(( :: ما تبقـــاش " بـــجـــــح " :: )) .. " البجـــاحة " .... !!!!!!!!!!!!!

[Mohamed.Helmy]

السلام عليكم ..

يارب تكونوا بخير .. ^^

بأختصـــار , هنتكلم عن " البجـــاحة "

يعنى بجد مش لاقي مفهوم ليها ..:D

و يا سلام على بجــاحة الاعــلام و لا الرياضة ولا اللى في الشارع ... الخ .!!

** يعنى كتيـــــر مننا بنشوف ناس بجحــة بطريقــة فظيعة .. و أكيد كل واحد حصل معاه
أكتر من موقــف مع النـــاس دي

** و كتـــير بنشوف مذيــع أو مذيعــة " بجحـــة " تلاقيهــا بتسأل أسئلة ميصحش أنها تتسأل او هتضايق
الضيف اللى معاها .. و بيبقوا فاكرين دي شطارة أعلام

** ولا تلاقي لاعــب كورة يقع فى منطقة الجزاء و محدش جه عنده خالص
و تلاقيــه يقوم يبجح فى الحكــم و بيطالب بضربة جزاء مع ان محدش لمســه :D

بنشوفهــا كتير دي صح ؟ ^^

و تلاقي برضه نفس اللاعب تقــريبـــا ممكن يرجع الكورة للجون بطريقة غلط و لما تدخل الكورة الجون
تلاقي أخينــا اللاعب ده بيبجــح فى الحارس اللى واقف ..

** و يا سلااااااام ع البجــاحة اللى شوفناها من النظـــام القديــم الله لا يعيده و ان شاء الله كل اللى عمل حاجة غلط هيتحاكم .. !

شوفناهم فى انتخابات مجلس الشعب .. رغم كل التزوير اللى حصل و الشعب كله عارف انها متزورة من الاول للاخر .. و طلع " عــز " قالك دي حالات نادرة فى بعض اللجان ..

و لا اللى كانوا بيساندوا الريس و كانوا بيعيطوا علشانه ايام الثورة ..
اول ما أتنحى .. تلاقيهم في نفس الليل قالك " ثورتنـــا " نجحت .. و شبابنا و اوعى و لا و حاسب
مع ان في منهم اللى كان بيطالب بأنهم يبيدوا اللى فى التحرير ..

** فى كمــان نوع جديــد من البجــاحة .. بجــاحة " الشحاتين " ..
تلاقيـــه بيتشرط عليك و بيشخــط فيك .. تحس انه بلطجي مش شحات ..

يعنى تلاقي اللى يقولك " الجنيــه ده أعمل بيه أيه ؟.. انا عايز 5 جنيه "

بجد و الله حصلت معايا .. كنت ماشي انا و واحد صحبي .. و لقيت راجل بجلابية جاي علينا كده و في ايده " سيجارة "
قام جاي نحيتى و قالي " هــات 5 جنيــه "

انا لقيت السيجارة فى ايديه .. قولتله ربنا معاك ..
و سبته و مشيت ..و بعدين ده بيحدد كمان " 5 جنيــه "
طبعا كلكم هتقولوا ده مش شحات .. ده " بلطجي "
بس لقيت صاحبي بيقولي ده بيشحت بالطريقة دي .. علشان يشتري سجاير .. !!

معلش حاسس اني طولت عليكم صح

بس انا قولت أتناقش معاكم و أشوف معاكم حكاية " البجــاحة " !!

***

** انت أيــه رأيك فى البجاحة اليومين دول ؟ و شايف ان الناس البجحة دي بتزيد و لا بتنقص ولا هيودونا فين ؟؟

** يا تري أتعرضت لموقف من حد " بجــح " قبل كده ؟؟ .. أشجينا قصدي قولنا عليه ؟؟

معلش طولت عليكم كتير .. ^^

يارب الموضوع يعجبكم

فى رعاية الله ..