عجائب مدرسى الأزهر

[حسام الدين ريه]

اقدم لكم اليوم بعضا من عجائب مدرسى الأزهر وليس كلها فهى اكثر من ان تحصى فى مقال واحد. خد عندك:
1- نجح فى الليسانس بالغش وفى الكادر بالغش وفى التربوى بالغش وبعدين يقول لك الغش حرام وعاوز يمنع غش الطلاب ، والطلاب بيسخروا منه طبعا فى سرهم . اصل ما فيش حاجة بتستخبى
2- يرفض امتحان الكادر والتربوى وامتحان الإعارة ويقعد يشتم فى الازهر وادارته ، ولما يقدم لعقد عمل فى اى بلد عربى يهروه امتحانات ومقابلات وبعدين يترفض من غير حتى كلمة شكر او اعتذار او مبررات وبعدين يرجع لهم تانى لما ينزلوا اعلان جديد . عادى جدا ايه المشكلة
3- لما يسافر ويلاقى الطريق مقطوع بسبب بعض الاهالى يقعد يسب ويلعن ، ولما يلاقى السواقين عاملين اضراب وما فيش مواصلات يقعد يسب ويلعن ، ولما يروح مستشفى ويلاقى الدكاترة عاملين اضراب يقعد يسب ويلعن ، ولما هو ييجى ايام امتحانات الشهادات الازهرية والطلاب واولياء الامور على اعصابهم ويعمل هو اضراب يبقى عادى ما فيش اى مشكلة خالص

4- لما يكون طالب يبقى نفسه يخلص ويشتغل ، ولما يخلص وما فيش شغل يبقى نفسه يشتغل ولو بالحصة او بالعقد ، ولما يحصل يبقى نفسه يتثبت ، ولما يتثبت يبقى نفسه يضم سنوات التعاقد للخدمة ، ولما يحصل ويبقى نصابه 25 حصة يبقى عاوز 20 وبعدين يبقى عاوزهم 15 لا 10 لالا 5 لا وكيل متفرغ احسن حاجة
5- عمره فى حياته ما عمل اضراب ولا مظاهرة من اجل تطبيق الشريعة ولا للنهوض بالازهر ولا للدفاع عن مسلمى بورما ولا غيرهم. كل اللى يهمه بس مكافأة الامتحان والكادر والحد الأدنى والأساسى المجرد ده بس اللى يستاهل بصراحة الاضراب حتى الموت. عندك حق100%
6- يدخل امتحان الاعارة يخرج يشكر فى الموضوعية والشفافية ولما النتيجة تبان واسمه مش موجود تبقى واسطة وكوسة ومحسوبية . ولما يقدم لعقد فى قطر وعمان والامارات برضه يشكر فى الامتحان والمقابلة ولما اسمه يسقط من المقبولين لا يجرؤ ان يتكلم بنص كلمة
7- بيشتغل اى شغل وبيزوغ زى ما هو عاوز وبيقبض وبيشتم ، ولو سافر بره يطلع عينه فى الشغل وفى الغربة ويذلوه ويهينوه ويستعبدوه باسم الكفيل وعلى اى غلطة او تهاون يترحل فورى وربما يتجلد زى الدكتورة نجلاء فى السعودية وسبحان الله على قلبه زى العسل
8- لما بيشتغل اقل شغل ده لو اشتغل وبيقبض ويشتم شيخ الازهر اللى شغال ليل ونهار جوه وبره وما بيقبضش ولا مليم من يوم ما مسك المشيخة. ما هو برضه الشيخ الطيب هو اللى غلطان
9- لما كل شويه مرتب المدرس بيتحسن عن الاول شويه شويه ونلاقى مستوى الطلاب والتعليم عموما فى النازل. طيب نزود مرتب المدرس ليه بالعقل يعنى حد يفهمنى . بأمارة ايه ليك عين تطلب الزيادة؟
10- لما المدرس بيشتغل بعد الظهر فى الدروس الخصوصية او غيرها ويقول لك لو الحكومة زودت لى المرتب مش هاحتاج اشتغل شغلانة تانية . بيحسسنى يعنى لو قبض 5000 جنيه فى الشهر هايحمد ربنا ومش هايدور على شغل بعد الظهر. ازاى ده البحر يحب الزيادة
11- لما يقرا ويسمع حديث : لو كان لابن آدم واد من ذهب لتمنى ان يكون له واديان . ولو كان له واديان لتمنى ان يكون له ثالث. وحديث:ارض بما قسم الله لك تكن اغنى الناس . وبعدين يقول لك:بلاش مثاليات وكلام انشاء . الكلام ده ما يأكلش عيش
12- لما يلاقى واحد زى حالاتى راضى وقانع يسخر منه ويقول عليه مستغنى شبعان ده اخوان ده فلول ده عميل لشيخ الازهر ده قلة مندسة ده جبان طول ما فيه ناس بالنوعية دى عمرنا ما هاناخد حقوقنا لهم حق يعملوا فينا اكثر من كده ................الخ
مش قلت لكم العجايب كثير نكتفى اليوم بهذا القدر على وعد بلقاء آخر وعجائب أخرى

