اتكلمي با مصر

[بكري راشد يحيا]

سكت القلم
والدمع في العين انحبس
صرخ الألم
ليه حرفي في حلقي انخرس
وأنتي ياللي
بنيتي بيتك
عود محبة وعود حنان

وف غطانك
سقيت زرعك مِ الأمان
تنبت ورودك
في واديك أحلى مكان
تبقى للتاريخ كتابه
وفي شراينه النفس

قومي من صمتك ناديني
وشيلي من صدري
خنوعي اللي انغرس
اصرخي يا أمي قولي
خلي صوتك في ضميري

أقوى جرس
صحي من صمتي نهار

اللي في ليلك وبعدي
بيندرس
فجري نهرك بقلبي
يرجع النوّار يغني
بعد ما سرقوا ضياك
للعسس

أمسحي بأديك دمعي

خلي ظهري اللي انحنى
يصلب قوامه
زي الحرس

خلي صوتك في كياني
نجم يضوي
وف درب غربتنا ونس
نفسي أقولك مرة ياللي
كل نبضة شوق في عرقي
زي أحلام الغلابة ينهرس
طهري بدماء ولادك
توب زفافك م الدرنس
ارجعي يابهيه غني
وامسحي باديك همي
خلي أيامنا الحزينة
من تاريخك تنكنس