|
#1
29-09-2009, 02:54 PM
|
||||
|
||||
الوصايا العشر للى عايز يعيش فى مصر
الوصايا العشر للى عايز يعيش فى مصر 1. لا تتظاهر لا تتظاهر بأنك فاهم كل حاجة...لأنك مش فاهم أى حاجة...لا تتظاهر بأنك راضى وقانع فى حين إنك فى الحقيقة لا راضى ولا قانع...فى الواقع أصلاً مفيش حيلتك حاجة ترضى بيها أو تقنع بيها ولا تتظاهر مع المتظاهرين فى ميدان التحرير ولا فى أى ميدان تانى ولا حتى ميدان بيكاديلى بغض النظر عن موضوع التظاهر...وهل بسبب القضاة و لا الصحفيين ولا فلسطين ولا لبنان أو حتى البنزين اللى غلى بسبب إستهلاك الحكومة له فى إنهم يولعوا بيه فيك إنت وأهلك واللى يتشددلك...لا تتظاهر 2.لا تأكل ما تاكلش حق غيرك فى إنه ياكل خيرك..فأنت فى مصر...و هى نفسها واكلة الخير فى بطنها مش بيقولك النيل رواها والخير جواها...و بعدين إنت لا حتاكل حق ولا غيره..لان غيره ده مش موجود و ربنا يباركلك فى سندوتشين الفول والطعمية وطبق الكشرى و يحليهم فى بقك خليها بمزاجك و إعملها بجميلة و خلاف كده لا تأكل 3.لا تتردد فى إنك تقول نعم مش بيقولك كلمة حاضر بتريح..خليك طوع وسلس... ولا تتردد فى إنك تروح لجنة الإنتخاب والإستفتاء..و إخترناه إخترناه.. و أصحابك بتوع المجلس الموقر ممكن يعكموك بمياية او بطانية وأهو كله فايدة لأنك بعد كده مش هتشوفهم أصلا ولا فى الأحلام يا معلم...لذلك لا تتردد فى أنك تشارك لا تتردد 4.لا تضحك طب على ايه ؟؟ بخلاف نفسك مفيش حاجة ممكن تضحك عليها..النكت بقت قديمة و بايخة و الضحك من غير سبب فى هذا الزمن قمة الادب..و بمناسبة قمة الادب هل تعلم ما هى إنك تخبط على دولابك قبل ماتفتحه...و قمة الأدب مثلها مثل أى قمة صعب الوصول إليها إنسى الضحك بجملة كل اللى نسيته..و لو سمعت أى نكتة قول عليها بايخة.. بيقولك فار نط فى كاس ويسكى طلع يقول يلعن أبو القطط...بايخة...زى ما قلنا خليك غم...لا تضحك 5.لا تندهش لا يوجد ما يثير الدهشة..لأن كل المعطيات و المقدمات تؤدى إلى النتائج الحالية... و هى رغم إنها قمة الدهشة إلا إنها لا تثير أى دهشة...عادى جدا وبالمناسبة.. هل تدرك يا عزيزى ما هى قمة الدهشة ؟؟ فاكر فى الوصية اللى فاتت لما خبطت على دولابك فى قمة الأدب؟؟ أهو قمة الدهشة لما الجاكت اللى متعلق فى الدولاب يفتحلك... و عندما يحدث ذلك تذكر جيدا...لا تندهش 6.لا تلعب إنت مالكش فى اللعب الكبير...يبقى ما تلعبش احسن..حتلعب فى إيه ؟؟ فى الحديد ؟؟ ما تقدرش... فى السياسة ؟؟.. و إنت فى لجنة السياسات ؟؟ يبقى مالكش فيها برضه..طب من مجلس الشعب ؟؟ برضه لا...يبقى تقعد فى جنب...أخرك إيه ؟؟؟ تلعب كورة..مش حتسد مع الأهلى على بال ما ربنا ما يشفى الزمالك..يبقى إنت مش هتلعب..لا تلعب 7.لا تحلم رغم انه طبقا لمحمد منير..لو بطلنا نحلم نموت...إلا إننا فعلا ميتيين طبيعى يا ريس... و الحلم مالوش لازمة فى نومتنا..و لا موتتنا...