حب ايه اللى انت جــــــاى تقول عليه؟؟..

[Specialist hossam]

السلام عليكم ورحمة الله وبركاته

كل عام انتم الى الله اقرب وعلى طاعته ادوم واحرص

عيد أضحى مبارك


متنسوش بقى الاخوة يحاولوا الاعتكاف فى المسجد قدر المستطاع للدعاء والاستغفار

ولا تنسوا التكبيــــــر عقب الصلوات الذى بدأ من بعد صلاة الفجر اليوم

وطبعــــــــــــا صائميـــــــــــن

تقبل الله منا ومنكم

والأخوات .... انشغلن والاستغفار

وطبعا احتسبوا الأجر فى تجهيز الطعام بتجديد النية

المهم

اليوم

انقل موضوع كتبه اخ فاضل أحبه فى الله

جزاه الله خيرا ونفع به

الحب

حب ايه اللي انت جاي تقول عليه ؟؟ ...إنت عارف أبله معنى الحب ايه ؟؟

حتة (ملحوظة رفيعة) قبل ما تبدأ : الكلام الجاي ده موجه للجنسين .. رغم إنه مكتوب بصيغة الخطاب للمذكر ..


خلاص ؟؟ نبدأ بقى ...


كتير من الناس .. خصوصا الشباب –شباب بقى ما إحنا كنا شباب – بياخذ على دماغه كتير من تحت راس حاجة اسمها ... الحب !!


اللي حب واحدة و سابته –و راحت تجيب أومو – و اللي حب واحدة و بعتته على الـ recycle bin


أو نفضت له خالص و ادتله : shift+delete


و الحال نفسهه مع الشابات طبعا –عاملة ايه يا شابة –


المهم إن كلهم في الآخر بياخدوا (البمبة) التمام , و بيجيلهم ( إحباط في المطاط ) و يتنيلوا على عينهم يكتئبوا و يبكوا على الأطلال .. و يسيبوا الأعداء من (قبيلة أوروبا و القبائل المتقدمة) يجمعوا الغنائم و يتقدموا و يتطوروا ... و احنا قاعدين نعيط !!!

يبقى اسمه حب ده يا مرسي ؟؟


بص يابني ... انت فعلا شكلك مش عارف معنى الحب ايه ..!!


بص .. بصيت و لا لسه باصص من المرة اللي فاتت ؟؟


احنا هنتكلم الأول على (اللي مش حب) و بعد كده نتكلم عن (الحب) ... و بضدها تتميز الأشياء .


آه .. طبعا إحنا هنفرض حسن النية .. و إنك مش بتشتغل (بنت الناس) دي , و لا بتاكل بعقلها (جبنة رومي) و طبعا هي كمان .. يعني ما فيش ولا واحد منكم (بيشتغل) التاني ... الشيطان بس هو اللي بيشتغلكم انتم الاتنين .. و بياكل بعقلكم (سكالوب بانيه) –و الله ما أعرف هو ايه .. كل اللي أعرفه إنه حاجة بتتاكل – خلاص ؟؟ و مش عاوزك تقفل مني و لا تزعل من أولها ... ماشي ؟؟


بسم الله ...

فيه واحد (قبلية أوروبا) –اللي كانت بتلم الغنائم في أول الكلام - اسمه الفيلسوف البريطاني هربرت سبنسر حلل عاطفة الحب إلى عدة عناصر .. هي : (الشعور بالجمال.. الانجذاب.. الدافع الغريزي.. الاعجاب والاستحسان.. التقارب النفسي والألفة والصفاء والمودة)


فالعملية بتبدأ بـ... بالكلام الكتير اللي قال عليه ده .. و المفروض تنتهي بالجواز –طالما فيها الغريزة , و دي المفروض إنها النهاية الطبيعية -


يعني بدايتها إعجاب و تعلّق .. و التعلق ده هو اللي احنا بنقف عنده هنا ... و نقول عليه حب , و اللي كانوا أيام زمان بيقولوا عليه (عشق الصور)


أول حاجة .. الإعجاب :


لما تشوف , أو تتكلم , أو تقرأ لواحدة و يعجبك شكلها أو طريقة كلامها أو كتاباتها المنفتحة أو القريبة من شخصيتك أو أي حاجة تانية ..