[Mr MohammedHassan]

بعيد عن أي حاجة أنا هسأل حضرتك سؤالين بس وياريت تجاوبني
حضرتك متزوج وعندك أولاد؟
ساكن تمليك ولا إيجار؟؟؟
شكرا

[الاستاذ عوض على]

عجيبة واحدة أقدمها لحضرتك على شكل سؤال واحد أرجو من حضرتك الاجابة عليه بدون لف ولا دوران

لماذا يتم اعطاء حقوق لمعلمى التربية والتعليم وحرمان زملائهم معلمى الأزهر منها ؟

[حسام الدين ريه]

جاء الرد بثلاثة اسئلة وانا اجيب
1- الحمد لله متزوج وعندى ولد وبنت
2- انا بنيت لى شقة فى منزل والدى واعيش فيها منذ 10 سنوات عندما كنت اعمل مدرسا بالحصة لمدة 5 سنوات بعد التخرج وقبل التثبيت
3- لماذا لا تستقيل من الازهر وتذهب للعمل بالتربية والتعليم؟

[ابو سليمان العربى]

حسبنا الله و نعم الوكيل

[حسام الدين ريه]

المشاركة الأصلية كتبت بواسطة ابو سليمان العربى

حسبنا الله و نعم الوكيل

حسبنا الله و نعم الوكيل فى مين بالضبط؟؟

[modym2020]

أستاذى
و من لم ينطبق عليه اى شىء مما ذكرت
فلم يغش فى حياته وحصل على الليسانس أو البكالوريوس بل وحصل على الماجستير
ولم يعطل العمل يوما واحدا بل ويعطى للطلاب أكثر مما هو مطلوب منه
ولم يقصر مع تلاميذه فلا فرق عنده بين الدرس الخصوصى وبين المدرسة / المعهد
أليس من حقه أن يطالب بما كفله له القانون
هل تظن ان الأزهر لا يمتلىء بمعلمين لهم ضمائر حية وقادرون على التغلب على ما يواجهونه من صعاب

لا أنكر أنه قد يوجد البعض كما ذكرت لكن لا ينبغى أن نظلم الكل بذنب قلة وما تحدثت عنه موجود منه فى كل مكان سواء فى التربية والتعليم أو فى باقى المؤسسات
فى كل مكان وكل مؤسسة يوجد الصالح والفاسد

قال صلى الله عليه وسلم :
" لا تزال طائفة من أمتي ظاهرين على الحق لا يضرهم من خذلهم حتى يأتي أمر الله و هم كذلك "

السؤال :
هل يضايقك المعلم الذى يقول أن الغش حرام ؟
أليست تلك حقيقة ؟

[علاء طلب]

الاستاذ المحترم ال كاتب كتاب لا يسمن ولا يغني حضرتك اكيد حياتك كلها غش علشان كده حكمت علي خريجي الازهر بانهم جميعا حصلوا علي الشهادات والكليات والتربوي بالغش احكم علي نفسك انته الاول وبعدين ابقي اتكلم

