تشتغل جاسوس؟؟؟ " مرتب مغري ........... $

[msamido]

.
.
<div align="center"></div>
"مطلوب شاب في مقتبل العمر.. محبط.. يعاني من اكتئاب ويأس.. فشل في تجاربه العاطفية -سوسن خانته واتجوزت بداله "زكي وزة" الميكانيكي!-.. حاصل على بكالوريوس أو ليسانس أو لسه طالب بس عارف إنه هيكون عاطل.. حاول يشتغل في كذا شغلانة وفي كل مرة يفشل.. جرب الانتحار مرتين وبرضه فشل! -لما رمى نفسه من فوق الكوبري اتعلق في مسمار، ولما حط نفسه قدام أتوبيس نقل عام كانت الفرامل لسه جديدة!-.. استموت عشان يعرف يهاجر أمريكا.. الفيزا طلعت مضروبة!.. استقتل عشان يروح يشتغل في الخليج.. الكفيل طرده من قبل ما ييجي!..


الراتب مجزي جدا.. يقدر بملايين الدولارات ومعاها كل ما لذ وطاب من مشهيات "يعني إنت وخيالك!".. الوظيفة بسيطة جدا وتتلخص في كلمة واحدة..."

<div align="center">جاسوس!</div></span>



لو قرأت الإعلان ده في يوم من الأيام.. توافق؟!

***

هاه فكرت كويس..
***

مستعد تجاوب
***

خد نفس عميق "هيييييييييه".. من جوه.."هيييييييييييييييييييه"
***

الإجابة هي "..........."
طب ممكن قبل ما تجاوب نتكلم مع بعض شوية؟
***

ممكن نسألك سؤال الأول..
إنت شفت نفسك في الإعلان؟


يعني حسيت إنه لمس جزء فيك وفي حياتك.. افتكرت "سوسن" -اللي اتجوزت "زكي وزة" خلاص عرفنا!- والجامعة والدراسة والمستقبل غير المشرق والحياة اللي مش طايقة نفسها واللي على طول مصدرة لك وش الاكتئاب والنكد؟!

لو شفت نفسك في الإعلان.. مش عيب خالص..
ماهو إنت جزء من ناس كتير بيعانوا من نفس الأعراض دي..

بس ممكن فعلا تفكر وإنت في الظروف الفل دي وتعاني من كل الأمراض النفسية الممكن تصورها وفوق ده وده عاطل وخالي شغل..

ممكن لو في الظروف دي.. تشتغل.. بس على بلدك؟!

<div align="center"></div>

ممكن ماتمسكش المسدس ولا تلبس نضارة سودا ولا تغير تسريحة شعرك فتجيبه من اليمين للشمال بدل ما كنت بترجعه ورا -تمويه يعني- ولا أي حاجة من الحاجات دي اللي بتشوفها في أفلام الجاسوسية..

لأ.. ممكن حتى ماتسافرش بره مصر.. تفضل قاعد فيها.. بس عينك على كل اللي فيها.. تنقل كلام الناس وهمسهم.. وتقبض فـي الآخر بالدولار ومزاجك عال العال؟

ييجي لك قلب تعمل ده؟

عارفين إنه ممكن بعضكم يكون بيضحك في سخرية دلوقت وهو بيقول:
"ناقص ألاقي "يوسف شعبان" طالع من بين الصفحات ويحط إيده على كتفي ويقول: "مصر محتاجة ليك يا رأفت"!

طب ما هي مصر محتاجة ليك فعلا.. ولو كل واحد في البلد ظروفه وحشة والدنيا معانداه، كان زمان مصر كلها مليانة جواسيس!

<div align="center"></div>

احنا مش بنقول كلام منفصل عن الحياة ولا عن الواقع الصعب اللي كتير من الشباب بيعانوه..

بس السؤال هنا هو..

صحيح لو كانت الظروف وحشة فده مبرر لإنك تنقلب على وطنك ودينك؟!
لو جواك طاقة سلبية تجاه بلدك تخليها زي ما هي ولا تحولها لإيجابية وازاي؟

<div align="center"></div>

اقرأ الإعلان من أول وجديد وجاوب لنا على السؤال...

