قطوف لغوية من منهج الصف الثالث الثانوى

[احلام جميلة]

شرح تفصيلى للكشف فى المعجم



اخيرا كشف المعجم... مش تدققوا اوي في المقدمة هو بس بجهزكم فيه عشان تعرفه أن الدرس تقيل وإن اي حد أي حد ممكن يغلط في كشف المعجم... في البداية شرح ثم البهاريز في الاخر
الكشف في المعجم
الكشف في المعجم هو إنك ترد الكلمة لحروفها الأصلية وهي دي مادة الكلمة ... مثلا كلمة (كتاب – استخراج – انعزال) في مادة (كتب – خرج – عزل) ... مش هقدر اقولك إن الدرس بسيط وسهل كالعادة ... لأن الدرس محتاج شغل منك ... الكشف في المعجم مش فهم بس ... ولا حفظ بس هو الاتنين ... الكشف في المعجم خبرة بتيجي من التدريب الكتير المبني على فهم ... ببساطة دا بسبب إن المواد اللي في المعجم كتييير ... مثلا معجم (لسان العرب) فيه حوالي تمانين ألف مادة ودا أقوى المعاجم ... وطبعا في كل مادة بيطلع عشرات الكلمات وممكن يعدوا المائة كلمة ... وكل كام كلمة ليه طريقة عشان تعرف المادة بتاعتهم .... طريقة خاصة بيهم ... وصعب تعرف كل الطرق ... وبردو صعب تحفظ كل المواد ... بس بالخبرة هتقدر تعرف معظمهم ... وهتقدر تبقى كويس جدا فيهم ... وانا هساعدك ( ... المهم نبدأ بقى.
كيفية معرفة مادة الكلمة
أشمل وأسهل طريقة عشان تعرف أصل كلمة إنك توزن الكلمة ... الوزن يعني مثلا (احتمال) على وزن (افتعال) ... (انسجام) على وزن (انفعال) (مناوشات) على وزن (مفاعلات) ... والوزن دا حاجة هتلاقيها فيك بالفطرة فخليك واثق من نفسك وقول اللي في بالك وهتلاقيه الوزن الصح فمش تشك في نفسك ... بعد كدة ناخد الحروف المناظرة للفاء والعين واللام... فتبقى مواد (احتمال – انسجام – مناوشات) هي (حمل – سجم – نوش).
كام ملحوظة
1- الحروف اللى بتبقى موجودة مع وزن الكلمات ... دي بنسميها (حروف الزيادة) وهي مجموعة في كلمة (سألتمونيها).
2- الكلمات (اضطرار – ازدهار – اضطراب) ... على وزن (افتعال) صح ... زي ما انت حاسس ... فلما ناخد الحروف المناظرة هيبقوا في مادة (ضرر – زهر – ضرب) ... (الطاء والدال والتاء) قرايب فمش تقلق ما تلاقي الحرف اللي مناظر للتاء في كلمة (اضطراب – ازدهار) هو طاء أو دال على الترتيب.
3- لو الكلمة فيها حرف مضعف زي (شدَّ – همَّ – جُنَّ) ... لما نكتب مادة الكلمة بنفك التضعيف وبنقول مادة (شدد – همم – جنن) ... مش بنسيب التضعيف وإلا غلط.
4- لو مادة الكلمة فيها همزة زي (آخذ – مسئول – إنشاء) بنكتب الهمزة على ألف فبنفول في مادة (أخذ – سأل – نشأ) ... مش بنكتبها بأي شكل تاني وإلا غلط.
5- لو كلمة آخرها (اء) زي (سماء) أو الكلمة المقطع قبل الأخير (ائـ) زي (سوائل) مش بنوزنها ... بنجيب كلمة تانية منها ثم نوزنها مثلا (سماء) هنقول (يسمو) دي وزنها (يفعل) تبقى مادة (سمو) ... كذلك كلمة (سوائل) نجيب كلمة تانية مثلا (يسيل) يبقى مادة (سيل).