طيب ما الإعجاب ده عادي !!

و ممكن يحصل بينك و بين ولد زيك أو بنت و بنت تانية أو انت و أستاذك , أو بين كبير أو صغير أو تخين أو رفيع أو ... أو بين أي حد ..


زي ما يكون واحد زميلك شخصيته عاجباك و بيقدر يتحكم في نفسه فانت طبيعي تُعجب بشخصيته – و ليس به كشخص - , أو المدرس أو المحاضر بتاعك راجل محترم مثلا و علمه غزير و (آينشتاين زمانه) فطبيعي إنك تُعجب بعلمه – و ليس بشخصه برضه- , طيب إشمعنى يعني البنات أو الجنس الآخر هو اللي الإعجاب بيه بيبقى خطر ؟؟


ما أنا سأُعجب بحاجة في شخصيتها برضه زي واحد زميلي أو أستاذي ..


ايه بقى اللي يخليك تفكر إن الإعجاب سيتعدى إلى الإعجاب (بشخصها) و الموضوع (يفتح مني) و ما يبقاش عادي ؟؟


أقول لك يا سيدي .. ده لأن الشيطان لازم (يسيب بصمته) –ما هو مش أقل من أسمنت أسيوط -


و الدليل على كلامي حديث رسول الله –صلى الله عليه و سلم- : "إن المرأة عورة, فإذا خرجت استشرفها الشيطان, وأقرب ما تكون من وجه ربها وهي في قعر بيتها ."


رواه الترمذي في سننه, وابن حبان وابن خزيمة في صحيحيهما عن عبد الله بن مسعود .


ومعنى استشرفها الشيطان كما في تحفة الأحوذي شرح سنن الترمذي : أي زينها في نظر الرجال ، وقيل : أي نظر إليها ليغويها ويغوي بها . والأصل في الاستشراف : رفع البصر للنظر إلى الشيء وبسط الكف فوق الحاجب. والمعنى أن المرأة يستقبح بروزها وظهورها ، فإذا خرجت أمعن النظر إليها ليغويها بغيرها ، ويغوي غيرها بها ، ليوقعهما أو أحدهما في الفتنة ، أو يريد بالشيطان : شيطان الإنس من أهل الفسق ، سماه به على التشبه . اهـ .


يعني أي (محسوسيات ) منك تجاهها هتكون (متحبشة بالصوص الشيطاني )


فلما الشيطان يقوم بدوره .. العملية بتنتقل للمرحلة التالية ... ألا و هي (التعلق) أو (عشق الصور) ... و دي حاجة سهلة خالص .. مش عاوزة شيطان كمان .. و أقول لك ليه ..

.
.
.
.

<<<يُتبع

[Specialist hossam]

.

.

فلما الشيطان يقوم بدوره ..

العملية بتنتقل للمرحلة التالية ...
ألا و هي (التعلق) أو (عشق الصور) ...
و دي حاجة سهلة خالص .. مش عاوزة شيطان كمان ..
و أقول لك ليه ..

فاكر جنابك لما كنت لسه في مرحلة (بامبرز امتصاص أكثر ) ؟؟
و عايش في (حضن ماما) ,
و كل من هب و دب في (العيلة الكريمة) قارفينك في عيشتك من البوس اللي (بيلزق) ,
و الحضن اللي (بيوجع) و الحاجات دي ؟؟

