حاجة مستفزة

[بنت دمنهور]

السلام عليكم ورحمة الله ويركاته

جايبلكم كدة يا بنات شوية حاجات مستفزة كدة وبتحصل معانا كلنا اكيييد

اول حاجة مستفزة بقى

وانتي راكبة تاكسي وقاعدة كدة في حالك يجي السواق يقعد يلك معاكي وانتي تبقى مش عاوزة تتكلمي معاه

يقعد يقولك جرى ايه يا انسة انتي مش بتردي ليه احنا مش قد المقام ( حاجة مستفزة) والمشكلة انه بيسال في حاجات وهو ماله ومالها يعني مثلا انا راكبة رايحة للدرس يقولوا انتي في سنة كام رايحة درس ايه ده انا ابني او بنتي كانوا كذة وكذة والله بيكرهو ا الواحد انه يركب تاكسي بس اعمل ايه مهو الاتوبيس تلقيه بهدلة يعني المضطر يركب الصعب

اه الاتوبيس بقى حاجة مستفزة تانية

تركبي الاتوبيس والزحمة ماشاء الله ويبقى رجالة زى ما بيقولوا كدة (شحط) لامؤخذة قاعد وانتي واقفةويا سلام بقى وانتي نازلة تبقى عاوزة متخبطيش في حد تقولوا لهم عاوزة اعدي يقولك ايه ما هو المكان واسع اهو ولو انه مش بيبقى في مكان لبيبي حتى علشان يعدي طيب عديتي تيجي بقى تنزلي تلقيهم واقفين على الباب مش راضين يتحركوا طيب اعدي ازاى يقولك ايه اصل خايفين ننزل منحلقش نركب او منلقيش مكان (حاجة مستفزة)

الافراح حاجة مستفزة تالتة

تيجي عندك فرح بقى وعلى الاغلب مش بيبقى اسلامي والاغاني بقى والمناظر بقى انتم عارفين
طيب قرررتي تروحي مثلا انتي لبسة طرحة خمار نقاب والى ذلك يقولولك انتي هتروحي الفرح كدة طيب اخلعي الحجاب النهاردة بس ولو مش عاوزة طيب جطي ميك اب قال علشان تبقى مقبولة شوية (حاجة مستفزة )

تيجي بقى مش عاوزة تروحي (منتيش ناقصة ذنوب) يجي بقى يقولوا لمامتك هى مالها كدة مش طلعة فريحي ومعقدة الدنيا اوي يعني هى اللي هتصلح الدنيا (حاجة مستفزة)

حاجة رابعة مستفزة بتحصل في الجامع مع الستات ودايما في رمضان

يرحوا الستات يصلوا التراويح طيب مهو حاجة كويسة اهو لا كويسة ايه دي تلاقي الست جايبة ابنها الصغير وسيباه يعيط واحنا بنصلي واللي بيجري قدمنا ويا سلام بقى لو عيل جيه قعد قدامك طيب هتسجدي ازاى تيجي تقوليلها متسبيه في البيت تقولك مفيش حد يقعد معاه طيب متخليكي في بيتك احسن (حاجة مستفزة)

كمان ايه يرحوا قبل الصلاة بشوية ويعقدوا يتكلموا اقسم بالله العظيم دي تقعد تقول لي دي طبختي ايه النهاردة طيب وهتطبخي ايه بكرة ويعقدوا ينموا على دي وعلى دي (حاجة مستفزة )

كمان حاجة بقى في رمضان برضه في صلاة الفجر بابا واخواتي كانوا بيحكولي دايما يرحوا يتكلموا ويعملوا صوت والرجالة تحت تبقى مش عارفة تصلي منهم
لدرجة انه في ايام كانوا بيتعاركوا فيها ويخلوا الشيخ باعني ايه ضغطه يترفع (حاجة مستفزة )

حاجة مستفزة خامسة

يا سلام وانتي نازلة تشتري لبس او حاجة واللبس ما شاء الله ايه بقى حاجة مش كويسة خالص تدوخي هنا وهناك وفي الاخر تدخلي محل اهو نشوف تبقى عاوزة تشتري حاجة البنت اللي هناك تقولك لا خدي دي احسن طيب انا عاوزة حاجة التانية والمشكلة انها تقعد تلح عليكي وتقولك انه هيبقى حلو عليكي لحد ما تكرهك في نفسك وتخليكي تسيبي المحل وتمشي (حاجة مستفزة )


حاجة مستفزة سادسة

اشتريتي لبس والحمد لله لقيتي حاجة مناسبة تلبسيه بقى تيجي صاحبتك تقولك ايه ده ده مش موضه كنتي جيبي حاجة تانية او اللون مش حلو انتي شرياه من محل ايه تقوليلها كذا تقولك يعني متلقيش غير ده كنتي روحي لكذا
طيب مهو عجبني وانتي مالك دي ممكن كمان تفضل وراكي لحد ما تكرهك من اللي انتي اشترتيه (حاجة مستفزة)

ودلوقتي قوليلي ايه رائيكم بعد كمية الاستفزاز دي اترفع ضغطكم ولا

واستنوا مني حاجات مستفزة تانية

والى لقاء مستفز اخر

في امان الله