مصييييييييييييبه .. خطة ماتخرش الميه

[Asa7be Wawa]

قريت خبر فى المصرى اليوم بالصدفة بيقول ما معناه ان الناس بتروح أقسام الشرطة تسجل أساميها عشان تقدر تنتخب فى الاستفتاءات و الانتخابات الجاية بالرقم القومى!!! هنجت شوية و مافهمتش!! أروح القسم أنيل ايه اذا كان كل البشر و على رأسهم أعضاء المجلس الأعلى للقوات المسلحة و طارق البشرى شخصياً قالوا الانتخابات بالرقم القومى!!! انا سمعت الكلام ده بنفسى فى التليفزيون و قريته بنفسى فى النت و الجرايد يبقى ايه بقى؟؟؟

قلت أروح القسم اتأكد بنفسى ما هما خلوا الواحد يشك فى نفسه. المهم رحت قسم النزهة اللى انا تبعه، أول حاجة لقيت فيه ناس كتير و سألت فى الاستعلامات فى القسم قاللى: آه لازم تسجل اسمك عشان تعرف تنتخب بالرقم القومى. بقولوا: ايه لزمته طيب مادام بالرقم القومى راح ابتسم ابتسامة بلهاء كده ( الظاهر عشان شعار الشرطة الجديد بتاع الشرطة تبتسم للشعب ده) و قاللى اطلع الدور الأول عند لجنة الجداول الانتخابية. طلعت لقيتهم حاطين على الحيطة الاجراءات كلها و طلع فعلاً لازم الناس تسجل أساميها فى الجداول عشان تقدر تنتخب حتى لو بالرقم القومى و اجراءات تسجيل الأسم هى اجراءات استخراج البطاقة الانتخابية. صورت الاجراءات من على الحيطة عشان كل الناس تعرف و تصدق و يا ريت تهتم.

بغض النظرعن ان اى حد مش ممكن يقتنع بسبب منطقى للكلام ده، سؤال بسيط جداّ؛ ايه لزمة الموضوع ده لو فعلا كانت النية حسنة ان الانتخابات الجاية كلها (دستور – تشريعية – رئاسية) تبقى محترمة لأول مرة فى تاريخنا؟؟؟ و عشان محدش يقول انى بفترى أو بزودها و ببالغ انا هتكلم عن نفسى و هاعتبر انى واحد من النظام النجس اللى لسه موجود و هفكر ادير الانتخابات الجاية ازاى؟ و هحاول استحضر كل الوساخة اللى جوايا يمكن اقدر اوصل لمستوى الناس دى.

أول خطوة: هعمل تعتيم اعلامى كامل عن الموضوع ده. يعنى لا هينزل فى جرايد و تليفزيون و لا أى حاجة. ده انا كمان كنت هسيب منى الشاذلى تقول ان الانتخابات بالرقم القومى بس عشان الناس تفضل مئنتخة كده لغاية يوم الانتخابات بعدين نقولوهم هارد لك. مارحتوش الأقسام ليه تتأكدوا يا وحشين؟؟ ده حتى لو مش عايزين حاجة مش كنتوا تروحوا تتفرجوا على شعار الشرطة الجديد (الشرطة فى "خدعة" الشعب).

ثانى خطوة: هاغتت قوى فى اجراءات التسجيل و دى هما اتفوّقوا عليا فيها. يعنى خلّوا مواعيد التقديم من 8:30 الصبح الى 3:00 العصر بس عشان الناس كلها تبقى فى شغلها. لازم تجيب أصل شهادة الميلاد مش عارف ليه أهو برضه زيادة فى الغتاتة. الجامدة بقى ان آخر معاد للتقديم 8 مارس!!! مع العلم ان فى ملايين عايزة تعمل الموضوع ده. يبقى انا عملت أول خطوة كده ضمنت ان فى حبة ناس مش هتلحق و حبة ناس كبار شوية فى السن و بطايقهم على مناطق بعيدة أو بلاد فا مش هيقدروا و حبة ناس تانية مش هتستحمل الزحمة و القرف فا هايكاسلوا و الاخرانيين دول هايبقوا نفعونى قوى. كده كوّمت حبه حلويين بعد كمان اللى كوّمتهم من أول خطوة.

ثالث خطوة: كان من ضمن شروط الانضمام للحزب النجس "الوطنى سابقاً" ، "القومى مستقبلاً" ان يكون عندك بطاقة انتخابية. يعنى انا بفراستى عارف و فائس ان كل اللى هيتقدموا اليومين الجايين للتسجيل دول تبع الثورة. يبقى الجداول اللى فيها الأسامى الجديدة دى كلها تتفلتر. يعنى نشيل منها 20-25% كده و مش اكتر لحسان الموضوع يتفئس. و لو واحد راح مالقاش اسمه هيلاقى ان اللى حواليه اساميهم موجودة يبقى المشكلة فيه هو. يمكن اسمه قبيح مثلاً، أو هو سكران مش دارى هو راح و لأ و يمكن يكون سمع مقر اللجنة غلط. أو دى ارادة ربنا بقى!!! يعترض؟؟؟ كده يبقى كوّمت حبه كمان حلويين.

