بقوة شباب المتعاقدين وبخبرة كبار المعلمين والعاملين بالأزهر نبني الأزهر

[مدرس أزهري]

طبعا عارفين كلنا الفساد اللي في الأزهر واللي للأسف بعضنا بيحاول ينكره خوفا من مواجهة الحقيقة المرة
وهسئل كل واحد فينا سؤال لو عندك ابن وعرفت انه بيعمل اي غلط هتواجه نفسك ولا هتخبي وتكذب الناس مع انك متأكد من ده.
طب الفساد ده في ايه بالظبط
أولا عدم العدالة وده طبعا بيكون واضح في
1-كنترول الشهادات وده للي مايعرفش بيطلع منه الافات الجنيهات لكل عضو من أعضائه وطبعا الحمد لله إنه حكر على ناس من المحاسيب كلنا عارفينهم
2 - التنقلات فمثلا لو ليك واسطة يمكن تتنقل من اي مكان لاي مكان بدون بديل ومن غير جواب وموافقة شيخ المعهد
حتى في غرف المدرسين واسطة فمثلا من المعاهد اللي اشتغلت فيها معهد فيه الكبار قاعدين على مكاتب بينما المتعاقدين قاعدين في غرفة تانية على دكك ( ايوة دكك) مقاعد الطلاب يعني
ا3 - لمراقبة بتاعة الشهادات بقى انت وحظك لو ليك واسطة تراقب في مكان قريب للبيه قصدي للبيت وطبعا احنا عارفين انك لازم تروح بدري بس بالواسطة برضو هتدخل لجنة واحدة بس
والغريبة اني بلاقي مدرسين أفاضل أول ما تيجي سيرة الكنترول بين المحاسيب ينسحبو من المكان وكأن دي حاجة مقصورة عالاخوة التانيين بس
يا جماعة طبعا لا بنقول إضراب ولا بنقول اعتصام بس بنقول العدل اللي ما يزعلش حد .
مع اعتذاري لكل الأزهريين وأنا واحد منكم درست في الأزهر من الصف الأول الابتدائي إلى أن أنهيت دراستي الجامعية والله كنت أفخر بالأزهر بين الجميع إلى أن عملت فيه ورأيت ما رأيت فصار قلبي ينزف دما على ما فيه الأزهر قائد الثورات على مر العصور
لنبدأ حملة معا نبني الأزهر من جديد التي أتمنى ان نتقابل ونناقش فيها كيف ننهض بالأزهر ونعيد له دوره الديني والعلمي والأدبي كما كان .
أحبكم في الله وأتمنى أن أقرأ تعليقاتكم ونقدكم ومساعدتكم للأزهر