الجزء التاني للناس اللي عندها امتحانات .. حصلك ظرف ومذاكرتيش الحل هنا الله الله الله

[العبد الخاضع لله]

انهاردة بقى هحكيلكم الجزء التاني من حكايتي مع سنة ساتة طب

والمواقف اللي هكيحها دلوقتي مش بحب اقولها لحد .. وهتعرفوا ليه لما تقراوها ..

ولكن في ظل الإحباط والاكتئاب اللي أنا شايفه من الكل ..قولت لازم نرفع الروح المعدنية بتاعة الاعضاء حبتين ونحكيلهم عن امتحانات مادة النسا


وادوني فرصة بقى اطلع الكبت اللي شايله جوايا للنسا

المادة طبعا مش اي حد تاني .. محدش يفهمني غلط

النسا دي مادة .. قول فيها زي ما انت عايز تقول

معفنة .. مقرفة .. خنيقة ..

طويلة جدااااااا .. وصعبة جداااااااااااا ..

ودكاترها طبعا مش محتاجين وصف .. واسئلتها فوق الخيال ..!!
حاجة كده تجيب للواحد إكتئاب من قبل ما يبص على الكتب بتاع المادة !!!
وأنا عمري لو هيقطعوني حتت مش هتخص نسا !!
فكنت اصلا مش بقبلها .. ولا كنت بحضر لها محاضرات ولا سكاشن ولا بفتحها طول السنة ..

الله المستعان ..


ولكن ..

دقت ساعة الصفر ..

ولقيت الشهور عدت جررررري ..

ولقيت نفسي خلصت امتحان الجراحة وقدامي حوالي 3 اسابيع على امتحان النسا

الله اكبر ..


انا لسه مفتحتش اي كتاب .. لسه العملية بيضا خاااااالص ..
ولا اعرف كلمة في المادة !!!


والمادة اصلا عبارة عن جزئين .. نسا + توليد

ولكن قولت بفضل الله المُدة دي تكفي ان الواحد يقرأ كل كتاب مرتين كده وندخل الامتحان وربك يسترها ..

اصل انا علشان اذاكر كتاب النسا لوحده او التوليد لوحده محتاج شهر !!

نقراهم بقى ع السريع كده .. وربنا يفرجها ..

وحطيت جدول لنفسي ..هذاكر كتاب النسا في اسبوع والتوليد في اسبوع وارجع الكتابين الاسبوع التالت

تمام اوي كده ..

بدأت مذاكرة ..لقيت العملية مقفلة ..

المادة مش عايزة تتذاكر ..

وخصوصا اني بفتحها لاول مرة مش فاهم اي حاجة

وده خلاني يا دوب اخلص جزء في كتاب النسا في اول اسبوعين

يا نهار !!

ده فاضل اسبوع !!

رميت النسا وقولت امسك التوليد بقى الاسبوع ده

ويشاء ربنا اني امرض مرض شديد جدااااااااااااااا اول يوم في الاسبوع .. من قبل ما افتح كتاب التوليد !!!

قولت خير .. مش مشكلة يوم .. ان شاء الله هتحسن بكرة وهبدا اذاكر ..

ولكن المرض اشتد جدااا .. لدرجة اني كنت عمال اهلوس من التعب.. واخدت كل الادوية والمضادات الحيوية ..ولكن بدون اي فائدة !!!

يوم بيعدي ورا يوم ، وانا راقد على السرير ومش بفتح كتاب !!

لحد يوم الجمعه .. الاسبوع عدى خلاص .. وصابح عليا امتحان يوم السبت !!!!

دماغي كانت هتتفرتك من التفكير !!!

يا نهار بالالوان !!

يا دي المصيبة !!

هتتدخل الامتحان ازاي ؟؟؟

انت كده شايل شايل !!!

انا على اخر الطب أشيل مادة !!

ده انا اجيب العار للعيلة كلها !!!

ده كان بابا يضربني بالنار في ميدان عام

كارثة طبعا !!

