ـ علشان ( نفلح ) لازم ( نقلع ) !! ـ

[Specialist hossam]

كان يا ماكان ,
في ( حاضر ) العصر و الأوان ,

كثرت حوادث السرقة و ( التثبيت ) ,
و كَثُرَ البلطجية ولاد ( ستين تيت ) ,

و كان البلطجية و ( الحراميين ) ,
بيخبوا المطاوي و السكاكين ,
تحت الهدوم في مكان أمين ,

و لما الحرامي يقترب من الضحية ,
يطلع السكينة المستخبية ,
و يهدد , و يسرق , و تنتهي العملية ,

و بعد البحث و التمحيص ,
و الفحص و ( التفعيص ) ,

توصل السيد ( المحروس ) ,
المتحضر ( المُسأَّف ) صاحب الفلوس
لحل ما يوصل له بقر و لا جاموس !!

قال لك : سيبنا من ( تقاليد ) الأمس و هنبدا من اليوم ,
نمشّي الناس في الشارع من غير هدوم ,

و بكده لا هيقدر قُرَني و لا عَطوة
يخبّي في هدومة سكينة و لا مَطْوة

و هنعيش في سلام و أمان ,
و يبقى منظرنا ( متحضر ) و آخر جنان ,
و طالما ( قَلَعْنا ) يبقى أكيد هنطلع القمر كمان !!

ـ
...........


ملحوظة :
ما حدش يستغرب من القصة و الحل الذكي ده ,
لأني لسه سامع حل ذكي من أحد ( المُسأّفين ) بيقول : إننا لازم نمنع النقاب علشان نمنع المجرمين من التخفي في هذا الزي !!
و كأن أساس المشكلة قد انتقل من مطاردة المجرم إلى مطاردة الزي الذي ( يُظن ) أن ( بعضهم ) قد يتخفى فيه !!!
و الجدير بالذكر إن الحرامية دول غلابة ,
لو منعوا النقاب هيحطوا إيدهم على خدهم و هش هيلاقوا طريقة تانية للسرقة و النصب

متهيأ لي برضه لازم يمنعوا الصعاية من التلفيعه بالعمامة ,
و يمنعوا الناس تلبس نظارة شمس مع كاب على راسهم ,
و بالمرة فيه مجرمين بينتحلوا صفة ظابط شرطة و يسرق أو ينصب على الناس بلبس الشرطة ,
أنا بقول برضه يمنعوا الشرطة من لبسهم علشان فيه بعض المجرمين بيتخفوا فيه !!! . . . . .


الحمد لله الذي عافا عقولنا من العفن الذي أصاب عقولهم
منقــــــول