كفاياكم تخلف يا أولياء الأمور .. كفياك تخلف يا مجتمع ميت

[احمد رضا]

السلام عليكم ورحمة الله وبركاته
فعلاً حرام اللي بيحصل ..
لما أب لولد في أولي ثانوي وبنت في أولي ابتدائي يموت
بسبب إهمال دكتور تخدير متخلف يبقي فعلاً حرام
لكن في نفس الوقت مبلومش الدوكتور المتخلف ده هو متخلف خلاص وعرفنا
انا بلوم أهله اللي أكيد فيهم نفس الحاسة اللي عنده
مش فاهم أنا ليه كل ولي أمر يشرط علي ابنه او بنته يبقوا دكتور ومهندس
أنا مش فاهم يعني ايه وجهه النظر المتخلفة تماما دي ( ياريت لفظة متخلفة تتفهم زي ما هيا لانها مش ذم دي حقيقة ومعني )
مش فاهم يعني ايه دكتور ويعني ايه مهندس
عمالين كل يوم تطلعولنا واحد فاشل يلعب في أرواح الناس ويكون سبب في قتل ناس بريئة بإهمالة وتعملولنا مهنددس يبني كباري بتقع وعماير بتقع علي دمغة اصحابها
حرام اللي بتعملوه في المجتمع ده والله .. وربي ما حد أخر المجتمع ده غيركم
أوعوا تكونوا فاكرين إن الشباب هايف كدا من الباب للطق .. كل إناء ينضح بما فيه
ده كلام الناس العاقلين
إن لو الشاب هايف يبقي أكيد طالع من بيت متسيب بيت مفيهوش حاكم ومفيهوش حد عنده المعرفة بتربية الأولاد
لو الشاب طلع متخلف ومبيفكرش غير في البنات فمن جهلكم وتخاذلكم في تربيتهم
انتوا السبب في تخلف المجتمع كله .. وعشان ابقي عادل والغضب مش مسيطر عليا كلياً فإنتوا غلطانين بنسبة 80 % لانكم اللي بانيين الجيل الحالي أصلا .. أكيد مفيش واحد بيبني بيت معوج ومش واخد بالو منه وهوا بيبنيه ويتفاجئ لما البيت يطلع مايل ف الآخر .. لاء لازم يطلع مايل عشان اللي بانيه مش معدول أصلا ً
حرام عليكم .. علموا أولادكم صح .. كام فاشل اتولد وكام ضحية اتفنت بسببكم .. كان فيه ناس ممكن تبقي أدباء وعباقرة وفشلت في حياتها كلها بسبب تحكمكم في مستقبلهم
علموهم إزاي يختاروا مش تختارولهم .. علموهم الأصل وهما يتفرعوا مع نفسهم
مش عارف البلد دي استحملها علي إيه .. الواحد كان بيقول حكومة مش كويسة والشعب غلبان وكويس دلوقتي هيقول إيه ؟
حسبي الله ونعم الوكيل
ربنا يهدينا جميعاً
وربنا يصبر أهل الميت ويحمي بنته اللي محدش عارف
ممكن بعد موت والدها يحصلها إيه والظروف تأثر عليها إزاي
ومحدش عارف الولد ده مين هيحتضنه ويحاول يبني شخصيته صح
ربنا يرحمه ويرحمنا