ماشى عكس الريح

[شريف ابوالنصر]

يا راحل مراحل ..

فى عمرك 00 مابتنتهيش

كل رحلة بتقتلك

تاخد نصيبك م الهموم

ميت ألف كيلو جرام

والوجع .. يشد حيله ،

وتنهزم .. لضربة الأيام

بس فيك عافية صبور

ريح تهزك ، ما بتتقلع

بتغلب ساعات اختصامك للكلام

ساكت مدى الأيام

تستطعم الإحساس بالعذاب

آلامك فوق احتمال الهمم

تغيير مزاجك / بهـَتـان مشاعرك

وخناقك لوشك

واحتباس الدم

وقوة الأعصاب :

دافع مرير للغضب

ع السجن داخل طموحك

وحلم ابن كلب العصاري:

أسود ويأس .. شادد حزام الدوام !

.........................

يا راحل 00

بتستعجل خطاوى الرحيل

كرهت الليل الطويل ،

والاحتلام ، ببنت تفرد ضلوعها :

المراكب / والشراع/ والشطوط / والصدف

كرهت :

تدبير الفكاك .. من كلابشات عشق وهم / وقرف

قلبك دفع مثقاله : ارتجاف وحنين ولهفة وشغف

ماوقعتش : غير صيد ثمين

لمواصلة جنانك / ولما خانك

ـ ساعة وصولك للمطاف الأخير ـ

مجمل الحب السراب ..

لعنت سلسال الشرف0

يا راحل ..

بترحل من مبتداك 00 مفيش (انتها )

لذعة الحزن تغص حلقك

جوفك جفاف الجوع

عقلك من ( الإعياء ) شطط

ما تسألنيش إجابة لسؤالك :

ـ تقدر تفسر معنى العبط ..

وتحل معضلات الإنسانية

ولؤم المخاوف من ( يقظة ضمير ) ؟!

.......... متسألنيش .........

يشبهك شخبوط صغير

على سور محطة مصر للسكة الحديد

قبل ما يبنوا صرح رمسيس ( المستعار )

فوق حطامها ، أيام هجوم التتار

راكبين خيول الفرنجة ، والمغول :

بالمدافع والصواعق ودمدمات البارود

ورغم خيانة جيوشك .. وقفتلهم : تقاتلهم

فوق وتحت / شرق غرب /

يمين شمال / شمال يمين

وفجأة لقيتهم ميتين : فى جلدك / لحمك/

خاتم فى صبعك / نور طريقك / سكتك /خيالك

عطشك/فزعك/سكنك/نفسك/نومك/قدرك/شجرك/

مطرك/ رعدك/ برقك/عرقك/ ورقة توتك ..

وسابوك لوحدك .. بتضحك : واجهة صفرة لملامحك

شكلك صبحت معبد فراعنة

تماثيل / هياكل / سحر وطلاسم ولعنة

قرابينك .. عجينك / حياتك / سنينك / عرفك ودينك

من غير ما تشبه مسمى .. لمدلوله معنى !

لا عبيد بيصنعهم الجبروت

ولا سطوة الكهنوت

ما دمت مابتملكش سوط

وعرشك مفيش

دماغك محطات النوارس والصقور

حلمك : فضا

فضفضة روح بتتحول سدى لخراب

صراخك : رضا ، بالمستحيل والعدم يحولوك لتراب

مسئول عن كرامتك عرق نافض

.. يتقطع !

طول ما أنت عايز تبقى رافض

... يتخلع ..

من جوه منك : ثورتك / شهوتك ،

وصنعك للحياة !!

يا راحل مراحل .. فى عمرك مابتنتهيش

كل رحلة بتقتلك 00

وزى ما تعودت منك ..

ترجع تعيش 0
sherifaboelnasr

[شريف ابوالنصر]

عاوز رايكم بسرعة

[الشاعر/محمد علي]

ايه يا شريف
عاوز راينا بسرعه ليه ؟
عشان ماشى عكس الريح
كلماتك جميلة
وارجو من المشرف أنا يعدل الأندرلاين من السطور ويشيله خالص