أمك مش أمك .. شعر/ سمير الأمير

[Samir Elamir]

أمك مش أمك
شعر/ سمير الأمير
*********************

أمك ضربها السلك خدها أبوك مقص
ولا حد حس,
ولا حد قال عيب ع الرجال
يا خدو الحريم بالغصب
سوا ف الحرام أو ف الحلال
أمك حتعمل فيها حد مهم جدا
علشان تجيب حق انكسارها وذُلها
وتجيب كمان حق الليالى السوده
وسنين فقرها
أمك قدرها تكون كده
متعذبه ومتنكده وصباحها هم
كما أى أم فى أى ريف رماه الانتظار
وكمان قدرها تكون جريئه لوحدها
عشان أبوك يعمل لها ألف اعتبار
وعشان كده حست براسها فى السما
وهى وسط المحكمة
ساعت ما ابوك اتخض من شكل القفص
وطب راكع يسترجى عطفها
ويقول لها أنا وانتى واحد يا مرّه
والله راجل مسخره
عرِّفت ابوك؟
أمك ضربها السلك
خدها ابوك وروح من زمان
وانت اللى قاعد لسه تستنى اللى جاى
ياباى عليك.. مستنى مين ؟

ماعدتش جاى غير الطوفان
بلدك ضربها القهر..لخبطت العجين
وشاخ أبوك قبل النهاية بكلمتين
إسمك وسنك ! والسؤال
هل سبق إنك قريت البخت
أو لبخت وقريت أى حاجه؟
أمك مش أمك
شعب مصر كمان ماعداش م الكمين
ويكون فى علمك شعب مصر ما هوش أبوك
والمضروبين على قلبهم بالسلك مش سالكين