راتب شهر 10 سينقص مرة اخرى في بعض المناطق للمثبتين حديثا

[أ/مصطفى محمود]

بسم الله الرحمن الرحيم
*******
توجهت اليوم لمنطقتي
عسى أن استوضح أمر الخصم المفاجئ على الاقل بالنسبة لي
و لما واجهت رئيس الحسابات بالمنطقة
و هو رجل قمة في الاحترام صراحة
شرح لي لماذا تم الخصم
لكنه للأسف لم يقنعني !!!
لأنه صعب علي أن اقتنع برأي لا يمر على عقلي و يقتنع به
***
اليكم ما توصلت له من حوار باختصار شديد و بلغة عامية بحته

العبد لله/ ليه تم الخصم منا هذا الشهر ؟
رئيس الحسابات / ضحك..و هيتخصم منكم الشهر الجاي 10
العبد لله/ كمان ..هي ناقصة
احنا فهمنا الشهر ده عشان نتصدم باللي جاي
ر/ تم الخصم منكم بسبب تجريد العلاوات على مربوط الدرجة 48
العبد لله/ لماذا ؟ انا قمت باجتياز الكادر من 2009 و من المفروض تعييني على قانون الكادر
و ده معناه حساب كل شئ على آخر أساسي و ليس على قانون 47
ر/ لا مفيش حاجة اسمها قانون كادر ، الكادر ده شئ إضافي زي الحافز
العبد لله/ ضحكت..يا أستاذي في حاجة اسمها قانون 155 كادر المعلمين
يقضي بتعيين كل من مر عليه سنتان و يتم احتساب كل شئ على آخر أساسي
و ده المعمول به في التربية و التعليم وهو الصحيح
ر/ مش عارف لكن تم احتساب كل شئ من تاريخ صدور قرار التعيين في 9/2011
العبد لله/ يعني السنين اللي فاتت راحت هدر
ر/ لا باذن الله يعملوا ليكم تسوية ، و يتم ضم المدة ، و ساعتها مرتبكم هيزيد أكتر مما تتخيلوا
و ممكن ناس فيكم تستحق الترقية للدرجة الأعلى.
العبد لله/ ده بعد عمر طويل باذن الله..حضرتك عارف حبال الازهر طويلة
ر/ لا في ناس تم ضمها ليهم وبدءنا في التسوية
العبد لله/ عموما لو لم يتم ضمها عن طريق الازهر ، فالقضاء بيننا
طيب و بالنسبة للخصم الشهر اللي جاي ؟
ر/ أه ده عشان تم تجريد العلاوات فقط لكن سيتم ارجاع الاجر الشامل من 240 الى 226
و بكده هيخصم منكم حوالي 25 جنيه
العبد لله/ بارك الله فيكم ، وفي الازهر ؟
حضرتك متأكد من الكلام ده
ر/ أيوه طبعا و وصلت كارتة المرمتب الجديدة و بنراجعها
العبد لله/ طيب هل ينفع شخص لم يجتاز الكادر ، يأخد بدل الاعتماد ( مرحلة تانية )
ر/ لا طبعا..
العبد الله / طيب 3/4 معلمي الازهر حصلوا عليه من فترة مثل من اجتاز ، و مكتوب لهم في قصاصة المرتب زينا بالظبط ، حتى اللي رسب في مكون في اختبار 2009 بياخد عادي..تفتكر ده تفسيره ايه.
ر/ مش عارف والله...يا راجل هو حد فاهم حاجة في الازهر
العبد لله/ ضحكت...و تركته من أين أحصل على قصاصة راتب هذا الشهر
ر/ من الأستاذ فلان..مسؤول ماليات معهدكم
******
ضحكت في نفسي و قلت هذا هو الازهر
*****
ذهبت للأستاذ فلان المسؤول المالي لمعهدنا
السلام عليكم
المسؤول / و عليكم السلام
العبد لله/ (بضحكة صفراء مني )..ينفع كده هتخربوا بيوتنا يتخصم مننا 100 جنيه مرة واحدة
المسؤول / (ضحكة من خلف السيجارة) و الله لو بايدي لأديكم من جيبي.
لكن ما باليد حيلة
و قلت له ما قلته سالفا مع رئيس الحسابات
و تقريبا أخبرني نفس الاجابات..مضيفا
المسؤول / ده حتى وصلت قصاصات شهر 10 أهيه و هي أخر خصم سيكون باذن الله
و ربنا ييسر يسوولكم ..ويزيد تاني مرتبكم و يتم ترقية من يستحق.
أنا شفتها كما ستشاهدونها
العبد لله/ و تفتكر موضوع التسوية ده هيتم فعلا.. ولا نتجه للقضاء
المسؤول / أه ان شاء الله..انت ارفع بس الوجبة
العبد لله/ طيب ممكن اصور القصاصة بالموبايل
المسؤول/ لا انت اتفضل صورها و هاتهالي تاني عشان لسة بنراجع بعض الاسماء هيتخصم منهم ..
العبد لله/ خصم ايه تاني ؟
المسؤول / لا ده لبعض الناس اللي هما رسبوا في بعض المكونات فقط ، مرتبهم هينزل جامد اكتر من كده لانهم هيخصموا منهم الكادر كاملا لحين الاجتياز
العبد لله/ طيب مش حرام..مهو في ناس بتاخده بالكامل زي فلان و فلان...( مشيرا باصبعي لزملاء دخلوا الكادر في شهر 7 الماضي فقط .. و حصلوا على الكادر معنا ، الى الان على الرغم من عدم ظهور النتيجة بعد..) ده ليه تفسير تفتكر
المسؤول/ مش عارف والله..هو حد فاهم حاجة في الازهر

********
أخذت القصاصة التي ستشاهدونها و في عقلي نتيجة واحدة ليست أخرى
هو في حد فاهم حاجة في الازهر
نعم
هذه هي الحقيقة الواضحة
فوضى و فشل قد يكون بعض أسبابه فساد
لكن بالتأكيد السبب الرئيسي فيه
هو حد فاهم حاجة ( عدم الفهم )
***
اليكم صور من قصاصتين
احداها لراتب شهر8/2012 براتب 770 جنيه تقريبا
و الأخرى لشهر 10/2012 القادم براتب سينزل عن الشهر الحالي من 670 الى 647 أو 249 للمتزوجين ، ولا اعلم كم سيكون لمن لم يجتاز الكادر في 2009




و عمار يا أزهر//
حسبي الله ونعم و الوكيل
اللهم ولي من يفهم