☺☻☺☻ أي كلام فاضي ..... معقول ☺☻☺☻

[Golden Eagle]

بسم الله الرحمن الرحيم
ندخل ف الموضوع من غير مقدمات
اللي شاف موضوع قنابل الدخان الرياضية هايلاقي المؤتمر الصحفي بعد الماتش تطبيق عملي عليه ( مش عارف هانعمل إيه من غير حسام حسن ) و هو فت التشتيت
المؤتمر الصحفي مشاهدة هنا جزء أول - جزء تاني
حسام حسن ف كلامه قال شوية حاجات هاقولها بالمختصر المفيد و هارد عليها بعدين :

قال إن لاعيبته أدوا كويس في ظل الامكانيات المتاحة و الزمالك قادم و المستقبل ليهم و هاييجوا بالوقت و بيهنيهم ع الأداء
و قال إنه حضر المؤتمر و جوزيه ما حضرش
و قال بعد كدا إن فاروق جعفر باس ع راس جوزيه لما ماحضرش المؤتمر
بعد كدا كلام عن الـ fair play
بيقول مبروك لفرقته و مش هايقول هارد لك للأهلي و مش هايسلم ع الأهلي لإنه ما راعاش الـ fair play
حصل إصابة لجعفر و بعده شيكابالا علشان كدا غيرهم
شيكابالا إتعامل وحش من لاعيبة الأهلي بدل ما يشوفوا سلامته كانوا بيقوموه بالعافيه
لعبنا أحسن و فرصنا أخطر بنلعب دفاع نص ملعب و معتمدين ع الهجمة المرتدة و جاتلنا فرص بالطريقة دي
كان في عوامل كتيرة خارج الملعب ضدنا
اللاعيبة ما وقعتش بتمثل دي كانت خشونة من لاعبي الأهلي و منهم واحد وقع قدام جوزيه و كنت أتمني يطبقوا الـ fair play
قال إن دكة الاحتياطي عنده كانت تقدر تأدي زي اللي ف الملعب بس كل مباراه ليها ظروفها ( لما واحد سأله عن أحمد سمير )
التشكيلة بتاعتنا خلتنا طول المباراة راكبين المباراة و فرصنا أخطر و اللاعيبة بالإمكانيات القليلة و الخبرات القليلة
إتفاجئت بعشوائية تشكيل جوزيه و تغييرات جوزيه كانت في صالحي
بيقول لمراسل لو ما كنتش زودت لاعيبة خط النص بلاعيب كورة زي هاني كنت إنت برضو هاتسألني إتأخرت ليه ف تبديل هاني
الأهلي لعب 3 - 4 دقايق بعد نزول هاني سعيد بس بعدها ركبت المباراة
لعبنا ع المرتدة و شكلت خطورة و راضي ع التغييرات بتاعتي
أنا ماليش دعوة بالحكام و النتايج صدقوني أنا راضي عن فرقتي لكن في كل مباراة في عوامل بتعوق الفريق
ضربة جزاء لحسين ياسر و كنت أجيب تالت و أحافظ
فرصنا أخطر و نستحق الفوز
راضي عن الأداء و حزين من التعادل كنتيجة
و قال ردا ً ع بركات لما استشهد بمباراة الموسم اللي فات إن الأهلي مش هايتعادل معانا إلا لما نكون ناقصين 2 لاعيبة
لاعيبتي ما اتعلمتش خبرة تضييع الوقت و التمثيل
الدوري بنسبة 100% للزمالك و 100 % للأهلي

اللي أنا أعرفه إنه ما كانش بيقدم برنامج همسة عتاب
دا كان بيتكلم عن التحليل الفني للمباراة و اللي حصل فيها
لكن النقط اللي فوق بالآزرق دي هي اللي كان الكلام فيها عن المباراة ( و بعضها غلط أصلا ً )
قصة الـ fair play
فاقد الشئ لا يعطيه
إذا كان لاعيبة الزمالك هدفهم التالت ف ماتش القمة 3-3 كان إبراهيم صلاح شايط كورة ف وش بركات
و ف ماتش الطلائع عامر صبري فضل دقيقتين ع الأرض و ماحدش طلع الكورة
المطلوب إيه من جوزيه علشان الاتنين القرايب ما يهجموش عليه كدا ؟؟؟
و المطلوب إيه من اللاعيبة إذا كان الحكم ما إستدعاش الجهاز الطبي ؟؟؟
و إشمعني الروح الرياضية ظهرت دلوقتي و ما ظهرتش ف الحالات السابقة ؟؟؟

