لا تقل اللهم (صلي) علي نبينا محمد

[همتي رايتي]

بسم الله الرحمن الرحيم ..

لينا جارنا دكتور في اللغة العربية ,
حدثني مرة عن زميلٍ له التقى الشيخَ ابن العثيمين - رحمه الله - فقال للشيخ :
" ادعي لي يا شيخ "

فقال له الشيخ :
" ذَكِّرني أدعُ لك "

فصاحبنا استغرب !!
يعني إيه " ذكرني أدع لك " ؟؟
طيب ما أنا بفكرك أهه ,
و لا أفكرك تدعي لي وقت تاني يعني و لا إيه ؟؟

فلما حكى الموقف ده لجارنا ,
قال له: إن الشيخ لا يعني بقوله " ذكرني " يعني فكرني ,
لكن يعني خليني " مُذكّر " و أنا أدع لك !!

يعني يقول له : " اُدْعُ لي يا شيخ "
و ليس :
" ادعي لي يا شيخ "

لأن المخاطب المذكر في فعل الأمر -سواء طلب أو دعاء- بيكون مجزوم ,
إما بالسكون أو حذف حرف العلة مثل :
ادع لي - صلِّ على السجادة ....

أما في حالة المؤنث ,
تبقى الياء في فعل الامر و تسمى ( ياء المخاطبة ) , مثل :
ادعي لي - صلي على السجادة .....


أكيد دلوقتي هتلاقي واحد بيقول , أو واحدة بتقول :
إيه حصة العربي اللي دخلنا فيها دي ؟؟

هقول ( له ) : لو عاوز تعرف ليه ؟؟
( صلِّ ) على النبي الاول ,

و هقول ( لها ) : لو عاوزة تعرفي ليه ؟؟
( صلي ) على النبي الأول ,

و وريني كده انت هتكتب الصلاة على النبي إزاي ؟؟؟
هتكتبها :
اللهم ( صلِّي ) و سلم عليك يا رسول الله
أم :
اللهم ( صلِّ ) و سلم عليك يا رسول الله

؟؟؟؟؟؟

أهو الموضوع قلب درس عربي علشان الحتة دي يا عم ,

لما تكلم ربنا و تخاطبه لازم تخاطبه بصيغة المذكر ,
و النداء أو الدعاء هو أصلا فعل أمر ,
و لما يكون للمذكر بتحذف منه حرف العلة , أو الياء ,

يبقى ( ما ينفعش ) تقول:
يا رب (صلي) على النبي ,
أو
يا رب (اهديـني)
أو
يارب (أعطـيـني) ما أتمناه
.... إلخ

إنما تقول :
يارب ( صلِّ) على النبي
أو
يارب ( اهدني )
أو
يارب ( أعطني ) ما أتمناه
.... إلخ


الغلط في الكتابة صغير , يادوب في حرف واحد ,
إنما الغلط في المعنى كبييييييييييير جداااااااااا

...................


جزاكم الله خيرا على القراءة ,
و خصوصا الناس اللي ما بتحبش العربي ,
نسأل الله أن يوفقنا لما يحب و يرضى


ـ
و لا تنسوا كاتب الموضوع الأصلي من دعوة صالحة بظهر الغيب
أن يُصلح الله له شأنه كله و يُدخله الجنة و يُجِرْه من النار و جميع المسلمين و المسلمات ..

منقول