6- ممكن إن الكلمة يكون أصلها أربع حروف زي (زلزل – دحرج – طمأن – قشعر – سلسل) ... بل ممكن يكون خمسة زي (زبرجد – سفرجل)
كيفية معرفة أصل حرف العلة
لو طلبت منك تبحث عن كلمة (استعاد) البعض هيقول وزنها (استفعل) فبالتالي مادة (عاد) ... البعض هيجيب فعل مضارع (يعود) ودي وزنها (يفعل) فبالتالي في مادة (عود) ... وبعض هيجيب فعل مضارع (يُعيد أو يستعيد) فبالتالي مادة (عيد) ... الإجابة الوحيدة الصح في التلاتة دول هي (عود) ... الباقي غلط ... ليه غلط؟ ... دا موضوعنا بقى (
أولا ما ينفعش في المعجم تكتب في مادة الكلمة حرف الألف ...عشان كدة (عاد) غلط ... لأن احنا في المعجم بنكتب أصل الكلمة دي ونبين هل هو واو ولا ياء
ثانيا إزاي نجيب أصل الألف ببساطة خالص ... بنجيبه من مصدر الكلمة ومن مضارعها ... بس من أي مضارع من أي مصدر؟ ... لأ بنجيبه من مضارع الثلاثي ومصدر الثلاثي وخاصة اسم المرة ... أما غير كدة فده مش هيجيبلك أصل الكلمة والغالب إنه هيوصلك لإجابة غلط.
ملحوظة
مضارع الثلاثي بيبقى على وزن (يَفعَل) أوله مفتوح زي (يعود – يزول –يبيع) ... أما مضارع الرباعي بيكون على وزن (يُفعِل) أوله مضموم زي (يُعيد – يُزيل – يُهين) ... وكل مضارع مضموم الأول يبقى رباعي.
فلو طلبت منك تكشف عن (المشتكى) ... هنوزنها (المفتعل) ... فيه حرف اللام قصادها حرف علة ... يبقي نجيب المضارع ... اوعى بقى تقول (يشتكي) كدة هتقول في مادة (شكي) وكدة غلط ... لأ احنا قلنا مضارع الثلاثي اللي هو (يشكو) فكدة هتوصل للإجابة الصح اللي هي (ِشكو).
ولو طلبت تكشف عن (سيء) ...هنلاقي إن فيها حرف علة فيه النص ... فبالتالي بنجيب المضارع الثلاثي منها اللي هو (يسوء) فبالتالي مادة (سوأ) ودا صح... ومش تسرح وتقول (يسيء) فتغلط وتقول (سيأ) دا غلط.
المشكلة إن بعض الكلمات مش هتعرف تجيبلها مضارع الثلاثي ... ساعتها حاول تجيبلها مصدر الثلاثي ... ودا حصل مع الكشف عن (إنارة) ... مش عارف تجيب فعل ثلاثي ... وطبعا (يُنير) رباعي مالناش دعوة بيه ... بس لو دورت شوية هتلاقي كلمة (نور) ودي مصدر ثلاثي ... فبالتالي هي في مادة (نور).
أحيانا مش هتعرف تجيب المضارع ولا المصدر الثلاثي زي مثلا (إرادة – استطاعة – مسافة – حاجة) ... وهنا دا دورك إنك محتاج تقرأ مواد كتير عشان تعرف الكلمات اللي زي دي ... بس اعرف إن في الغالب أصل الألف بيكون (واو) عشان كدة كشف الكلمات دي ع الترتيب (رود – طوع – سوف – حوج) ... بس بردو أحيانا بتبقى ياء وساعتها الكلمة بيكون سهل تعرف كدة زي (مباع – زائد) فعلهم (يبيع – يزيد) فبالتالي في مادة (بيع – زيد) ... وساعات بيبقى صعب تعرفها ودي كلمات قليلة أهمها (إفادة – إقالة – قيلولة – سياحة – هيام) كلهم على الترتيب في مادة (فيد – قيل – قيل – سيح – هيم).
غير الكلمات دي هتبقى احتمالات وأضمن لك طالما ما عرفتش تجيب أصل الألف إنك تعتبر أصلها واو.
بهاريز
- الكلمات اللي بتتكون من تلات حروف وآخرها تاء مربوطة ... دي تلات فرق:
الحرف اللي في النص ساكن زي (جنَّة – أُمَّة – سُنَّة) بنكشف عنهم بأننا نحذف التاء ونكرر الحرف التاني مرتين فيبقوا في مادة (جنن – أمم – سنن).
الحرف الأول مكسور والتاني متحرك زي (ثقة – صلة – سِنة) بنكشف عنها بأننا نحذف آخر حرف ونحط بداله واو في الأول فبنقول مادة (وثق – وصل – وسن).
لو مش من الفريقين اللي فوق زي (سَنَة – أَمَة) فالغالب فيهم إننا بنحذف الحرف الأخير وبنحط مكانه (واو) فبالتالي على الترتيب في مادة (سنو – أمو).
درب نفسك:
(كلٌ على حدة) – (السكين لها حدة شديدة).
اكشف عن ما تحته خط.
- الكلمات زي (الخاصة – المادة – الهامَّة – العامة) بنبحث عنهم في مادة (خصص – مدد – همم – عمم).