هتعمل ايه يا عم الحاج ؟؟؟؟؟؟؟؟؟؟؟؟؟؟؟

مفيش غير التأجيل .. لازم وحتما ولابد اروح أأجل المادة الصبح ..

والتاجيل في الطب معناه اني همتحن المادة مع الدور التاني ولكن بنفس الدرجات .. مجرد فرق وقت في معاد الامتحان ..

تمام اوي كده ..

بس لازم برده اعرفهم في البيت اني هاجل ..

نزلت اقول لامي .. قالتلي على جثتي ..!!
لا يمكن ابدا ..تأجل وتقعد تستنى لشهر ستة بعد ما زمايك كلهم يكونوا استلموا الشغل .. ابدا .. ده مش ممكن يحصل !!

يا ماما انا مذاكرتش غير كتاب واحد ..نص المادة يعني .. ويارتني ذاكرته .. ده بس قريته .. وياريتني قريته .. ده انا قريت شوية منه !!!

دماغها والف سيف ..ابدااااااااا

يهديكي يرضيكي .. هشيل المادة يا ماما .. وانتي مترضيش كده ..

تقولي شيلها ولا انك تأجلها !!

طيب ليه الأذيه دي بس ؟؟؟

أهو كده !!

روح بس يابني وانا هدعيلك ..

طيب .. طالما هتدعيلي يبقى شايل شايل !!!

الله المستعان ..

روحت كملت نومي وقولت اصحى باليل اقرا كلمتين لعل وعسى ..

صحيت باليل .. لقيت دماغي هتنفجر من كتر التفكير ..

هو انت ممكن تنجح يا واد ؟؟؟؟

هي الاجابة ممكن تبقى اه .. بس ده في حالة واحدة .. لو واحد راح امتحن بدالي !!!!

اصل مينفعش .. واحد مذاكر نص المادة ..يعني امتحان النظري 10 اسئلة ..5 نسا و5 توليد
التوليد خلاص انا ضامن فيه صفر كبييييييير .. مفيش فيه امل!
الخمسه الباقيين بتوع النسا بقى ..مصيبة كمان ..لاني انا مش ضامن ولاسؤال فيهم ..انا يادوب قريت جزء من الكتاب!!

ولو يا سيدي افترضنا ان حصل معجزة وحليت اسئلة النسا كلها في النظري اجابة زي الفل ..ازاي متعرفش .. لو حصل كده ..هتاخد 50 % من الدرجة .. وده مش كفاية علشان تنجح في الورقة !!!

ولو افترضنا حاجة برده خيالية كده انك حليت اسئلة التوليد كمان..انا بقول هنفترض مثلا مثلا يعني انه حصل ..
هتعمل ايه بقى في باقى الامتحانات اللي كلها بالمنظر ده ..؟؟

عندك امتحان MCQ ..اختياري يعني .. هتعمل فيه ايه ؟؟؟
عندك امتحان OSCE .. صور وحالات ..هتعمل فيه ايه؟؟؟
عندك امتحان عملي .. هتعمل فيه ايه ؟؟
عندك امتحان شفوي ..هتعمل فيه ايه ؟؟

بص يابني .. انت نسبت انك هتشيل مليون في المية .. متفكرش كتير..

يلا معلش .. لكل جواد كبوة ..
اهم شي ..اللهم لا تجعل مصيبتنا في ديننا

توكلنا على الله ..

الساعة كانت بقت 2 صباحا ..

هتروح فين ..؟؟؟
ع السجادة عدل .. هو انت ليك غيره ؟؟؟؟

طبعا لأ ..

ده ربنا على كل شئ قدير ..
ده امره للشئ ان يقول له كن فيكون ..

ده النبي صلى الله عليه وسلم بيقول لا يرد القدر إلا الدعاء..

بس ما اخبيش عليكم .. مش عارف انا ممكن ربنا ينجحني ازاي ..؟؟!!
عمال اجيبها يمين شمال مش راضية تيجيي..