تقبل الوظيفة وتشتغل على بلدك؟
ورد عليا وقولي رأيك إيه

.
.


السلام عليكم ورحمة الله وبركاته

حقيقة لقد افتقدتكم جميعا بين صفحات المنتدي كما افتقدت كل شئ في حياتي الملكية خلف أسوار مركز تدريب المشاة رقم 3
ولكن بين الحين والأخر أعود لكم لأشارك معكم صفحاتكم واستمتع معكم بوجودي بينكم وبين صفحات هذا المنتدي
واليوم وضعت بين أيديكم موضوع قرأته واعجبني اسلوبه وفكرت ان أضعه بين أيديكم لتشاركوني أراءكم وسأضع بين أيديكم بعض تعليقات القراء لهذا الموضوع لنتشارك الحديث حولها أيضا ولكن في بضعة أيام قليلة لا تتعدي الخمسة أيام هي كل ما أملك خارج أسوار الحياة العكسرية والأن مع التعليقات

والله لو هيدونى الفانوس السحرى بتاع علاء الدين مش ممكن اخون اهلى وبلدى وناسى ليه هما اللى حاربوا فى1956و1963 1973 احسن منى فى ايه
<div align="left">عبد السلام </div>

تصدق أنا فطست على نفسى من الضحك أول ما قرأت المقدمة لأنها تنطبق عليا تماماً بس الحمد لله ماحاولتش أنتحر لأن الأنتحار كفر بس نفسى بقى بدل ما أنتحر أسافر العراق أو فلسطين أو أفغانستان أفجر نفسى فى العلوج أهو أموت شهيد أحسن ما أموت كافر بس للأسف ديه كمان مش هقدر عليها لأنى معيش حق السفر وأصلاً معييش حق الميكروباص اللى هيروحنى النهاردة ... هيييييه دنيا .. معكش 50 قرش سلف . كنت عايز أقول كمان لازم علشان الواحد يحب بلده لازم بلده تديه الأول مينفعش هو يديها الأول ، يعنى بالبلدى كدة لازم الأم ترضع إبنها وترعاه علشان هو لما يكبر يحبها ويرعاها لكن لو أمه جوعته وإديته بالجزمة أكيد هو برضو لما يكبر هيديها ستين جزمة ... مش كدة وله إيه !!!؟
<div align="left">Y A S S I E N </div>

<span style="color:#990000">شكلي جيت متاخر.....كل مرة كدا حظي بيبقي وحش وباجي متاخر معقولة ممكن اشتغل جاسوس وكل الناس اللي قبلي دوله مقدمين اوراقهم؟؟؟ اكيد برضو هفشل..... مش مشكلة اقدم ورقي وخلاص...ما انا طول عمري بعمل كدا..يمكن ربنا يسهلها وواحد من اللي قبلي يموت ادخل مكانه المهم الاوراق المطلوبة ايه غير 1_ شهادة بكالوريوس هندسة 2_ شهادة ميلاد وجنسية مصرية 3_ اب وام مصريين 4_ معندوش واسطة تشغله 5_ معهوش فلوس يدفع رشوة عشان يشتغل 6_ ليه قصة حب فاشلة 7_ خبرة اكتر من 7 سنين في الجلوس علي القهاوي والكافتريات بجميع طبقاتها 8_ جرب كل حاجة يخدم بيها بلده ومنفعش 9_ ذو دراية تامة بالسيرة الذاتية لرجال الاعمال ونواب القروض واعضاء مجلسي الشعب والشوري 10_ متابع جيد للتحقيقات مثل اكياس الدم الفاسدة وغرق العبارات وأحتراق القطارات ومرض انفلونزا الطيور وحوادث الطرق والسيارات ناسي ايه ...ناسي ايه كمان؟؟ حد يفكرني يا جماعة الله يكرمكم عشان ميرجعونيش بورقي تاني
<div align="left">طلب وظيفة جاســــــــــــوس </div>

والأن أنتظر ردودكم واراءكم

شكرااااااااااااااااا
.
.