و أول ما تقريبا وصلت الثانوي –أو حسب الظروف عندكم- و (شنبك خط في وشك) و بقيت (شحط قد الدنيا) .. هتلاقي عملية الأحضان و البوس و العواطف دي قلت قوي –ده إذا السيد الوالد ما بقاش يديلك باللي في رجله - , يعني من الآخر .. العاطفة اللي كنت غرقان فيها و انت طفل كلها تقريبا (ذهبت مع الريح) .. و انسحبت منك مرة واحدة ... –و ده للأسف غباء مستحكم في الثقافة بتاعتنا لما الواحد يبقى قرّب يبقى راجل .. ما حدش بيعبره زي زمان – فالطبيعي إن حاجة سحبوها منك , سيكون قلبك (فارغا) يبحث عما فقد , يمكن يلاقيه عند أي حد .. و يسد بيه الفارغ اللي جواه ده .. –ده بطيب نية طبعا , و بطريقة تلقائية لا واعية- , فالشيطان بكل بساطة مجرد يقول له : شوف البنت دي .. دي (مؤدبة جدا جدا) و أفكارها و ميولها زي أفكارك ..
أكيد هي دي (خميسة .. برنسيسة أحلامك) ,
و طبعا قلبك (الفارغ) لما يصدق يسد الفراغ الي جواه –بشكل لا واعي- فيخلي جنابك ما تستحملش الفرحة و تروح (حابب على نفسك) على طول .. كما يقول الشاعر :

أتاني هواها قبل أن أعرف الهوى *** فصادف قلبا خاليا فتمكنا

ويقول ابن القيم رحمه الله: "القلب إذا أخلص عمله لله لم يتمكن منه العشق فإنه يتمكن من القلب الفارغ"

فيروح حبها (مكلبش) جوه قلبك , و تحس (بالشوق و عذابه و ناره) لما تغيب عنك , و أما تكون بعيدة تقعد (تحضر كلام تقوله) , و لما تكلمك –الكلام العادي في مجال العمل مثلا أو تقرأ كلامها في المنتديات مثلا أو ... – تحس إنك (طير في الهوا) و إن الفرحة مش سايعاك ..

هو ده بقى الحب (يا مرسي) .. قصدي .. (العشق المحرم) –لازم العشق معاها المحرم و هتعرف ليه- ,

قال ابن القيم - رحمه الله - :

العشق هو الإفـراط في المحبة ،
بحيث يستولي المعشوق على قلب العاشق ،
حتى لا يخلو من تخيُّلِه وذِكره والفكرِ فيه ،
بحيث لا يغيب عــن خـاطـره وذهنه ،
فعند ذلك تشتغل النفس بالخواطر النفسانية فتتعطل تلك القُوى ،
فيحدث بتعطيلها من الآفات على البدن والروح ما يَعُـزُّ دواؤه ويتعذر ،
فتتغيّر أفعاله وصفاته ومقاصده ،
ويختلُّ جميع ذلك فتعجـز البشر عن صلاحه ، كما قيل :

الحـبُّ أولُ ما يكـون لجاجـةً *****تأتي بـه وتسوقــه الأقدار

حتى إذا خاض الفتى لُججَ الهوى*****جـاءت أمـور لا تُطاق كبار

والعشق مبادئه سهلةٌ حلوةٌ ، وأوسطه همٌّ وشغلُ قلب وسقم ، وآخره عَطَبٌ وقتلٌ . إن لم تتداركه عنايةٌ من الله كما قيل :

وعش خاليا فالحب أوله عنى **** وأوسطه سقم وآخره قتل

وقال آخر :

تولّهَ بالعشق حتى عَشِق ***** فلما استقل به لم يُطِقْ

رأى لجةً ظنها موجـةً ***** فلما تمكن منها غَرِق

والذنب لــه ( أي للعاشق ) ، فهو الجاني على نفسه ، وقد قعد تحت المثل السائر : يداك أوكتا وفوك نفخ . انتهى كلامه - رحمه الله - .

-عارف إنك مش فاهم آخر جملة دي .. يعني يداك ولعت النار ... و بقك نفخ فيها خلاها تشعلل –

و طبعا أضرار التعلق بـ(حبيبة القلب) دي كتيرة جدا ..

