بناء علي طلب اعضاء المنتدي

[شبرمة]

يا بلدنا مانتيش عاجباني (الجزء الأول ) ...

بقلم الدياسطي سمير

يابلدنا مانتيش عاجباني
ريس حلنجي وشراني
خسيس ورمة وأناني
وحكومتة قاسية وظالماني
وعصابته مجرمة سارقاني
جيشه مفروض يحميني

جابه وعمله سجاني
يابلدنا مانتيش عاجباني
-------
بتباني دكر مع اولادك
و نتاية مع ناس تانيين
هانوكي واغتصبوا جنابك
برضاكي زرعوكي في الطين
ولما ييجي وقت مخاضك
بالرخص هايروحوا بايعين
قسما بربي وايماني
يابلدنا مانتيش عاجباني
---------
قالوا زمان كان فيه دوار
غفر وعمدة وهليلة
دلوقتي قال سابوا الدوار
لجعر أجره بالليله
يسرق وينهب في المخاليق
وسويسرا بتفوز بالشيلة
وانا باعضعض في حيطاني
يابلدنا مانتيش عاجباني
--------
مابقتش لاقي اللضا فيكي
بعت المداس ومشيت حافي
بادعي عليهم وعليكي
وديوني راكبة على اكتافي
غرقت وضاعت مجاديفي
وباقول يارب انت الكافي
وحكومة قال ايه بتستهبل
و تلومني وتلوم ( اسرافي )
---------
و ( الغالي) يابلدنا السمسار
جزار ماسكنا للمناشير
نهبوا شقانا وارزاقنا
وجتتنا نهشت فيها الطير
ترزي وحرامي من الشطار
مظلوم ياعيني كمنه وزير
كان حقه يبقى الزير نفسه
مش كوز ومتعلق في الزير


*********
الدياسطي سمير ... أمل مصر قي التغيير