الله يرحمك يا مصر

[حميد بدوى]

الله يرحمك يا مصر
بتموت مع كل جندى بيموت
وبتتعصر عصر

الله يرحمك يامصر
لما بيموت واحد أو أتنين
من أى بلد فى الدنيا
بتقوم الدنيا وماتقعدش
وأحنا اللى بيموتوا عندنا
مالهمش حصر

هو ليه دمنا رخيص ؟
هو دا قدرنا ولا دا قدرك يا مصر ؟؟
هو ليه الموضوع عندنا بقى عادى
والموت فيكى شىء أعتيادى
لحد أمتى هافضل أهاتى وأنادى ؟؟؟؟
أمتى هاتجيبى حقك يا بلادى
حزنى عليكى أكتر من حزن الموت
أول مرة أعرف أن فيه بلاد فى الدنيا بتموت
أول مرة أعرف ان فيه بلاد بتتلف فى علم
ويكون العلم كفن كفن وسكوت

الله يرحمك يامصر
أنا عن نفسى بقرأ الفاتحة
عليكى كل يوم العصر
ولا ليكى كيان ولا شكل
شاطرين نقولوا أم الدنيا
وأحفاد الفراعنة
وكلام كله نفخ فى نفخ
أكتر حاجة هاتتعمل الفين جنية
لكل شهيد
لاهله فى ظرف
ومفكرين ان الجندى اللى مات
لا دأنتى اللى موتى يا مصر

الله يرحمك يامصر
ويرحم جنودك اللى على الحدود
خير اجناد الارض والوجود
حقهم مش ان يتعملهم
جنازة عسكرية
ويقولوا اساميهم وصورهم فى النشرات الاخبارية
ولا حتى نتكلموا ونملوا الدنيا كلام
فى الجرايد والمواقع و القنوات الفضائية
ولا حتى التهديد والوعيد
وفى الاخر مفيش جديد
تعبنا من الاسطوانات دية
حقهم أننا ناخدو حقهم
لان دا مش حقهم لوحدهم
دا حقك يامصر
حقك أنك تاخدى حقك
من كل واحد خاين
وأرهابى وقليل الاصل
وأسرائيل مع الاسف
قدمت لنا فى شاليط
أكبر درس
دا كل واحد مات من جنودنا
بيمثل مصر
كان نفسى ماقلش
الله يرحمك يا مصر

الشاعر
عبد الحميد بدوى