قال محمد بن أبى بكر الدمشقي ( إن آفات الدنيا والآخرة أسرع إلى عشاق الصور " عشاق الحب العاطفي "من النار فى يابس الحطب)

وقال أخر:- ( العشق الحرام بمنزلة الهادم للأبدان... إن وقعت فيه قتلك وإن أكثرت منه قتلك)

و لله در العلامة ابن القيم حين قال وهو يتحدث عن هذه المفاسد فقال :

أحدها : الاشتغال بحب المخلوق وذكره عن حب الرب تعالى وذكره ، فلا يجتمع في القلب هذا وهذا إلا يقهر أحدهما الآخر ويكون السلطان والغلبة له .

الثاني : عذاب قلبه بمعشوقه ؛ فإن من أحب شيئاً غير الله عُذّب به ولا بد كما قيل :

فما في الأرض أشقى من محب *** وإن وجد الهوى حلو المذاق

تراه باكياً في كل حين *** مخافة فرقة أو لاشتياق

فيبكي إن نأوا شوقاً إليهم *** ويبكي إن دنو حذر الفراق

فتسخن عينه عند الفراق *** وتسخن عينه عند التلاقي

والعشق وإن استعذبه صاحبه ؛ فهو من أعظم عذاب القلب .

الثالث : أن العاشق قلبه أسير في قبضة غيره يسومه سوء العذاب ، ولكن لسكرة العشق لا يشعر بمصابه .

الرابع : أنه يشتغل به عن مصالح دينه ودنياه فليس شيء أضيع لمصالح الدين والدنيا من عشق الصور

الخامس : أنه ربما أفسد الحواس أو بعضها إما إفساداً معنوياًُ أو صورياً . أما الفساد المعنوي فهو تابع لفساد القلب ، فإن القلب إذا فسد فسدت العين والأذن واللسان ، فيرى القبيح حسناً منه ومن معشوقه ، فهو يعمي عين القلب عن رؤية مساوئ المحبوب وعيوبه ... اهـ رحمه الله .-

شايفة بقى القمـر يا ليلى .. قصدي شايف بقى (الحب و سنينه) ؟ -اللي هو العشق يعني .. احنا لسه ما اتكلمناش على الحب خليك فاكر - .. عاوز تصدق أكثر إن ده مش اسمه حب .. و إن ده تعلق و عشق بس .. ؟؟؟

هات ورقة و قلم .... و جاوب السؤال التالي :

السؤال هو : اذكر 5 عيوب في (الجيرل فريند ) بتاعتك .. !!!

اذكر يا معلم .. و لا مش عارف ؟؟ !!

شفت بقى ؟؟ ما هم قالوا من زمان .. اسمع قالوا ايه :

كانوا يعرّفون العشق فيقولون أنّه: "الميْل الدائم بالقلب الهائم، وإيثار المحبوب على جميع المصحوب، وموافقة الحبيب حضوراً وغياباً، وإيثار ما يريده المحبوب على ما عداه، والطواعية الكاملة، والذكر الدائم وعدم السلوان.." ويترتّب عنه "عمى القلب عن رؤية غير المحبوب، وصَمَمهُ عن سماع العذل فيه". –العذل يعني اللوم , يعني ما يصدقش إن له عيوب , أو شايف محاسنة أكثر من عيوبه- ,

وأما دواء هذا الداء العُضال :

فقال فيه ابن القيم - رحمه الله - : ودواء هذا الداء القتال أن يعرف إن ما اُبتُليَ به من هذا الداء المضاد للتوحيد ؛ إنما هو مِن جهله وغفلة قلبه عن الله ، فَعَلَيْهِ أن يعرف توحيد ربِّه وسُننه وآياته أولا ، ثم يأتي من العبادات الظاهرة والباطنة بم يشغل قلبه عن دوام الفكرة فيه ويُكثر اللجأ والتضرع إلى الله سبحانه في صرف ذلك عنه ، وأن يرجع بقلبه إليه وليس لـه دواء أنفع من الإخلاص لله ، وهو الدواء الذي ذكره الله في كتابه حيث قال : ( كَذَلِكَ لِنَصْرِفَ عَنْهُ السُّوءَ وَالْفَحْشَاء إِنَّهُ مِنْ عِبَادِنَا الْمُخْلَصِينَ ) فأخبر سبحانه أنه صرف عنه السوء من العشق والفحشاء من الفعل بإخلاصه ، فإن القلب إذا خلص وأخلص عمله لله لم يتمكن منه عشقُ الصور ؛ فإنه إنما تمكن من قلب فارغكما قيل :

