فوقوا بقى ..........

[فكري ابراهيم]

فوقوا بقى ..........

فوقوم بقىَ
يا أهل مصر المخلصين
المَجْمع العلمي اتحَرَق
واللي حرق
معرفشي مين !
دول ناس بقر ملهومشي دين
لاهُم قـَبَط
ولا مُسلمين
ناس جُم غلط
تحْدِف حجاره أو زلط
ترمي زجاجات اللهب
من غير سبب
دول يبقوا مين ؟
أو جُم منين ؟
ثوَّار بحق
واللا شوية مجرمين ؟
إندسُّوا وسط الثائرين
عاوزين بلدنا تتنِهِب
واللا تاريخنا ينشِطب ؟
واللا وطننا يروح لفين ؟
دول ناس أكيد متأجَّرين
لاكِن لصالح بس مين ؟
دا اللي بيحْرَق أرض مصر
مبيفهموش معنى الوطن
عايشين أكيد بره الزمن
ناس مجهولين
أطفال شوارع من زمان متشرَّدين
كبروا في مُستنقع عطن
أو في الزباله مطينين
فِضلوا قنابل مُزمِنه
مِتسابه مش مِتأمَّنه
تحت الكباري بدون عمل
في صدورها أحقاد كامِنه
كارهه تعيش من غير أمل
بالمُجتمع مش مؤمِنه
خططلها المتربصين
علشان تولـَّع في البلد
وتهز مصر الآمِنه
أطفال كتير ملهاش عدد
ملهاش أهالي أو سَنـَد
إستخدموها المُفسِدين
في حرْق أمجاد من أمد
حرقوا مقر البرلمان
إللي ف مخاض وبيتولـَد
....................
يا أهل مصر المُخلصين
فوقوم بقىَ
دي كنوز جمعناها بشقىَ
كانت حصاد كل السنين
حَطوا تاريخنا ف بوتقه
علشان تضيع الذاكره
في المحرقه
بإدين خفيَّه وماكِره
إصحوم بقىَ
زيحوا الكابوس عن صدرنا
واحموا حضارة مصرنا
رُدُّوا محاسيب الشيطان
قامت تشعلل بالنيران
واللي أكيد بتضـُرِّنا
......................
يا أهل مصر المخلصين
قوموا اكشِفوا هذا الخطر
قولوا الحقيقه في العَلـَن
دا قلوب كتيره بتنفطـَر
وقلوب معذبها الشـَجَن
قوموا الحقوا شويِّة عيال
ملهاشي أُسره أو سكـَن
عالجوها مهما كان مُحَال
ضموها في حُضن الوطن
متخلوهاشي لوحدها عايشه ف مِحَن
دول بُكره رح يبقوُم رجال
وهيرفضوا يعيشوم بغال
وهيخلقوا ليهُم مِهـَن
لاكن مجالها في الضـَلال
.....................
يا أهل مصر المخلصين
يا شعب مصر اللي انطلق
إحنا النهارده ف مُفترق
مصر الجديده بتنخلـَق
شوفوا بيحرق مصر مين
إحموا السفينه من الغـَرَق
سدوا الطرق ع المُفسدين
لموا جميع المجرمين
متخلوناش متفرَّقين
وتسيبوا مصر بتنخنـَق
يا شعب مصر المستكين
مصر العظيمه بتنحرَق
وازاي هتبقى بتنحَرَق
وانتـُم نيام ومطنشين
يا أهل مصر المُخلصين
فوقوم بقىَ

منقول