ولكن .. قولت لازم ادعي وانا على يقين تام ..
الله على كل شئ قدير ..
وهو مسبب الاسباب .. اللي كل مرة مبتوقعهاش !!
مهما حسبتلها ولقيتها مقفله .. هتلاقي ربك بيفتح بواب من حيث لا تحتسب

قومت صليت ودعيت واستخدمت كل الاسلحة الممكنة في الدعاء زي ما عملت في الجراحة ..

وعلى طول معايا دعاء تفريج الهموم ..

الفجر أذن ..روحت صليت واستغليت فترة بين الاذان والاقامة اللي الدعاء فيها مستجاب واشتغلت دعااااااااااااااااااااء

وسبحان الله ..

يا دوب الصلاة خلصت .. وبعد ما كنت هموت من التوتر والقلق ودماغي هتنفجر .. حسيت براحة وطمانينة في قلبي غير عادية ..

سبحانك ربي ..

الساعة بقت 8 ..

نقوم نروح لمصيرنا المحتوم بقى ..

وصلت لللجنة .. لقيت زمايلي اللي مخلص المادة 10 مرات وبيقول انه قلقان علشان ملحقش يراجع ..واللي مذاكر ومراجع بس فيه صفحة مذاكرهاش كويس ..واللي واللي ..

طبعا انا مش تبعهم .. انا داخل امتحن حاجة تانية غير النسا

الله المستعان ..

قعدت في الفترة اللي قبل الامتحان دي اقرا اي حاجة ..فتحت كتاب التوليد وبصيت على موضوع على السريع كده ..

ولقيت الساعة بقت 10 ..

توكلنا على الله ..

دخلت الامتحان .. ومسكت الورقة .. قلبتها على وشها .. مش عايز اشوف الاسئلة ..بلاااااااااااش ..


ولكن قعدت اقول الدعاء المعهود بتاع تفريج الهموم .. وقلبت الورقة ..
لقيت ايه بقى ...؟؟؟


لقيت 5 اسئلة نسا و5 اسئلة توليد


عارفين يا عم الخفة ..



وبعدين؟؟

ال5 بتوع النسا كلهم من الحاجات اللي قريتها بفضل الله .. والحمد لله فاكرهم كلهم ميه ميه ..الحمدلله ..

يا كرمك يارب.,.,

ايه بقى اخبار ال5 بتوع التوليد ؟؟؟

ودي بقى سبحان ربي الحاجة الي ابكتني ..

اول سؤال سؤال عبيط كده من التشريح بتاع سنة اولى ..
وعمره اصلا ما يجي سؤال في امتحان توليد ولو انطبقت السما على الارض ولكن سبحان الله !

تاني سؤال من مادة الاطفال بتاع سنة خامسة وكنت مذاكره كويس في الاطفال !

تالت سؤال من مادة الباطنة بتاع سنة خامسة وده بالذات كنت حافظه صم من الباطنة !

رابع سؤال . السؤال الي كنت قريته قبل ما ادخل الامتحان !!

خامس سؤال .. مذاكرتوش ..بس اجابته ممكن تتألف !

يآآآآآآآآآآآآآآآآآآآآآآآآآآآآآه . انا كنت طاااااااااااااير من الفرحة ..
انا مش مصدق ..
هو فيه كده ؟؟؟؟؟؟
هو فيه كده بجد ؟؟؟؟؟

انا شخص عادي جداااااااااااااا ..
ممكن ربنا يكرمني الكرم ده كله ويعمل ده كله علشاني ؟؟

يا كرمك يارب ..

خلصت الامتحان وروحت البيت لقيت الحاجّة في وشي .. طمنتها بفضل الله ..
وقولتها ادعيلي بقى تكمل على خير ..
معرفش ازاي برده هتعدي ..؟
بس بعد اللي حصل ده ، انا بقى عندي يقين في ربنا مش عند اي حد !

-------

ندخل على الامتحان اللي بعديه .. ال ام سي كيو .. الاختياري ..

وكان قدامه يومين .. يعني مش هلحق اذاكر برده اي حاجة ..