أتاني هواها قبل أن أعرف الهوى *** فصادف قلبا خاليا فتمكنا

وليعلم العاقل أن العقل والشرع يوجبان تحصيلَ المصالح وتكميلَها ، وإعدامَ المفاسد وتقليلَها ...

ومن المعلوم أنه ليس في عشق الصور مصلحة دينية ولا دنيوية ، بل مفسدته الدينية والدنيوية أضعاف ما يُقدّرُ فيه من المصلحة ، فـليس شـيءٌ أضيعُ لمصالح الدين والدنيا من عشق الصور :

أما مصالح الدِّين فإنها منوطة بِلَمِّ شعث القلب وإقباله على الله ، وعشقُ الصور أعظم شيءٍ تشعيثا وتشتيتا له .

وأما مصالح الدنيا فهي تابعة في الحقيقة لمصالح الدين ، فمن انفرطت عليه مصالح دينه وضاعت عليه ؛ فمصالح دنياه أضيع وأضيع . انتهى كلامه - رحمه الله - .

اممممم –أنا باكل بقّي و لا ايه ؟؟ - متهيأ لي كده إحنا اتكلمنا على (اللي مش حب) كتير .. صح ؟؟

ندخل بقى على (الحب الحقيقي) ...

اللي (بيعيش يا حبيبي)

.
.
.يتبع

[Specialist hossam]

بص يا سيدي .. أول حاجة لازم تحطها في (نافوخك) و تحطها قدام عينك و انت بتتكلم عن الحب هي:

عن ابن عباس رضي الله عنهما أنَّ رجلاً قال: يا رسول الله! في حجري يتيمة قد خطبها رجل موسر ورجل معدم، فنحن نحبّ الموسر وهي تحب المعدم! فقال رسول الله صلى الله عليه وآله وسلم: "لم يُر للمتحابين مثل النكاح".
هذا الحديث أخرجه ابن ماجه والحاكم والبيهقي والطبراني وغيرهم.. وقال الحاكم: صحيح على شرط مسلم ولم يخرجاه.. والحديث حسن بمجموع طرقه.. وقد صحَّحه الشيخ الألباني رحمه الله في صحيح الجامع.

يبقى خلي بالك قوي من قوله –صلى الله عليه و سلم- : "لم يُر للمتاحبين مثل النكاح" .. هو ده الأصل اللي هنتكلم عليه ..

(حب = جواز) ...

و ليس ( حب = جواز + لما تُفرج )

و ليس (حب = جواز لما أمهد لأهلي)

و ليس (حب = جواز + بس لما نخلص الكلية ربنا يسهل)

مش لسه قدامك كتير لحد ما تكون نفسك و تجيب الشقة و المهر و اللذي منه .. !!!

لو مش في إيدك دلوقتي الجواز .. يبقى أحسن لك (تنسى يا عمرو) و تخليك يا (عمرو ذكي) و لا تتعلق بالوهم ..

هتقول لي هتقول لي دي (عروسة لُقطة) و مش هلاقي زيها بعد كده و و الله ناوي بجد ... هقول لك ماشي , النية عندك (دلوقتي) بس انت مش عارف الظروف (بعد كده) هتبقى شكلها ايه ؟؟ الظروف دي في المستقبل هتسمح للعلاقة إنها تكتمل في صورة زواج و لا لأ ؟؟

ممكن أهلها لا يصبروا .. ممكن انت حالتك تبقى أسوأ أكتر و تبقى عطلتها معاك , ممكن حاجات كتيرة ...