- (آفة – آهة – ساحة – ساعة – عاهة – هامَة) في مادة (أوف – أوه – سوح – سوع – عوه – هوم).
- الكلمات (غاية – راية – آية) بنبحث عنهم في مادة (غيي – أيي – ريي) ... وجمعهم (غاي – راي – آي) ... كلمة (داية) وهي المرأة التي تولِّد ... بنبحث عنها في مادة (دوي) ... اطمن إنه مش هتقابلك كلمة تاني بتنتهي بالمقطع (اية).
- الكلمات اللي بنحس إن وزنها (مفتعل) وتكون ظاهريا من أربع حروف بنقسمها لفريقين:
1- (معتدَّ – مهتمَّ – مختصَّ – مغتمَّ) ... الفريق دا ظاهريا من أربع حروف والحرف الأخير مشدد .. ففي مادة (عدد – همم – خصص – غمم).
(معتدٍ – مهتدٍ – مرتضٍ – مقتضٍ) ... بردو ظاهريا من أربع حروف وفيه تنوين في الآخر ... ... لأن دي أسماء منقوصة (معتدي – مهتدي ... الخ) حذفنا منها الياء اللي كانت في الآخر ...فلما نجيب أصل حرف العلة دا هيكونوا في مادة (عدو – هدي – رضو – قضي) ... والوزن الحقيقي للكلمات دي هو (مفتعٍ).
- الكلمات زي (اتصال – اتعاظ – اتساع – اتهام – اتكال – اتسام – اتصاف) وكل اللي على القياس دي بنبحث عنهم في مادة (وصل – وعظ – وسع – وهم – وكل – وسم – وصف) ... ما عدا (اتباع - اتخاذ) في مادة (تبع –أخذ) ... و(إتقان) مش تبع الكلمات دي لأنها بادئة بهمزة قطع والتاء مش مشددة.
- (أبناء) في مادة (بنو) .... أما (بناء) في مادة (بني).
- (سياحة) في مادة (سيح) ... أما (ساحة) في مادة (سوح).
- (هيام) في مادة (هيم) ... أما (هَامَة) أي الرأس في مادة (هوم).
- (زيادة) في مادة (زيد) ... أما (الزاد) الخاص بالمسافر ففي مادة (زود).
- (الميل) في مادة (ميل) ... أما (المال) في مادة (مول).
- (يد) في مادة (يدي) ... (دم) في مادة (دمي).
- (سماء – أسماء) في مادة (سمو).
- (أسماء) في مادة (سمو) أو (وسم) ... و(سمو) أفضل.
- (حياة) في مادة (حيي) أو (حيو) ... و(حيي) أفضل.
- (إتقان – متقن) في مادة (تقن) ... (تقوى – متقين) في مادة (وقي) ... (يقين – موقن) في مادة (يقن) ... (قانون) في مادة (قنن).
- (مدين – ديون – أديان) في مادة (دين) ... (مدينة – مدائن) في مادة (مدن) ... (ميدان – مائدة) في مادة (ميد) ... (مادة) في مادة (مدد).
- (إنسان – أناس – أناسي – إنس) في مادة (أنس) ... (ناس) في مادة (نوس) ... (نِسَاء – نسوة – نسوان) في مادة (نسو) ... (نَسَّاء – نسيان) في مادة (نسي).
- (قيامة – تقييم – إقامة – تقويم – قوم) في مادة (قوم) ... ما فيش (قيم).
- (دعوة – يُدعى – تداعيات) في ماد (دعو) ... ما فيش (دعي).
- (مكان – أماكن) في مادة (كون) ... (مكانة) في مادة (مكن).
وللتسهيل (المكانة) هي منصب بيمكن الشخص من حاجات أكتر ... المكانة بتمكنه فعشان كدة مادة (مكن).
- (أبناء) في مادة (بنو) ... (بناء) في مادة (بني).
- (أباء) في مادة (أبو) ... (إباء) في مادة (أبي).
- (الحياة البرَّية) نبحث عنها في (برر) ... (الله خالق البرِيَّة) نبحث عنها في مادة (برأ).
- (يئنُّ الرضيع) بمعني يبكي ويتوجع جاية من (الأنين) بنبحث عنها في مادة (أنن).
- (الحادي عشر) نبحث عنها في (وحد) جاية من الواحد ... (حادي الإبل) ودا اللي بيرعاهم بنبحث عنه في (حدو).
- (تاريخ) في مادة (أرخ) ... (تجاه) في مادة (وجه).
- (الرياح – الراحة – أرواح) في مادة (روح).



كل الشكر والتقدير لمستر حسن محمد حسن