إلى خالد عبد الناصر

[Samir Elamir]

دمع الغلابة ف وداع خالد

إلى خالد عبد الناصر
شعر/ سمير الأمير
فى الزحمة ماشى وفاتنى موكب التوديع
يا بن اللى عمر ارضها بالسد والتصنيع
بلغ سلام شعبها لأبوك
وقوله يا جمال مصر بتحبك وناسها بيحبوك
وبشره إن الغلابه شدوا حيلهم تانى
وقوله صورتك وسيرتك رايات واغانى
وقوله فيه شاعر كان عايز يكلمنى ومالحقنيش
وقوله يكفيك يا ناصر بعد الهزيمه بنيت الجيش
ربيت ولاد مالهومش ف السرقه
بيعشقوا مصر بلهفة وبحرقه
خالد جمال وابوك جمال خالد
خفيف على الدنيا زى الوالدة والوالد

وخفيف على قلبنا اكمننا عارفين

إنك فى "ثورة مصر" رفيق" لنور الدين"

ورفيق على دربنا لحرية الأوطان

تكره بنى صهيون تعشق بنى الإنسان

خالد جمال وابوك جمال الحلم

دخل حروب الغلابة عشان يسود السلم

وخرج من الحكم كما خرج للموت

خالى الوفاض كالملاك داخل على الملكوت

لا ساب ولاد يورثوا ولا ولاد طماعين

ولا ولاد مجرمين ما لهومش ملة ودين

***

فى الزحمة ماشى وفاتنى موكب التوديع

لكن قصيدتى شهادتى أمام الجميع:-

دمع الغلابة ف وداع خالد... دعاهم لابوه

ناصر نصير الغلابه... و عمرهم ما نسوه.