يبقى الأسلم إنك ما تفتحش قلبك غير لما تبقى قادر (الآن) و ليس (في المستقبل) إنك تفتح بيت ,

......

تاني حاجة لازم تقيس عليها العلاقة اللي انت بتقول عليها "حب" دي علشان تعرف إذا كانت حب و لا .. ملوخية

حديث رسول الله - صلى الله عليه و سلم - : " إذا تزوج العبد فقد استكمل نصف الدين ؛ فليتق الله في النصف الباقي "

يعني ايه ؟؟
يعني الجواز بيقطع نصف ذنوبك بحالها ... اللي كنت بتعملها قبل الزواج ..

ماشي .. يعني ايه برضه ؟؟

يعني المفروض إن مقياس الجواز إنه يقربك من ربنا و يخليك تبطل نصف الحاجات الغلط اللي كنت بتعملها ..

يعني ... لو ماكانتش (سكة الجواز) دي من أولها تقودك إلى طريق إكمال (نصف الدين) .. بقى مش هي دي الطريق الصحيحة ..

لأن الجواز ده .. رزق . .صح و لا غلط ؟

طيب الرزق هل يُطلب بطاعة الله أم بمعصيته ؟؟

بطاعة الله طبعا . .

قال رسول الله صلى الله عليه و سلم : "إن روح القدس نفث في روعي أن نفسا لن تموت حتى تستكمل أجلها و تستوعب رزقها فاتقوا الله و أجملوا في الطلب و لا يحملن أحدكم استبطاء الرزق أن يطلبه بمعصية الله فإن الله تعالى لا يُنال ما عنده إلا بطاعته "

يعني سكة الجواز .. لو كانت بدأت بطريق خلوة و تليفونات و شات و اشتغالات و حاجات غلط ..

ما تحاولش تقنع نفسك إنها هتبقى صح بعد كده ..

لأنك لو بتطلب الحب الحقيقي اللي نهايته الزواج ..

اللي هو رزق من الله ..

و الرزق لا يُطلب بمعصية الله ..

يبقى الطريق ده غلط ..

و دي اشتغالات مش حب ..

..............

بص يا أخي .. أنا عارف إني يمكن أكون عقدتك , أو قفلتها في وشك .. بس ليه ما تقولش إني بحاول أضعك أمام الحقيقة ؟؟

أنا معاك , و زيي زيك إني نفسي أحب و أتحب .. و ألاقي اللي تفهمني و أفهمها , دي حاجة طبيعية و رغبة عادية و مركبة فينا معشر البشر –حلوة معشر دي , حد يسقف لي عليها - , لكن كما يقول السلف : (من تعجل شيئا قبل أوانه ... عوقب بحرمانه !!) ...

الطفل الصغير مثلا ... حمادة ..- مش عارف حمادة ؟؟- لو شاف تفاحة حمراء و جميلة هيحب ياكلها .. صح ؟؟

بس هو لسه بيرضع , معدته لسه مش متعودة على التفاح .. و لسه مش وقت أكل التفاح ليه .. لو كل التفاحة و صمم , و هو لسه صغير .. ايه اللي هيحصل له ؟؟

بطنة هتوجعه لأن معدته مش متعودة لسة , و مش ده الوقت المناسب لسه .. .. يعني لو أكل قبل المعاد . هيبقى فيه نتيجة سلبية .. مش كده يا حمادة ؟؟ ايه ؟؟ مش بتردش ليه يا حمادة ؟؟ آه معلش .. نسيت إن اسمك مش حمادة .. اسمك توفيق !!!

فنصيحتي لك أخي .. خطوتين لناصية الشارع أو (للقمة) –لو كنت اسكندراني - و اشتري رزة و قفل ..

و اقفل قلبك و اقنع نفسك إنه لازم يبقى مقفول لحد ما ييجي الوقت المناسب لفتحه ..

و قاوم أي حد يحاول يفتحه أو (يفش القفل ) قبل الوقت ده ..

لأنه لو دخله حد قبل المعاد هيبوظه ..

