السبب وراء كوارث ومشاكل مصر !!!

[الاستاذ محمود حميد]

عارفين سبب المشكلة بتاعت العمل والأجور في مصر سببها الاساسي ايه؟؟!!

سبب الي بيحصل ده كله( البنات) !! الي زاحمين البلد وواخدين مكان الشباب في كل حاجة ... الشباب الي عاوزين يجوزا ويفتحوا بيوت ومش عارفين ولا قادرين يعملوا كدة لانهم مش بيشتغلوا وبالتالي مفيش في ايديهم فلوس !!

البنت بتتجوز وجوزها شغال وبيصرف عليها ومش مكفيها وتروح تشتغل طيب لما انتي وجوزك بتاخدوا مرتبين اومال الشباب العاطل الي علي القهوة ده يشتغل فين ؟؟ خصوصاً ان الشغل في مصر قليل

يعني يا عالم الشاب من دول يروح يشتغل فاعل في المعمار ويرمي شهادتة والهانم الي متجوزه ومتستته بتشتغل وبتاخد مرتب في الاصل هو حق شاب من دول الي لو قامت حرب هو الي هيدافع عن بلده في الميدان والهانم هتكون في البيت بتتفرج علي الاخبار

الكلام ده مش تحامل علي البنات الي اكيد فيهم كتير مقتنعين بكلامي خصوصاً الي معاها اخ عاطل ومش بيشتغل ده غير ان اصحاب الاعمال بيحبوا يشغلوا البنات بس ( حتي في المدارس ) مع ان البنت او المدرسة مش بتشتغل ربع الي بيشتغلة المدرس لانها ما بين اجازة وضع 3 شهور وبعدين ساعتين الرضاعة يعني اليوم 4 ساعات شغل ( وفي ناس كتير بتشكك في المرتب الي بتاخدة المدرسة منهم انه حرام لانها لم تعمل بكامل الاجر الي بتقبضة ) !

حد هيقولي طيب ايه المطلوب ؟!!!!

هرد عليه واقولة لازم حال البلد دي ينصلح الاول ولازم المسئولين كل المسئولين ولو حتي مدير المدرسة يكون عندهم الاولوية في العمل للشباب ودة هيعود علي البنات نفسهم بالخير
( ازاي بقي )

هقولك ازاي ... لما الشاب من دول هيشتغل ويقبض فلوس طبعاً اول حاجه هيفكر فيها هي الخطوبة او الجواز يعني وقتها مشكلة العنوسة هتختفي او علي الاقل مش هتبقي ظاهرة الكل بيتكلم عنها
لكن البنت تشتغل والشاب علي القهوة يبقي البطالة موجودة والعنوسة موجودة والجريمة كمان موجودة لان شاب بلا عمل يعني مشروع منحرف سواء في السرقة او النصب
لكن البنت الي مش هتشتغل عمرها ما هتفكر تبقي حرامية او نصابة لانها مش هتقدر او هتعرف

شوية رحمة يا ناس ولو عاوزين تشغلوا البنات يبقي شغلوا البنت الي فعلاً محتاجة للشغل الي بتصرف علي بيت مش بنت ظروفها مرتاحة ونخليها تاخد فرصه شاب اولي منها بالشغل حتي لو تقديرة مقبول وتقديرها هي امتياز وزي ما قولت ان الشاب هو الي هيدافع عن بلدة في ميدان الحرب مش البنت .