رابع خطوة: هستقتل عشان وزير الداخلية و العدل يفضلوا موجودين لحد ما يظبتوا كل الكلام ده قبل الانتخابات و طبعا عشان نضمن ده لازم نسيب رئيس الوزرا برضه عشان نحدش يشيلهم. و بعد ما يدوا التمام نبقى ممكن نسيبهم يتشالوا بقى و مش مشكله ماهى كلها كام شهر و لو الخطة مشيت مظبوط كله هيرجع. هههه.
أظن انا كده عملت اللى عليا و الباقى بقى على باقى الأعضاء يكثفوا مجهودهم فى القرى و الأرياف بالذات لتجميع الناس معانا و شراهم بالفلوس و أهو البهايم كتير و الحمد لله قانون المقطورات لسه فا ممكن نلم كل مقطورات البلد نعبّى فيها الناس يوم الانتخابات.

أظن بعد الخطة دي انا مستنى يبعتولى دعوة جادة للانضمام للحزب القومى (الوطنى سابقاً).

ملحوظة: بحسبة بسيطة، لو كل قسم شرطة يتلقى طلبا لإصدار بطاقة انتخابية كل دقيقتين، والقسم يتلقى الطلبات لمدة ست ساعات يوميا، وهناك خمسمائة قسم في مصر، والمدة المتاحة للناس حتى 8 مارس هي عشرة أيام، فإن عدد البطاقات المصدرة في هذه الفترة سيكون تسعمائة ألف بطاقة فقط، وهو أقل من عدد حاملي البطاقات الانتخابية الحاليين من الحزب الوطني!! يا ترى ثورتنا رخيصة عندنا لدرجة التفريط فيها عن طريق السماح بتنفيذ هذا السيناريو؟؟


_____________________


لازم الناس كلها تفهم ايه الحكايه

[234taha]

لو سمحت اكتب عنوان يشد الناس لفتح الصفحة وقراءة الموضوع وحاول تنشرها على الفيس بوك

[Asa7be Wawa]

عنوان زى ايه ؟ لو حضرتك تعرف تنشرها على الفيس يبقى كويس

[234taha]

المشاركة الأصلية كتبت بواسطة qqwawa

عنوان زى ايه ؟ لو حضرتك تعرف تنشرها على الفيس يبقى كويس

أنا بالفعل نشرتها بس بعدين لقيت الآتى منشور فى المصرى اليوم
لجنة «تعديل الدستور»: الانتخاب بـ«الرقم القومى».. ودور «الداخلية» للتأمين

كتب يسرى البدرى ونشوى الحوفى وشيماء القرنشاوى وهشام عمر عبدالحليم وحسام صدقة وعادل الدرجلى وابتسام تعلب ومحمد عبدالقادر ومنير أديب ٢٨/ ٢/ ٢٠١١
طارق البشرى