و ما تخليش (المحسوسات) الحلوة اللي في أول العشق دي تحببك فيه ..

يقول أحدهم : "العشق جليس ممتع وأليف مؤنس وصاحب ملك مسالكه لطيفة ومذاهبه غامضة وأحكامه جارية ملك الأبدان وأرواحها والقلوب وخواطرها والعقول وآراءها قد أعطي عنان طاعتها وقوة تصرفها توارى عن الأبصار مدخله وعمي في القلوب مسلكه!"

فامسك نفسك ..

و (اعصر على نفسك لمونة) .. و اوعى تحب على نفسك لحد ما ييجي الوقت المناسب و الإمكانيات تبقى متاحة .. لتنفيذ ما قاله النبي : (و لم يُر للمتاحبين مثل الزواج)

ساعتها افتحه .. و هتلاقي إن شاء الله بنت الحلال المحترمة -مس ما تكونش مجنونة زي دي - اللي أحسن من اللي انت سبتها زمان .. لأنه كما يقول السلف (من ترك شيئا لله .. عوضه الله أفضل منه)

يقول ابن القيم: "وحسب قتيل العشق أن يصح له هذا الأثر عن ابن عباس رضي الله عنهما على أنه لا يدخل الجنّة حتى يصبر لله و يعف لله و يكتم لله , لكن العاشق إذا صبر وعفّ وكتم مع قدرته على معشوقه، وآثر محبة الله وخوفه ورضاه، هذا من أحق من دخل تحت قوله تعالى: (وأمّا من خاف مقام ربه ونهى النفس عن الهوى * فإّن الجنّة هي المأوى)"

"إنه من يتق و يصبر فإن الله لا يضيع أجر المحسنين"..

.. "وحين يصدق المسلم في حبه لله تعالى ورسوله صلى الله عليه وسلم فإنه يتحرّر به من ضغوط المادة، ودوافع الغريزة، ونزوات الذات، وألوان الوهن والضعف البشري، وتنتظم به حياته وفق قِيَم سماوية وموازين علوية.. فيتجاوز شوطه سنين هذه الحياة الدنيا إلى الرغبة في العيش الأبدي، وتسمو أهدافه على حرث الدنيا ومتاعها إلى نعيم لا يحول ولا يزول.

فحب المسلم لله ولرسوله حب رسالي مقدس: يجعل الشقاء سعادة في طاعتهما.. والسعادة شقاءً في عصيانهما.. والتعذيب راحة في سبيلهما.. والراحة عذاباً في مخالفتهما.. والموت حياة من أجلهما.. والحياة موتاً بدونهما: {قالَ ربِّ السجنُ أحَبُّ إليّ ممّا يدعونني إليهِ...}"

و كان فيه شريطين للشيخ محمد العريفي عن العشق ..

من أروع ما سمعت :

دواء العشاق

اعترافات عاشق

بس خلاص .. البندقية اتكلمت !!! قصدي .. خلص الكلام و البندقية اتكلمت ..

و لو ليك أي رأي أو تعليق .. تخرسـ.... قصدي .. اتفضل قوله .. احنا في بلد ديموقراطي ..

و أنا كلي (ودان) صاغية ..

و لو استفدت أي حاجة ... أرجوك ما تكسلش و لا تنسني من الدعاء ..
كلمتين بس, بي من قلبك الله يخليك .. قول "اللهم اغفر له و ارحمه و تب عليه و وفقه لما تحب و ترضى و أدخله الجنة و أجره من النار" آمين و لجميع المسلمين و المسلمات ..

