رأى شخصى ولازم أقوله .. لمصلحة زمايلى مش أكتر

[أسيل رزق]

السلام عليكم ورحمة الله وبركاته

السادة الإداريين

كلامى يمكن هيكون موجه لمجلس الإدارة

شايفة اليومين دول فى تعيينات جديدة و غريبة شوية

مش غريبة على الأشخاص لا غريبة من الادارة

بتهيقلى إحنا فى وقت إمتحانات .. و مش عايز تركيز من الإداريين كبير فى المنتدى

يمكن التعيينات دى معمولة علشان الضغط والتنظيم فى الموقع الفترة الجاية

بس مش معنى كده إن الادارة تعين ناس بمناصب كبيرة و هى عارفة إنهم برده طلبة والواجب إنهم يركزوا فى المذاكرة أكتر

طبعاً ناس هتقول .. هو حد إشتكالك .. ما هما شغالين وعارفين مصلحتهم وموافقين على كده

عارفة والله كل ده .. بس مش معنى كده إن الادارة تعين طلاب فى الوقت ده

أنا بصراحة إستغربت جداً من تعيين اللورد نائب الادارة .. مش إستغراب معناه إنه مش قدها لكن إستغراب إن ده وقت إمتحانات و معنى إن واحد إتعين نائب للإدارة يعنى لازم يشتغل أكتر .. و ده اللى هيعمله من بداية تعيينه علشان يثبت إنه قدها .. طبعاً هيقضى وقت أكبر من اللى كان بيقضيه فى خدمة المنتدى قبل تعيينه

طيب ليه الادارة ماتستناش للأجازة .. على الأقل هيكون فى فرصة كبيرة لناس تانيين يثبتوا نفسهم أكتر
فى نفس الوقت مايعطلوش الطلبة و يخلوهم يخسروا وقت كبير بعيد عن المذاكرة

هتقولوا إحنا شايفينه مثلاً أحسن واحد بيشتغل فا دى مكافأة ليه و مش لازم يشتغل جامد دلوقتى .. مفيش مكافأة ضد المصلحة الشخصية ،، و طالما هو مش هيشتغل الفترة دى يبقى المفروض كانت تتأجل كل التعيينات طالما اللى بيتعين مش هيشتغل فى منصبه الجديد

كنت عايزة أتكلم فى نقطة عدم أخذ رأى المشرفين و الإداريين على الأقل فى التعيينات أو الفصل
بس أنا قلت أتكلم فى نقطة مصلحة الطلاب اللى المفروض هما رقم واحد فى الموقع و أصحاب الإستفادة الأولى

عموماً ده كان رأيى وحبيت أوضحه و ربنا يوفق الجميع