انا هدخل وخلاص ونحل بالبركة كده .. او نختار كل الاجابات رقم 1 واكيد هيطلع فيهم نسبة صح

لقيت ورق كده كان فيه اسئلة امتحان السنة اللي فاتت ..قولت احله وادينا بناخد بالاسباب ..

وحانت اللحظة المصيرية التانية ..

100 جملة اختياري .. هتعمل فيهم ايه ؟؟؟

تصورا ايه اللي يحصل ؟؟؟

70 جملة من الامتحان منقولين بالنص من امتحان السنة اللي فاتت ..

الدكتور اللي بيحط الامتحان مكنش يعرف ان امتحان السنة الي فاتت اتسرب .. لانهم المفروض بيلموا ورق الاسئلة كمان مع الاجابة ..

فقام حاطط 70 جملة من امتحان السنة الي قبلنا.. وبفضل الله حليتهم كلهم .. والباقي حليت فيه نسبة كبيرة صح بفضل الله ..

أنا مش مصدق !!

يا كرمك يارب ..

-----------

ندخل على الامتحان التالت علشان انا طولت عليكم جامد ..

الامتحان التالت كان حاجة اسمها اوسكي .. صور وحالات وعليها اسئلة ..

وكان قدامه يومين برده ..!

وطبعا الصور بالهبل والحالات بالهبل ..هشوف ايه ولا ايه ..
وهحل ازاي اصلا وانا مش مذاكر ؟؟!!!!

قولت ناخد بالاسباب ونشوف شوية صور ونقرا كلمتين ..

وحان موعد الامتحان المصيري التالت ..

والله العظيم كان قلبي طاير .. اول 3 اسئلة كانوا زي الفل ..
وبعدهم جت صورة صعبة جدا قليل اللي عرفها ولكن بفضل الله كانت من ضمن الحاجات اللي شوفتها ..
وكذلك الحالات ..
يعني انا حليت في الامتحان ده زي اوائل الدفعه بالظبط ))

انا مش مصدق !!!
يا كرمك يارب ..

باقى على الحلو زقتين ..

امتحانين ونخلص ..

الشفوي والعملي ..

استرها يارب ..

-----


وقولتلكم قبل كده اني مش بخاف من امتحانات الشفوي والعملي غير من التهزيق ..
اصل النظري ممكن مكتبش حاجة في الورقة ومحدش هيقولي حاجة ..

انما لو دخلت لدكتور وانا مش ماذكر بالمنظر ده هيفرج عليا الدفعة كلها !!!

خوصوا بقى اني ممكن ادخل اللجان كلها واتسأل في التوليد بس اللي انا معرفش فيه اي حاجة !

ولكن ..

الله ربي ..

عارفين يعني ايه ؟؟؟

ويقيني انه لن يضيعني ..

وطبعا قيام الليل والدعاء والاسلحة كله شغااااااااااااااااااال ..

وحان موعد الامتحانين الشفوي والعملي في يوم واحد ..

لازم يظبطونا في يوم واحد علشان الجرعة تكون كافية انك تكره نفسك بعد كده !

وزي ما قولتلكم ..دكاترة النسا حاجة تعقيد ... ناس كارهه نفسها أصلا !!!

الله المستعان ..

توكلنا على الله ودخلنا العملي .. انا و3 زمايلي اخدنا نفس الحالة ..
واحنا التلاتة هنمتحن عند دكتور واحد .. ودي مصيبة !!
لان الدكتور هيعرف كل صغيرة وكبيرة في الحالة وهيسألك عليها .. ده غير انه مش هيكرر الاسئلة علشان زميلك بعد ما يخرج ممكن يقولهالك ..فهيخترع اسئلة !!

سترك يا ستير !!

اول واحد من زمايلنا دخل ..طلع من عند الدكتور وهو بيكلم نفسه !
اتظبببببببببببببببببببببببببببببببببببط
اتسئل اسئلة من المريخ مش من المادة اطلاقا !

قولت للتاني ادخل انت وخلوني للاخر علشان اقرا كلميتن يمكن يسالني فيهم ..
دخل التاني ..وخرج وهو اسوأ حالا من الي قبله !!