منتظر تعليقاتكم على الموضوع
وان شاء الله هتوصل لكاتب الموضوع الاصلى

[نقاء الروح]

ما شاء الله
موضوع راائع جدا بل اكثر من رائع
ناقش فيه قضية مهمة جدا
والشغل الشاغل للشباب حاليا

وفعلا كل الكلام ال مكتوب بيحصل
والكتير بيتوهم انه بيحب !!
وهو فالحقيقة مجرد اعجاب لا اكثر او تعلق

ربنا يهدي الشباب جميعا يارب
وكل واحد يفضل متحكم فمشاعره ونبطل نرميها
فكل وقت ومكان تحت مسمى اني بحب !!
وهما فالحقيقة بيشتغلو بعض
وانا بفضل اسمي ال بيحصل دلوقتي
انه استهلاك رخيص لمشاعر ثمينة اودعها الله فينا
المفروض نوجهها لشخص واحد ال هو ربنا مختاره لينا
و فوقت محدد ،

وياريت نعي انه فيه امور اهم من الحب
لازم نهتم بيها ونحطها فبالنا

جزاك الله خيرا وكاتب الموضوع
وجعله الله في ميزان حسناتكم

[Specialist hossam]

وجــــزاكم مثله .

[Specialist hossam]

اللهم اهدنا واهدى بنا واجعلنا سببا لمن اهتدى

[**تسابيح**]

موضوع رائع
جزاكم الله خيراا

[Specialist hossam]

وجزاكم مثله

[مهند مقلد2]

بارك الله فيكم
وجزاكم الله خيرا
موضوع جميل جدا بس ياريت صاحبالموضوع يكمل ( يكتب الدواء لهذا الداء )
انتظر ....

[Specialist hossam]

المشاركة الأصلية كتبت بواسطة مهند مقلد2

بارك الله فيكم
وجزاكم الله خيرا
موضوع جميل جدا بس ياريت صاحبالموضوع يكمل ( يكتب الدواء لهذا الداء )
انتظر ....

وجزاكم مثله
ابشر

[cool girle]

موضوعك جميل اوى بجد








كلامك صح جدااااااااااااااااااااااا





تقبلى مرورى

[obscure]

السلاآمـ., عليكمـ.,

بدايةً أحب أن أشكر صاحب الموضوع علي الكلام الاكثر من رائع

وما يجمله أنه وأقعي .. وأدلته موجودة هناآ أيضاً مع نفس الموضوع


فبارك الله فيك .. وجعله في ميزان حسناتك

هذه الصفحة الذهبية التي كتبتها الايداي الشريفة لن تــُنسي

بحيث أن هذا الموضوع سيظل يُـقرأ ويظل موجود بمعلوماته القيمة

وإحتمال كبير يكون سبب في هداية الشباب

جزاك الله الجنة ..

وبارك اللهم فيك

وتقبل مروري المتواضع في موضوعك العطر + تقيمي

[كرستال اردنية]

ربنا يفتحها عليك
اله ما شاء الله

[النهضة قادمة]

جزاكم الله خيرا" موضوع جميل جدا "

[وردة خجوله]

اولا مووع رااائع جدااا
وبيعرض قضيه مهمه جدا جدا جدا

اول حاجه انا بصراحه مش شايفه ان اللى بيحصل الايام ده حب لالالا
مستحيل ده لعب عيال وتسليه

لما يكون الولد والبنت لسه عيال خمس وست سنين ويقولك بحب يبقى ده ايه ؟

انا من كتر ما اتعاملت مع بنات فى مدرستى كل سنه كنت بتعرف على بنات جديدة

البنت تشوف ولد تقولك انا معجبه بالولد ده وبعديها بخمس دقايق تبقى ماشيه فى الشارع تشوف ولد شغال فى السوبر ماركت اللى جمبهم تقولك انا معجبه بده وكل شارعين تشوف واحد يعجبها انا عايزة اعرف ده ازلى نعتبرة حب ؟
اصل ده اللى بيحصل دلوقتى والله

ناااااااااااااااااااادر اوى الحب الحقيقى دلوقتى

لاننا مش فاهمين معنى الحب الحقيقى وبنطلق على اي حاجه حب

وده للاسف

وبعدين حب ايه ده ؟؟؟؟؟؟

الحب لا يكون الى بعد الزواج علشان يكون حلال ومضمون

اسفه على الاطاله بس حبيت اشارك برايى