بصوا يا رجاله
كل واحد حر ف دماغه
و نسبة كبيرة من الزمالكاوية بيتضحك عليهم بمزاجهم و هما حابين كدا ( زي ما قلت كل واحد حر ف دماغه )
بس ما حدش ييجي يعيش الدور بقي
حسام حسن مش أفضل مدربي مصر ف التدريب الكروي لكنه أذكاهم ف كلامه مع الجماهير
مؤتمر صحفي ما كانش فيه أي كلام عن كورة القدم إلا القليل اللي يثبت إن حسام حسن فاكر إنه جه من الخلف
يعني بيقول إن تشكيل الأهلي عشوائي
و التغييرات كان متوقعها
طيب أمال ليه بعد التغييرات بعد ما كنت متقدم إتعادلت ؟؟؟
و بيقول تغيير جعفر و شيكابالا للإصابة
طيب لو كان جعفر إتصاب الأول و إنت عايز تكمل زي ما إنت ماشي كنت شلته و نزلت عوديه ( مهاجم بمهاجم )
و شكرا ً لحسام حسن اللي كان عند حسن ظني لما قلت ف موضوع التوقع " إحنا واثقين ف خبرة حسام حسن التدريبية "

و الناس اللي بتتكلم ع الأخلاق بقي أنا مش عارف هما شافوا الماتش بتاع امبارح ولا دي كانت ردود قبل الماتش
أصل مش من الأخلاق إن مدرب يروح يمسك ف إيد مدرب تاني كدا و يتهجم عليه ( زي النصاب اللي لما الواحد يكتشف إنه عايز ينصب عليه يقوم النصاب ضاربه علشان ما سمحلوش إنه ينصب عليه )
ولا إن لاعيبة الزمالك تروح تهجم ع أوضة اللبس بتاعت الأهلي ( ليها فيديو اللي عايزه يقول )
الأخلاق و الاحترام مش إن اللاعيبة ما تغلطش خالص ( و إن كان الضرب دا مش من الأخلاق )
لا طبعا ً لأن دول بشر
لكن الأخلاق و الاحترام إنهم لما يغلطوا يتفرض عليهم عقوبة
و مش هايتفرض شلن ع حد
و لجنة المسابقات مش هتاخد بالأحداث بعد الماتش لأنها " مش ف الشريط الأصلي للمباراة " و بكدا بتدي دعوة للاعبي كرة القدم في مصر " إذا لم تثبت نفسك في كرة القدم ..... تحول للمصارعة الحرة "


الخلاصة ف مصاصة
حسام حسن ما اتكلمش عن المباراة كلام مقنع و صدر للجماهير مشاكل حصلت ف الملعب علشان يلهيهم عن الأداء اللي كان كويس و باظ بتغييراته و بكدا الجمهور ما يشوفهوش فاشل و بكدا برضو يبقي الجمهور وسيلة ضغط علي مجلس الادارة علشان يجددوا لحسام
و أنا من موقعي هذا كراجل أهلاوي محب للأهلي و مصلحته أتمني إنه ينجح ف مسعاه
لأن الحجج هايثبت كذبها بعد كدا لكن البطولات باقية
و أشكرة علي تصحيح مسارة في المباراة بعد التقدم إلي التعادل في ظل سوء أداء أرجل 3 لاعيبة ف الأهلي ( قلب الدفاع ) و تصحيح المسار دا كان في ظل تغييراته اللي عاجباه و راضي عنها

( كلمة مالهاش علاقة بالموضوع بس بمناسبة الـ fair play اللي جماهير الزمالك بتتكلم عنه ..... هو من الـ fair play إن الزمالك يفوت ماتش للإسماعيلي ؟؟؟ أصل الدوري دا مشهور بدوري ريشة مش مشهور بدوري التفويته )