وجه الدور عليا .. ادخل يا حلو
وسبحان ربي .. لم يضيعني الله ..
والله العظيم انا الوحيد اللي اتسألت اسئلة عادية جدا من المنهج .. زي حالتك ايه ؟ ليه شخصتها كده ؟ تعالجها ازاي ؟
وخلصت اللجنة !

وانا مش مصدق!!
يا كرمك يارب ..

-----------

هاااااااااااانت خلاص ..
كلها لجنة ..

مبقاش فاضل غير الشفوي
ورحت اشوف اسمي ..لقيتني همتحن عند رئيس القسم !!
يا نهار الوان !!
شكلها هتختم بشوية تهزيق محترمين ..!!
عديها على خير يارب ..

وكنا 10 هنمتحن عند الدكتور ده ..
قولت اخلي نفسي للاخر برده ..
دخل 3 من زمايلنا ..
وبعدين ...مش هتصدقوا اللي حصل ..!
الدكتور واحد اتصل بيه وخرج ومارجعش تاني !
وقاموا جايبين لنا دكتور لسه صغير كده يمتحنا بدل رئيس القسم !
ودخلت امتحنت عنده .. سألني 3 اسئلة بس واداني الدرجة النهائية !!

وخرجت من الجنة وانا بكلم نفسي بجد بقى !
اييييييييييييييييييييييه ده ؟؟؟؟؟؟؟؟
والله العظيم ولا كأني في حلم ...

واللي مش خلاني مش مصدق اكتر ..لما شوفت زمايلي اللي هما اصلا اوائل دفعه حصلهم ايه .. الدكاترة مسحوا بكرامتهم الارض !
سبحانك ربي ..ادخل وانا مش مذاكر ومتهزقش واخد الدرجة النهائية كمان !!

ده اسمه ايه ده ؟؟؟؟؟

يآآآآآآآآآآآآآآآآآآآآآآآه..

الخمس امتحانات يعدوا بالمنظر ده !!!


الله رحيم ..
الله كريم يا جماعه ..
يقول النبي صلى الله عليه وسلم :
( إن ربكم تبارك وتعالى حيي كريم ،
يستحي من عبده إذا رفع يديه إليه أن يردهما صفرا )

سبحانك ربي..
سبحانك ربي..

*********

كده انا خلصت حكايتي مع النسا ..

وطبعا كلكم عايزين تعرفوا انا نجحت ولا شيلت المادة ؟؟؟

عايز بس الفت نظركم اني محضرتش ولا محاضرة ولاسكاشن ولا امتحانات اعمال سنة ..فدرجات الغياب وامتحانات اعمال السنة كلها ضاعت عليا .. حوالي 80 درجة ..

والمادة من 500 .. تتوقعوا انا جبت كااااااااااااام ؟؟

جيبت 400 من 500 ..
جيد جدا مرتفع

يعني في كل الامتحانات بتاع اخر السنة نقصت 20 درجة بس ..
يعتبر مقفل كل الامتحانات ..

ايه رأيكم بقى ؟؟؟

حد بعد كده هيقول ان فيه حاجة اسمها مستحيل ؟؟

طالما معاك سلاح ( يارب ) اوعى تقول مفيش حل ..

الله على كل شئ قدير ..

بس الفيصل في الدعاء هو اليقين ..

لازم تكون على يقين تام بالاجابة ..لاااااااازم

حد بعد كده لسه عايز يعصي الملك الكريم ؟؟؟

حد لسه مقتنعش ان طريق السعادة وتفريج المشاكل الهموم هو طريق واحد ..
طريق ربنا ؟؟؟

لسه برده يا اختي مش عايزة تغيري لبسك وتلبسي حجاب صح؟؟؟

لسه برده يا اخي مش عايز تغض بصرك عن ما حرم الله ؟؟

يارب تكون رسالتي من الموضوع وصلتلكم ..

ومعلش وجعت دماغكم ورغيت كتير ..

ربنا يوفق الجميع في امتحاناتهم ..

ولا تنسوني من صالح دعائكم ..

منقول من منتدى اسلامى