احتكار العلم حرام .. الثانوية العامة

[مسلمة22]

السلام عليكم



الاحتكار حرام و احتكار العلم اشد حرمة ، هي ليه الدولة بتحتكر العلم ، ليه بتحدد ان عشان تدرس العلم الفلاني لازم تجيب مجموع كذا ، طيب هو العلم ده ملك للدولة ولا ده ميراث الانسانية ومش من حق حد يمنع حد من دراسة هذا العلم



ليه الحكومة تمنع واحد من دراسة الطب ولا دراسة الهندسة ، هي كتب ومراجع الطب دي ملكها ، ما اللي جايب 50 % هو حر عايز يدرس طب ما يدرسه و اللي مش واخد ثانوية و عامة وواخد دبلوم ولا مش واخد اي شهادة دراسية برضو من حقه يدرس العلم اللي عايزه ، و اللي عنده 60 سنة ولا 70 سنة من حقه برضو يدرس اي حاجة عايزاها


طيب مش خسارة الطالب اللي جايب 95 % ومعرفش يدخل طب ، مش ده كان ممكن يبقي طبيب ناجح و يفيد البشرية كلها ، وممكن طالب تاني جايب 100 % وقدراته مش مناسبة لكلية طب بس هو المجموع اللي دخله و خلاص


طيب ازاي بقي تتنظم العملية دي عشان منلاقيش 2 مليون واحد عايزين يدرسوا طب و 2 مليون واحد عايزين يدرسوا هندسة



ازاي نقلل عدد طلبة الكليات عشان ميبقاش في فائض في الخريجين مش لاقيين شغل


1- الغاء التعليم المجاني ، دافعي الضرائب مش ملزمين يعلموا واحد في كلية طب ولا حتي يعلموا واحد في الحضانة ، مفروض كل واحد يصرف علي نفسه عشان يتعلم ، و كمان مش يصرف عليه ابوه ، هو الطالب مفروض يصرف علي تعليمه الا اذا كان ابوه قادرا و باختياره الحر عايز ينفق علي تعليم ابنه مش الحكومة بتجبره علي كدة



2- ان الدولة ترفع يدها تماما من الوظائف ، عشان متبقاش الوظائف الحكومية تكية ، و ناس بتاخد حصتها في المال العام بس عن طريق الوظيفة ، مفيش دولة فيها 6 مليون موظف غير في مصر


3- المعاشات و التأمين الصحي ده يبقي من حق جميع المصريين مش من حق موظف الحكومة بس ، و كدة يبقي الناس مش حتتقاتل علي الشهادة و الوظيفة



4- قانون العرض و الطلب هو اللي حينظم عدد الدارسين ، لما ناس كتير تدرس علم معين و بعدين يلاقوا نفسهم مفييش وظايف ليهم ، حيبتدي عدد اقل يدرس ، حنلاقي العدد اللي بيدرس علي قد الوظايف المطلوبة



5- اعلام الدولة مفروض يحترم كل المهن و يطلعها بصورة كويسة مش زي ما بيحصل دلوقتي ، بقي فيه مهن درجة اولي و مهن درجة تانية و مهن حقيرة و ملهاش قيمة و للأسف المهن اللي الاعلام بيعتبرها حقيرة هي المهن الحرفية اللي هي عصب الانتاج و اللي محدش يستغني عنها


6- مفروض نرجع دور الام و مكانها في بيتها مش زي ما لازم يجيبوا طفلة صغيرة و يسألوها انتي عايزة تطلعي ايه لما تكبري طبعا البنت مش فاهمة حاجة و تقول اي مهنة شايفاها قدامها حتقول ايه مدرسة دكتورة ، مفيش طفلة بتقول عايزة اطلع الام ، تعليم البنات ده مكلف و بياخد اماكن في الكليات و في الاخر هي مكانها هو بيتها