ساعدونى، مشكلة "فنية"!

[Eng. Ahmed Said]

بعد السلام عليكم جميعاً..

دلوقتى أنا بدأت دروس وكانوا أول درسين math وألمانى، الحمدلله خلصت المطلوب منى فى الأول وحليت الأسئلة إللى المستر إديهالنا وكمان حليت مجموعة إضافية من كتاب لامى وكله الحمدلله رب العالمين

المشكلة بقى كانت فى مادة الألمانى إللى بدأتها إمبارح والمستر إدالنا ملزمة نحل منها ونذاكر إللى هو إداهولنا، كده تمام لحد هنا وأنا إلتزمت وذاكرت كويس الحمدلله مرة وإتنين، المهم بقى إنه كان بيكتب على ورق فلوسكاب والمفروض إن إحنا بعد ما تنتهى الحصة هننزل نصورها وللأسف ما أسعفناش الوقت لإنجاز ده والمفروض كنت هقابل صاحبى أصور الورق النهاردة بس حصلتله ظروف منعته وإن شاء الله بكرة هقابله آخد منه الورق، وكمان المستر كان طالب مننا إننا نحل 200 سؤال من كتاب ستار...

طيب معلش أنا إتكلمت كتير، بس المشكلة بجد هنا إن الورق كتير والحل كتير، وأنا بكرة بإذن الله عندى درس كيميا ويوم السبت بإذن الله درس عربى وإنجليش، يعنى كده يومين مليانين 100% وربنا يكرمنى وأقدر أخلص التلات مواد فى اليومين دول! طيب إزاى هقدر أنجز المطلوب منى فى الألمانى بشكل كويس لإن برضه ممكن مادة زى العربى أو الكيميا تطلب منى وقت أكبر إنى أديلها وقت كبير فى يوم فاضى ليا!

وللعلم أنا ليا الحد والإتنين يومين فاضيين وده المُتفق عليه لحد دلوقتى بس إحتمال يوم منهم ينشغل بالكيميا، وأنا ياجماعة بجد محتاس ومش عارف هعمل إيه، بجد أنا تهمنى أوي البداية السليمة وماخليش حاجة تتراكم عليا، المساعدة ياجماعة ياااريت ربنا يخليكم