أمتى هاتحترم مصر أهلها

[حميد بدوى]

أمتى ها تحترم مصر أهلها؟؟؟
عملنا ثورةغيرت العالم
وكل حاجة عندنا لسه على وضعها
بيقولوا عليها أم الدنيا
وأنا بقول محروق أبو الدنيا وأمها

مش عايز حد يقولى العيب مش من البلد
العيب فى شعبها
وأنا بقولكم شعبها شاف الغلب
وشال الطين ولا حد قاله انت مين
وعاش غريب ومات غريب عنها
ولا عمرها قالتله أزيك
وكل يوم بتلعنه وبترفسه برجلها
وكأن هو عدوها
مع أنه طول عمره بيدافع عنها

ياريت ياناس حد
يكلمها ويفهمها و يقولها
ملعون أبو البلد اللى
ماتقدرش وما تحترمش
وما تعرفش قيمة شعبها

دا هو نبض قلبها
وهو أملها وضي شمسها
وبسمة عمرها
وحلمها وهو اللى هايبنى مجدها
وهو برضة اللى بيموت
كل يوم تحت عجلات قطرها
هو صحيح الموت من عند ربنا
بس الاهمال فى دمها

وكأن لا هى مننا ولا أحنا منها
ما أحنا اخر همها
وبقينا أرخص حاجة على أرضها
ياريت حد يكلمها ويقولها
أن أحنا خلاص زهقنا وفاض بينا منها
والصبر نفسه عايز صبر تانى عشان يصبرنا
على قساوة قلبها

الشاعر
عبد الحميد بدوى