رؤية جديدة فيلم (troy)

[earth]

السلام عليكم و رحمة الله و بركاته

هنتكلم عن فيلم مشهور او على الاقل كان مشهور سنة 2004 ساعة لما اتعرض
هوه فيلمtroy
اولا الفيلم هناخده برؤية تانية جديدة
شوفوا يا جماعة الفيلم مملؤ بالجوانب الانسانية اللى للاسف بعض الناس زى "اخيل" فى الفيلم بيخبيها عشان لا يبان ضعيف
الفيلم كمان بيحكى حاجة تاريخية وان كانت مش مؤكد هيه حقيقية ولا لا و ان كان بيحتوى على عنصر العنف ولكنه كان تصوير لواقع يمكن حصل او يمكن ماحصلش بشكله اللى ظهر فى الفيلم و لكن تصوره "هوميروس" فى شكل درامى مؤثر او يمكن يكون ماحصلش خالص بس كاتب عظيم كتب القصة (الملحمة) دى
ماحدش ينكر ان فى ناس بتفكر زى "اخيل" يعنى ما يظهرش جوانبه الانسانية زى الالم و الحزن و البكاء و كمان فى ناس كتير بتفكر زيه فى ناحية الخلود لان فى ناس كتيرة اوى بتحب ان الناس تفتكرها بعد ما يتوفاها الله
خلينا نوضح قبل ما ابتدى اقول ليه الفيلم عظيم من وجهه نظرى ان الكلام ده على جوانب محددة فى الفيلم يعنى باخد من الفيلم الحلو و باسيب الوحش عشان كل حاجة فى الدنيا فيها الحلو و فيها الوحش و لازم استخلص منها الحلو عشان انمى فكرى

وبالمناسبة "حصار طروادة " من "الالياذة" ل"هوميروس"
يلا ابتدى
من جوانب انسانية
1- لو لاحظنا "اخيل" فى اللقطة اللى" بريام" جالوه فيها عشان ياخد جثة ابنه الاكبر " هكتور " حنشوف اد ايه انفعل "اخيل" و اد ايه مشاعره اتحركت و هوه بيسمع "بريام"
و قالوه تعالى ورايا بعد دقيقة شفتوا اد ايه الانسان انسان مهما كان بيتصنع القوة الشديدة و الوحشية فاجهش "اخيل" فى البكاء على "هكتور"لقطة مؤثرة جدا مهما حصل القتل عمره ماكان سهل على حد حتى على بطل الابطال كمان بتوضح ان "اخيل" مفتقد لحنان زى الحنان اللى بيتكلم عليه "بريام"
2- لقطة كمان ساعة لما مات "اخيل" و السهم فى كعبه و الكاميرا بتصور اللقطة من فوق بتدى احساس ان "اخيل" العظيم الجبار مات بكل ضعف و خلاص انتهى بالسهولة دي و انتهت مذابحه بس بسهم فى كعبه كل جبار ليه نهاية و فى الاخر حيحس بالالم اللى حسسه للناس
3- شفتوا كمان لما "برسايوس " بتسال " اخيل" انت ليه كده ليه اخترت انك تقتل و تحارب قال انه مااخترش حاجة هوه اتولد لقى نفسه كده يعنى هوه ما يعرفش اى حاجة غير القتل و الحرب ماحدش قالوه الصح فين يعنى فيه خطا كبير فى اللى اتعرض له وهوه صغير يمكن هوه من جواه فى اعماقه مش عايز يبقى كده بس مش عارف يعمل ايه متخبط و فى مشكلة فى شخصيته اظن انه شخصية ضعيفة شافت القتال انه املها الوحيد فى الاحساس بالقوة و الثقة بالذات لان الشخصية دى لا تعرف شئ غير القتال فاقنع نفسه بيه لانه امله الوحيد

من جانب اخر

الفيلم يحتوى على مشاهد لحروب مصممة بغاية الدقة و بجد فى شغل مبذول واضح فى الفيلم ان كان تصوير حقيقى او كمبيوتر
على فكرة ميزانية الفيلم كانت 175 مليون دولار
من جانب اخر
الفيلم يظهر اد ايه البشرية كانت متخلفة و كانوا يتصارعوا على اتفه الاسباب و كانوا الناس يموتوا بالالاف عشان اسباب تافهه و ليست عامة بل خاصة بناس معينة و حدهم زى سبب قيام حرب طروادة فى الفيلم
وانا شايفه ان البشرية لم تتطور كثيرا عن السابق مازالت النزاعات قائمة
احنا رغم كل التقدم العلمى و التكنولوجى اللى احنا وصلنا ليه ماتقدمتش النفس البشرية و لا ارتفعنا بيها ملى واحد عن السابق مازالت النزاعات قائمة لاسباب زى (الجمل بتاع القبيلة دى شرب من قناة القبيلة دى )


هناك بقية........

*مش عارفة ليه مترددة اعرض الموضوع بس اهه عرضته وخلاص رغم انى عارفة ان المعارضة حتبقى كتيرة بس انا بقول وجهه نظرى*