هاام *مواصفات ماده الاقتصاد والاحصاء*

[ahmed doula]

بسم الله الرحمن الرحيم

انا قررت اتكلم عن ماده الاقتصاد والاحصاء بالتفصيل الممل والمشل لانى واخدها وجبت الكتب فحبيت افيد على قد ماقدر اللى محتارين واللى مش عارفين نظامها ايه واللا بتتكلم عن ايه ((اكيد بتدعولى دلوقتى استنو قى اما تكملو الموضوع هتدونى فلوس كمان)))

انا هتكلم عن شويه حاجات كده فى المادتين دول بالتفاصيل بتاعتها بحيث مخليش فى نفسكو اى حاجه ولو هيبقى فيه استفسارات تانيه مقلتهاش انا موجود بردو

ركزوا بقى شويه معايا




>>تقسيمه المنهج<<

6 فصول اقتصاد + 5 ابواب احصاء



>>مواضيع المنهج<<

اولا الاقتصاد :المشكله الاقتصاديه , عناصر الانتاج , الدخل القومى والناتج القومى , الماليه العامه و الخصخصه و الموازنه العامه ,النقود والبنوك والبورصه ,التجاره و العولمه

ثانيا الاحصاء: الاحتمال , المتغيرات العشوائيه , الوزيع الطبيعى , الارتباط , الانحدار



>>عدد الحصص والمزاكره <<

الاقتصاد : 20-21 حصه (3+3+2+5+5+3) كل حصه= 3ّّّ~5 صفحات مزاكره + حل التدريبات على حسب لو خلصت الدرس

الاحصاء : 9 حصص (3+2+2+1+1) كل حصه = صفحتين مزاكره + 6 صفحات مسائل محلوله + حل تدريبات ((10 صفحات على كل درس))

يعنى كلو بالكتير 30 حصه يبقى لو كل اسبوع حصتين مثلا سبت وتلات هتخلص فى 15 اسبوع اى فى 3 شهور ونصف تقريبا وكل درس هياخد ساعه ونص مزاكره+ساعه حل تدريبات عليه



>>سهوله الماده او صعوبتها<<

دى بقى على حسب رغبتك لو هتذاكر بضمير هتبقى ماده هايفه وهتقفلها ولو عاملتها كانها ماده ملهاش لازمه هتاخد على دماغك ومش بعيد تسقط فيها

اما هى سهله لو انت ليك ميول ليها و لان الاقتصاد اصلا ماده جديده فانت متعرفش اصلا هى ايه فمش هتفرق معاك هى حلوه واللا وحشه انما الاحصا عندنا فكره عنها من اعدادى وهى كانت مع الجبر فلو بتحب الرياضه اكيد مش هتبقى مشكله عندك

بالاضافه الى سهوله فهم الماده وده يخليك متاخدش درس فيها وتوفر الوقت احسن تعمل فيه حاجه مفيده

وربنا الموفق على كل حاال



>>مواصفات الامتحان<<

الاقتصاد : مدته ساعه ونص وهو عبارع عن سوال اجبارى + 3 اسئله تختار منهم 2 وكله بيعتمد على الفهم والحفظ للماده ومفيش مسائل ولا حاجه من دى خالص وبالتالى فان كل سوال مثلا هياخد 20 دقيقه ((كتير اوى لو سهل ومتوسطين لو صعب)) وبعدين يتبقى وقت لمراجعه الاجابات او عمل اجابات اخرى

الاحصاء : مدته بردو ساعه ونص وهو عباره عن سوال اجبارى به مسالتين +3 اسئله اختيارى نختار منهم 2 وكل واحد فيهم مسالتين بردو يعنى مجموع مسائل الامتحان 8 نحل منهم 6 ولا يوجد بالامتحان غير المسائل وبالتالى كل النظرى اللى فى المنهج للفهم فقط عشان نعرف المسائل جت منين يعنى وطبعا كل مساله لو خدت 10 دقايق يبقى ميه ميه ((ومش هتاخد عشر دقايق على فكره عمرها)) ويتبقى وقت للمراجعه بردو او عمل اجابه تانيه

ملاحظه1/ الامتحانان فى نفس اليوم ولكن الاقتصاد بيكون الاول وفيه نص ساعه فرق بين الامتحانين
ملاحظه2/ كل امتحان عليه 25 درجه ومجموعهم 50 درجه
ملاحظه3/ الامتحان يقيس مدى فهمك للماده وبالتالى عشان تجيب الدرجه النهائيه لازم تكون مزاكر كويس اوى وده طبيعى
ملاحظه4/ يمكن التاكد من نواتج اغلب مسائل الاحصا بواسطه الاله الحاسبه الجديده fx 570 وده طبيعى بردو



>>المراجعه والنسيان على اخر السنه <<

الاقتصاد : مراجعته هتاخد حوالى 6 ايام ده لو خدت جزء منه وانت بتراجع كل يوم مع المواد التانيه

الاحصاء : المراجعه بتكون من كتاب المراجعه وده 4 صفحات بس !!!! يعنى فى عشر دقايق تكون مراجعها ويبقى فاضلك مثلا بقيه اليوم تحل مسائل (بس تكون فى يوم لوحدها)

يبقى هتاخد منك من الاخر اسبوع واحد مراجعه ((مثلا العربى بياخد 3 شهور؟؟!!!))

النسيان بيبقى شبه منعدم لانها ماده فهم فى المقام الاول



>>الكتب اللى هنزاكر و نحل فيها<<

الاقتصاد : الامتحان, وبيكون شرح + تدريبات + امتحانات , يعنى مش محتاجين غيره

الاحصاء : المعاصر , وبيكون شرح + مسائل محلوله مع الشرح + تدريبات + امتحانات يعنى بردو تمام اوى

وطبعا التدريبات كلها فى الكتابين مجابه



>>عدد صفحات الكتاب<<

الاقتصاد : حوالى 75 صفحه وده فى كتاب الامتحان (اللى بيفصل التفصيل الممل) انما المدرسى اقل من كده بكتير

الاحصاء : حوالى 80 صفحه وده بالمسائل المحلوله (اللى هى اغلب الكتاب) وطبعا المدرسى نص الرقم ده او اقل








كده الموضوع خلص بس اى حد عنده استفسار يتفضل وانا مش هتاخر ولو حد عنده حاجه يضيفها يتفضل بردو


وياريت من الاعضاء اللى خدوا علم النفس او خدوا فلسفه او حتى جغرافيا يعملو نفس فكره الموضوع ده بنفس الطريقه بس على الماده اللى خدوها عشان كله يستفيد ولكم الثواب

محدش ينسى يدعيلى ربنا يوفقنى

ويارب الموضوع يفيدكو كلكو