موال النهار

[أحمد علي]

عدي النهار
والمغربية جاية تتخفي ورا ضهر الشجر
وعشان نتوه في السكة
شالت من ليالينا القمر
وبلدنا ع الترعة بتغسل شعرها
جانا نهار مقدرش يدفع مهرها
يا هل تري الليل الحزين
أبو النجوم الدبلانين
أبو الغناوي المجروحين
يقدر ينسيها الصباح
أبو شمس بترش الحنين
أبدا
بلدنا ليل نهار
بتحب موال النهار
لما يعدي في الدروب
ويغني قدام كل دار
والليل يلف ورا السواقي
ذي ما يلف الزمان
وعلي النغم
تحلم بلدنا
بالسنابل والكيزان
تحلم ببكره
واللي حيجيبه معاه
تنده عليه وبتسمع نداه
تصحي له من قبل الأدان
تروح تقابله في الغيطان
في المصانع والمدارس
طالعة له صحبة جنود
طالعة له رجال أطفال بنات
كل الدروب واخدة بلدنا للنهار
واحنا بلدنا ليل نهار
بتحب موال النهار
) مما أعجبني لعبد الرحمن الأبنودي (