صرح المستشار طارق البشرى، رئيس لجنة تعديل الدستور، بأن التصويت فى الانتخابات، خلال المرحلة المقبلة، سيكون ببطاقة الرقم القومى، مؤكداً أن عملية الانتخاب واللجان المشرفة عليها، ابتداء من اللجنة العليا إلى اللجان العامة ثم الفرعية، ستكون تحت إشراف قضائى كامل من أعضاء الهيئات القضائية، منوهاً بأن دور وزارة الداخلية سيقتصر على تأمين العملية الانتخابية.
وقال البشرى، خلال مؤتمر صحفى عقده أمس بمقر انعقاد اللجنة بوزارة العدل، إن ما انتهت إليه لجنة التعديلات الدستورية من تعديل لبعض نصوص الدستور هو المرحلة الأولى من عملها، لتبقى بعد ذلك المرحلة الثانية، التى تختص بتعديل نصوص القوانين المكملة أو المتفرعة من تلك النصوص الدستورية، وهى قوانين مباشرة الحقوق السياسية، وقوانين مجلسى الشعب والشورى، وقانون انتخاب رئيس الجمهورية.
وأضاف أنه فيما يخص المادة ٧٦ المعدلة من قبل اللجنة، والتى تنص على أن يحصل مرشح أى حزب لرئاسة الجمهورية على تأييد ما لا يقل عن ٣٠ ألف مواطن، فإن الأحزاب لابد أن تكون على قدر من الحرية تؤهلها للمشاركة فى انتخابات رئاسة الجمهورية، لافتاً إلى أن هذا التأييد هو أحد الضمانات لجديتها فى المشاركة بالانتخابات.
وعن دور وزارة الداخلية خلال الانتخابات المقبلة، سواء الرئاسية أو البرلمانية، قال البشرى إن القضاء سيكون هو الوحيد المختص بتشكيل اللجان المشرفة على جميع العمليات الانتخابية، مستطرداً «ولكن سيبقى هناك دور مهم لوزارة الداخلية فى مسألة التأمين والتنظيم، وكذا تنفيذ آليات معينة تضمن سير العملية الانتخابية على النحو الأمثل».
فى سياق متصل، أنهت وزارة الداخلية استعداداتها لإجراء الانتخابات ببطاقات الرقم القومى، فيما توافد المواطنون على أقسام الشرطة لتسجيل بياناتهم.
إلى ذلك رحبت جماعة الإخوان المسلمين بالتعديلات الدستورية، واعتبرتها «حققت المطلوب بشكل رائع»، وأكدت قيادات حزبية وبرلمانية أن التعديلات «ستخلق برلماناً حقيقياً»، لكنها أكدت أنه من «غير اللائق ترقيع الدستور المصرى».
من جانبه، أشاد الدكتور فتحى سرور، رئيس مجلس الشعب السابق، بالتعديلات، واعتبر أنها كفيلة بتحقيق الديمقراطية وتفعيل مبدأ تداول السلطة.
http://www.almasry-alyoum.com/articl...ticleID=289203

[Asa7be Wawa]

مهو لسه بالرقم القومى لكن لازم تروح القسم و تسجل اسمك

[توفيق رفعت عجيز]

أظن انا كده عملت اللى عليا و الباقى بقى على باقى الأعضاء يكثفوا مجهودهم فى القرى و الأرياف بالذات لتجميع الناس معانا و شراهم بالفلوس و أهو البهايم كتير و الحمد لله قانون المقطورات لسه فا ممكن نلم كل مقطورات البلد نعبّى فيها الناس يوم الانتخابات.

ممكن حضرتك تفسرلي القطعة دي من حوارك الكبير ده ؟ نعرف انك تقصد ايه بس؟

[aymaan noor]

علشان الناس اللى عمالين يقولوا ان مفيش حاجة اسمها ثورة مضادة ، يتأكدوا ان هناك محاولات جادة و يتآمر فيها الجميع على قتل ثورة 25 يناير والقضاء عليها ، و لكن هذا الزمن انتهى فلا يجب أن نسكت على ذلك ولا بد أن نصر على التغيير الحقيقى فلا نهاية للمظاهرات الا اذا تطهرت البلد فعلا من الفساد والفاسدين

[الأستاذة هدى]

المشاركة الأصلية كتبت بواسطة aymaan noor

علشان الناس اللى عمالين يقولوا ان مفيش حاجة اسمها ثورة مضادة ، يتأكدوا ان هناك محاولات جادة و يتآمر فيها الجميع على قتل ثورة 25 يناير والقضاء عليها ، و لكن هذا الزمن انتهى فلا يجب أن نسكت على ذلك ولا بد أن نصر على التغيير الحقيقى فلا نهاية للمظاهرات الا اذا تطهرت البلد فعلا من الفساد والفاسدين

بارك الله فيك
وهذا هو ما يجب ان يفهمه الناس من ألاعيب للإلتفاف والعودة من جديد لأزلام النظام !!!!!!!

[Asa7be Wawa]

اه الحل نعمل ايه ازاى نوصل للناس ؟ و نفهم الحكايه ديه و نعترض عليها

[عاشق البلانكو الابيض]

حسبى الله ونعمة الوكيل
ربنا ياخدهم كلهم
شكرررا على الخبررر

[ahlaoy50]

ينهار ابيض حسبي الله ونعم الوكيل حسبي الله ونعم الوكيل
طب انا عايز اروح اسجل اسمي بس القسم بتاعنا هنا محطوط عليه وطيها اروح فين

[الأستاذة أم شاهندة]

احنا ممكن ندخل صفحة القوات المسلحة على الفيس بوك
http://www.facebook.com/egypt.moe#!/Egyptian.Armed.Forces

ونسألهم بصراحة
هل يجب التسجيل فى أقسام الشرطة ليكون لى حق الانتخاب
ونتابع الرودود

وإن شاء الله نوصل لحل

وربنا يستر

[Soaad-532]

الحل ايه دلوقت يا كوكو..لازم أروح القسم ؟
وبعدين قسمنا اتحرق ..اروح أى قسم آ’خر؟

[شمعة تحترق]

لكي الله يا مصر

[إليزابيث]

يعني كإنهم ماعملووش حاجة زيادة ع القديم