ف داهيييييييييييه المهم هما
بس اكيد ربنا هيكرمنا ومش هيدينا ع قد اللى بنعملوه هيدينا ع قدر رجمته وكرمه هو ذو الفضل والاحسان


ممكن تساعدنى يادكتور
وشكرا /COLOR]