ضباط الشرطة عايزين دكتور نفسي !!!

[Taleba Me7tasa]

السلام عليكم
من غير مقدمات انا هحكيلكم مشهدين وانتو تحكمو

المشهد الاول :
صديقة ليا هي واختها كانو بيتغدو ف مطعم المهم كانت صاحبتي دي واخدة بالها من واحدة كانت بتحوم كدة حوالين ترابيزتهم المفروض انها زبونة قاعدة على الترابيزة اللي جمبهم محطتش ف بالها وابعد يا شيطان ابعد يا شيطان

المهم قامو يجيبو حاجة رجعو ملقوش شنطة اخت صاحبتي دي زي ماحنا عارفين فيها البطاقة والاوراق والفلوس وكل حاجة

راحو يبلغو ف القسم الضابط وراها شوية صور لستات مسجلين خطر لغاية ما لقتها وقالت للضابط هي دي

قالها "ميييييييين ؟ لالالالالالالا" وفيما معناه ان دي دول عصابة كبيرة وخطيرة وانا مقدرش اخاطر وعوضك على الله يا ستي ولو عايزة شنطتك روحيلهم انتي

(ملحوظة العصابة الكبيرة دي عبارة عن مجرد شوية حرامية مش قتالين قتلة يعني)

المشهد التاني :
في قسم المنتزه عندنا لو حد يعرف دة القسم اللي لو اي حد كانت بياناته ف استمارة البطاقة مش مطابقة للبيانات اللي عند الدولة

المهم رحت مع ماما عشان كان عندها مشكلة ف بياناتها
وهييييييييه رايحة اتفسح ف القسم كنت عيلة بقى

والمشهد مايتوصفش
عز الضهر والحو حر نار (كنا ف الصيف)
والظابط "المبجل" واقف تحت التندة بتاعت القسم والناس الغلبانة واقفين على رجليهم ف الجو دة منهم ستات كبيرة ف السن ورجالة كبار برضه كل دة وماعلينا

ندخل ف المهم وهو معاملة الظابط طبعا الناس دي مش مجرمين ولا قتالين قتلة دول ناس محترمة واقف عمال يزعق ف دول وانتو تعالو كده واصلا شكله تقول عليه حرامي واترقى بقى ظابط

ولا اما حد يساله (وهو الطبيعي) عن اي اجراء لازم يعملوه ويتعمل فين تحس انه هينده ع العسكري بتاعه ويلبسهم الاساور والحمد لله انا وماما كنا واقفين بعيييييييد وانا فرحانة رايحة اتفسح بقى :D وامي خدتها من قصيرها وروحنا وقلنا بلاها نادية بلاها سوسو :D

واللي يغيظك يا مؤمن ان دة مش بيحصل الا ف مصر
صحيح مصر ام الدنيا

طب مش بزمتكو عايزين دكتور نفسي
ولا ليه مانغيرهم اسهل ، ولا نستورد شعب من برة على راي محمد صبحي :D