و بعدين بيقولك واحد نام متأخر لقى الحلم بدأ والتانى نام فى سرير ابنه الصغير شاف الحلم كارتون... الكارثة إنك ممكن تحلم حلم أكشن أو رعب و يكون كبير عليك...و لو حاولت تحقيقه.. حتلاقى نفسك لسه بتحلم..و تقلب بكابوس يا باشا..كابوس...لا تحلم 8.لا تتألم ما بقاش فيه إحساس..والناس عموما إتعلمت تكبر و تنفض وتحلق... مهما كانت المعاناة مهما كانت المصايب..لذلك مهما قاسيت وعانيت لا تتألم.. على إعتبار إنك مش حاسس...لان ألمك ده مش هيفرق أى حاجة مع أى حد ...إبتعد عن كل ما قد يؤلمك..بلاش قناة الجزيرة.. و خليك مع كليبات نانسى و هيفا وشاكيرا.. لأن ألمك وحده مش كفاية مالوش لازمة ولا داعى...فلا تتألم 9.لا تقرأ بقالنا كام سنة بنقرا ؟؟.. عملنا إيه بيها..إتعلمنا إيه ؟؟.. و فى هذه الحقبة الزمنية المنسية لن تزيدك القراءة المحترمة للكتابة المحترمة إلا هما و غماً... و مهما كانت محاولات تصدير السعادة لنفس القارئ..الا أن الظروف الراهمة لا تصدر الا الألم فتتألم رغم الوصية السابقة بتاعة لا تتألم السعادة يا أستاذ بقت أغلى من حديد عز الدخيلة..لذلك ريح دماغك... و لا تقرأ...إلا الفاتحة على أرواح أحبابك... و طبقا لاخر وصية..يبقى خلاص فضوها سيرة و سيادتك مشكوراً تقفل الصفحة بتاعة الموضوع ده و تخرج منها على بال ما تنسى الوصية دى......على موبايلات بقى ماشى 10.لا تهتم لا تهتم بأى شىء يكتب أو يقال فى أى موضوع وفى أى منتدى وياريت كمان متردش هتتعب نفسك ليه وتتناقش وترد ما كفاية تتفرج زيك زى غيرك ما إنت بتلاقى 300 واحد دخلوا شافوا الموضوع و2 أو 3 بس اللى ردوا وبعدين أكيد اللى قاعد يكتب الموضوع الطويل العريض ده واحد فاضى وبيتسلى ومش قاصد منه أى حاجة مفيدة يبقى هتوجع دماغك معاه ليه وتشاركه الحوار ........ لا تهتم على فكرة يا جماعة ده طبعا مش واقع ولا كلام بجد...ده مجرد كلام ساخر بيعبر عن أوضاعنا اللى بقت تصعب على الكافر والهدف منه مش النقض وبس الهدف تغيير التفكير والأوضاع ... علشان مش كل واحد يدخل الموضوع يرد ويكتب لا حول الله يا رب إيه الإكتئاب ده والدنيا مش سودة قوى كده وإنت يا عم مزودها قوى ولازم نعرف إنه مهما طال الليل سوف يأتى يوم وتشرق فيه الشمس 
|
|
#2
02-10-2009, 11:17 AM
|
||||
|
||||
دى كده متبقاش عيشه لوده نظام العيشه فى مصر
|
|
#3
02-10-2009, 09:05 PM
|
||||
|
||||
|
يا اخى حرام عليك
__________________
 يارب اجعلنى اطير الى الهندسة
|
|
#4
04-10-2009, 01:25 PM
|
||||
|
||||
|
فعلا والله عندك حق
|
|
#5
10-10-2009, 09:46 PM
|
||||
|
||||
|
نشكرك وننتظر اليوم الذى ستشرق فيه الشمس
__________________
اللهم اغفرلى ولوالدى وللمؤمنين يوم يقوم الحساب ._(يارب أحصل على الامتياز) كل من يقرأ يقول أميييين ***اللهم ثبتنى على دينك*** *اللهم ارزقنى الشهادة فى سبيلك* *وادخلنى الجنه مع حبيبك ورسولك(صلى الله عليه وسلم) 
|
 |
| العلامات المرجعية |
«
الموضوع السابق
|
الموضوع التالي
»
العرض العادي
|
|
جميع الأوقات بتوقيت GMT +2. الساعة الآن 10:38 PM.
