اكيد فى مصر

[emoo]

مع الاعتذار لمصر بنقدم هذه الاغنية وبنقول بنحبك يا مصر لكن بنكره اللى حاكمينك لانهم عمرهم ما هيحبوكى
ولا خايفين عليكى والجشع ملأ قلوبهم طمع اكتر

آآآآآه لو نحكمها صح !

أكيد في مصر

لما تلاقي الطفل المطوة في إيده
وحاطط الكلة في علبة نيدو
وماشي وسط الطريق
مش داري بأي شيء
وعقب سيجارة قده
بيشد فيه ويشده
وتحس بنفسك جواها كسر
يبقي أنت أكيد أكيد في مصر

لو رحت الجامع ودخلت تصلي
وخرجت في قلبك إيمان وتجلي
وفجأة يحصل أزمة
وما تلاقيش الجزمة
وتروح حافي بعد العصر
يبقي أنت أكيد أكيد في مصر

هنا الشيوخ الصالحة هما المسجونين والمطرودين
واللي عايشيين في البلدي النصابين والقلابين
والرشوة هي الدليل
والواسطة ملهاش بديل
والأفراح مش دايمه
وناس في الشارع نايمه
وواحد عنده خمسين قصر
يبقي أنت أكيد أكيد في مصر

لما تلاقي النور دايما مقطوع
والناس ياعيني هتموت من الجوع
والمواصلات زحمة
ولافي فراخ ولا لحمة
وفساد وخراب ملهوش حصر
يبقي أنت أكيد أكيد في مصر

لما تلاقي الصهيوني مستثمر علي أراضيك
وتلاقي صناعتنا في تل أبيب
لما تعيش في بلادك
وتحس إن أنت غريب
لما تلاقي الكويز وحاجات كتير بتغيظ
وانت علي قفاك ختم النسر
يبقي أنت أكيد أكيد في مصر

لما تلاقي مجلس شعب وكله حكومة
لما تخش تصوت تطلع مضروب شومة
لما تلاقي طواريء
وبنى آدمين مظلومة
لما تلاقي الأمن أكتر من الناس
والإكراه في حياتنا أساس
لما تحس بظلم وعجز وقهر
يبقي أنت أكيد أكيد في مصر

لما يقولو مساواة
ونلاقي معاناة
لما يقولوا وحدة وتلاقي فتنة
لما يعيشوه في عز وإحنا في أه
لما يعدوا الكام مليار ومنعديش خط الفقر
يبقي أنت أكيد أكيد في مصر

اهل مصر والله دول ناس طيبين
أهل شهامة وجدعنة ومأصلين
واللي ماصص دمنا وبيعرنا ده صنف نادر قادر ملعون ليوم الدين
ولو إتمسكنا بمبادئنا وعملنا حساب للى خالقنا
ووقفنا قصاد اللي خانقنا
هنقضي علي أي فساد
وهنرجع تاني للأمجاد
وده هيبقي أكبر نصر
وهنبقي أكيد أكيد في مصر