مبروك كسبت رحلة مجانية لشرم الشيخ!!

[الاسطورة]

النهاردة يا جماعة انا ها اكلمكم عن حكاية غربية قوى
بمعنى اصح نصباية غريبة قوى
امبارح الظهر وصلتلى مكالمة تليفونية من احد الاشخاص(هى سيدة يعنى)
انا :الو
هى :سلام عليكم حضرتك ده الرقم 0000000(تشبيه يعنى هى قالت رقم البيت الحقيقى )
انا :ايوة مين معايا
هى:معاك مندوب شركة (مش عارف ايه كده) مبروك يا فندم كسبت معانا رحلة اسبوع لشرم الشيخ او اختيار جهاز من بعض الاجهزة الكهربائية
انا :طيب يعنى بمناسبة ايه؟
هى :سحب تم على الارقام يا فندم ورقم سيادتك فاز.....حضرتك كسبت قبل كده؟
انا : لاو الله ما حصلش
هى :طيب الف مبروك يا فندم وسيادتك عشان تحصل على التفاصيل كاملة اتكلم على الرقم ده000 (رقم موبايل يعنى ) والف مبروك مرة تانية ...سلام عليكم
(وهنا ادركت ان الموضوع كله نصباية حلوة بس الفضول اللى عندى خلانى اتكلم على النمرة اللى اديتهالى )
انا :سلام عليكم
هو:عليكم السلام شركة .... اى خدمة؟
انا :حضرتك انا باتكلم بخصوص المسابقة والجوايز
هو:اهلآ وسهلآ رقم سيادتك كام ؟
انا : 00000 (الرقم يعنى )
هو:فعلآ يا فندم مبروك حضرتك كسبت رحلة ............(ونفس الكلام اللى فى المرة الاولى )
انا :طيب ايه هى تفاصيل التنفيذ؟
هو: حضرتك كل حاجة ها تعرفها لو تفضلت بالحضور غدآ الساعة 9 فى مكتب الشركة بالعنوان ....(وادانى عنوان )
انا :ايوة يعنى ايه هو تفاصيل الموضوع وايه المقابل؟
هو: يا فندم ها تعرف كل حاجة لو جيت بكرة فى الميعاد وكل حاجة مجانية هى جائزة مش اكتر ....منتظرين حضرتك....سلام عليكم
(وهنا انتهى الحوار والحقيقة انا ما فهمتش غير انها نصبة لكن عبارة عن ايه الله اعلم)
وطبعآ ما فكرتش انى اروح ولا حاجة
المهم النهاردة اقرأ فى الجرنال الخبر التالى :
القبض على عصابة بالجيزة تتصل بارقام التليفونات وتدعى فوز اصحاب الارقام برحلات واجهزة كمبيوترات وعند الذهاب فى الموعد المحدد يطلب منك مبلغ معين على سبيل زى التامين كده يعنى حتى ميعاد السحب واعلانك بجائزتك الفعلية ويقومون باخذ المبالغ ويهربون وقد تم القبض عليهم من خلال عدة بلاغات من عدة اشخاص..!!

مش ها اعلق بكلمة واحد لحد ما اشوف تعليقاتكم الاول .....