حرق قش الرز والانحباس الحرارى

[حـHoSaMـسام]

النهاردة ومن اربع ايام فاتوا الجو حر جدا ومليان غبار قعدت اسأل اية اللى عامل فى الجو كدة وعرفت فى الاخر ان دة من اسباب حرق قش الرز . الجو دة بيعطل خلايا التفكير فى المخ . طيب وبعدين الناس دى بتحرقوا لية طيب ما ممكن يرموة فى اى حتة اكتشفت ان الفلاحين ليهم اسبابهم يعنى مش بيحرقوة من غير سبب . طيب اية هى الاسباب ؟
1- يتخلصوا منة
2- الجو يبقى حر عشان يمنع المحصول من الصقيع
3- الحشرات اللى بتهدد المحصول تموت
4- وان الحكومة مش عاملة خطة للتخلص من قش الرز
5- بتساعد فى خصوبة التربة
وعلى طالبة من الفلاحين إنهم يشيلو قش الرز ويحطوه على رؤوس الغيطان بتاعتهم وهما هيشيلوها ويدو لكل فلاح بدل القش علف للمواشي وفعلا نفذ بعض الفلاحين ده السنة اللي فاتت ولكن الحكومة مدتلهمش حاجة وحرقت برضه القش بس في الصحرا
طيب الناس تعمل اية بالقش لو متحرقش . لقيت انا وبدور على النت حل للمشكلة دى . ان ممكن القش دة يستخدم ويتعمل منة

1-علف للماشية (من المعروف إنه بيجيب نتايج عالية ويساعد على التسمين)
2- يدخل فى صناعة الخشب
3 - يدخل فى صناعة الكرتون
4 - يطلع منة غاز طبيعى الفلاحين يستخدموة بدل الانابيب

ودة طبعا هيقلل الاصابة بالربو والامراض التنفسية و هيمنع التلوث وهيشغل ناس ويجيب فلوس .
والناس ممكن تعمل كدة بالجهود الذاتية من غير ما تستنى الحكومة او خواجة يجى يشترى القش دة .
ممكن كل عمدة فى قرية يجتمع بالمزارعين ويقولهم ياجماعة احنا نشترك ونعمل مصنع كرتون او خشب او علف ويشغلوا فية شباب القرية العاطل او يتفقوا مع وزارة البترول ويبعوهولها . حتى لو مش عشان الجو والناس عشان ولادهم ميتعبوش . الامراض كترت والناس مش ناقصة بدل ما ندفع الفلوس فى العلاج ندفعها فى الاستثمار والمحافظة على البيئة . نهايتاً حبيت اقول حلول ودى لينكات لبعض المشاريع اللى ممكن تتعمل :

http://www.alkherat.com/vb/showthread.php?t=1422
http://www.eeaa.gov.eg/arabic/main/env_recycling_rice.asp
http://www.afkaaar.com/html/article135.html

والمطلوب مننا كمجتمع مدنى اى حد يقرا المقال بتاعى ومهتم بالموضوع دة وعايز يعمل حاجة يروح للقرى اللى جنبة ويحاول يقابل العمدة ويشرحلة والفكرة ويشوف يمكن يغير حاجة . انا نفسى كلمت اصحابى اللى فى القرى اللى جنبى ولكن للأسف كانوا حرقوا خلاص وملحقتهمش

شكراً ليكم