يعنى ايه بلسم وبيعمل ايه فى شعرك ادخلى بسرعه

[شذى العطر]

فيه بنات كتير اوى اوى بتعانى من مشاكل الشعر

سواء بقى كان خشن ولا مجعد ولا بيتلعبك بسرعه ومش بتعرف تسرحه ولا مدهنن كده وحالته تقرف
والمشكله انها مش بتلاقيله حل الا حاجتين يا اما تروح تفرد يا اما تروح تفرد يا اما تروح تفرد

قرفتينا عايزه ايه من الاخر يعنى تعالو اقولكو كل حاجه عن البلسم
فيه بنات متعرفش يعنى ايه بلسم اصلا ولا انه بيستخدم ازاى ولا انه بيتحط على الشعر ازاى ولا ايه اهميته اصلا يعنى اخرها تلاقى مكتوب شامبو وبلسم وتقلب على راستها وتفضل تدعك فيه وتشطف وتقول هيه غسلت شعرى

سمى الله كده واطلعى نورى الخمس لمبات الحلوين دول وتعالى بالراحه وانا هفهمك بالكلام العادى بتاعنا ايه هو البلسم ده وبيعمل ايه فى شعرك

بصى بقى البلسم ده بيخلى الشعر بيلمع وبيحميه من الجفاف عكس الشامبو الشامبو مبيعملش حاجه الا انه بينضفهولك من التراب والزيت او الكريم او اى حاجه بتيجى عليه طول اليوم يعنى الشامبو بينضف لكن البلسم بيحافظ

فايدته ايه ؟
1- البلسم بيعالج مشاكل الشعر زى النكشه او الهيشان و الجفاف والخشونه
2- بيحمى شعرك من الجو ورطوبته والتراب ازاى ؟. البلسم ده بيكون طبقه رقيقه خالص خالص بتغلف الشعر وبكده بيحميه من التراب والجو وبيديه لمعان وحيويه كده
3- بيفرد الشعر وبيفك العقد منه بيخليه ميبقاش ملعبك من الاخر

طيب ايه انواع البلسم ؟
1- بلسم فائق الترطيب
وده اللى بيستخدموه اللى شعرهم مجعد وخشن عشان يديله نعومه

2- البلسم الخفيف او اللى فيه زيت الامتصاص او زيت شجره الشاى او البلسم البخاخ
ده بيبقى للى شعرهم ناعم او دهنى لانهم فى الغالب مبيحتاجوش بلسم وممكن يستغنو عنه ولو استعملوه يحطوه على اطراف الشعر ومش يحطوه كتير كمان

3- بلسم قوى
وده للى شعرهم بيصبغوه وكان مصبوغ وبيتحط على وسط الشعر لغايه اطرافه

4- بلسم غنى
وده بيستخدموه للى شعرهم مفرود بس بيحطوه على اطراف الشعر بس مبيجوش ناحيه الجذور خالص

5- بلسم فائق الترطيب
ودول اللى بيستخدموه اللى شعرهم جاف وتالف يحطوه 10 دقايق

طيب ايه الطريقه اللى بتحطى بيها البلسم ؟
بصى انتى الاول بتغسلى شعرك كويس اوى بالشامبو المناسب ليه بعدين بتحطى شويه بلسم صغيرين على الاطراف سامعه الاطرااااااااااااف وتحطيها لمده 5 ل 10 دقايق بعد كده اشطفيه كويس بالمايه الدافيه يعنى لا سخنه ولا بارده عشان تنزلى اى زيادات من البلسم وبس كده سيبيه ينشف او بالفوطه خفيف خفيف لغايه ما ينشف

فيه نقطه مهمه جدا جدا جدا جدا
شامبوهات اللى بيبقى مكتوب عليها شامبو وبلسم اياكى تستخدميها
عشان ببساطه مينفعش تخلطى حاجه بتنضشف مع حاجه بتحمى ومش هتديكى اى نتيجه زى لما تستخدميه ده لوحده وده لوحده