[حسام الدين ريه]

طبعا الغش حرام ما فيش كلام . ولا يمكن اتضايق من اللى يقول الغش حرام . انا باتكلم على سياسة الكيل بمكيالين . واعرف ان هناك نسبة من المعلمين المحترمين الشرفاء بس لا بد ان نعترف انهم اقل من القليل. الاخ اللى بيتهمنى بالغش . اولا انا ما قلتش كل خريجى الازهر انا لم استخدم صيغة الجمع ابدا وارجع لكلامى . ثانيا الله يعلم انى من الاوائل دائما ولم اغش فى حياتى الدراسية والتعليمية كلها ولو مرة واحدة . تقدر انت تحلف انك عمرك ما غشيت . اتحداك

[خادم المسلمين1]

بجد والله انت انسان اكثر من رائع


فعلا
حاسبوا انفسكم قبل ان تحاسبوا

وكل انسان يراجع نفسه قبل الضجر والشكوى وهل ادى دوره ام لا
ومع ذلك لا غنى عن انكار المنكر
اخى الحبيب لاتتضايق من ردود بعض الاخوة

منتدى الثانوية ملىء بناس كتير مشحونة وما بيفرغوش شحنتهم الا هنا

وملىء ايضا باناس عمليين ولينين وسريعى الاستيعاب للمقصد

بجد انت انسان حكيم جدا فى كلامك

جزاك الله كل خير

[خالد مصطفى حامد]

أولا بالنسبة للسيد المحترم اللى كاتب الكلام ده
انت بتقول النصاب 25 حصة المدرس يشتغلهم ازاى ولو قدر هل عطاؤه فى 25 حصة زى ميكون نصابه 20 أو 15
ثانيا انت محسسنى ان المدرس بيدخل يقعد ومبيشتغلش بالعكس المدرس شغال ومعتقدش ان فيه حد بيشتغل فى مجال التدريس وبيقعد فى الفصل مبيطلعش عينه شغل.
ثالثا : سعاتك ناسي الدور اللى على أولياء الأمورولا دول مبيتحسبوش.
رابعا:الغش حرام حرام حرام هو انت عندك فى معهدك مفيش دور تانى ولا ايه كلهم عباقرة
خامسا الدروس دى انت متتكلمش فيها أنا ولى أمر ومودى ابنى درس أنميه وازود قدراته ولو ضعيف يتحسن ولا انت شايف الدروس دى ازاى
سادسا : لما تتكلم اتكلم بصيغة الفرد مش الجمع
وسلامى للنفسنة حبيب قلبي

[أ/ سعيد موسى]

جزاك الله خيرا اخى الفاضل
اتفق معك فى كل كلمة ذكرتها المشكلة الرئيسية الان كلمة بسيطه انا اريد
وعمرى مافكرت فى كلمة ماذا اعطى

[mohammed rehab]

- على حسب علمي من اول ما قالوا يا تعاقد والازهر بياخد التقديرات العالية في التعاقدات وما اظنش التقديرات العالية توصل بالغش اللي انت بتقول عليه ده ...
- كلمني عن زمن الضم اللي معاه دبلوم اصبح شيخ معهد ابتدائي ...
- كلامك معناه اننا نسكت وما نفتحش بقنا ابدا رغم ان مطالبنا ملاليم بيسموها المساواة بالتربية والتعليم - -نقدك كله موجه لزملائك كأن شيخ الازهر و وكلاء المناطق ملائكة تمشي على الارض رغم ان والله لو أراد أعداء الازهر هدمه ما استطاعوا ان يهدموه مثلما يفعل القائمين عليه ....
- فيه ناس كتييير جدا معاها دبلوم صنايع (بالغش برده) وشغالة في قطاع زي الكهرباء مثلا وبتاخد اضعافك فين الانصاف ؟؟؟
- كان نفسي سهامك زي ما بتتوجه للمدرسين وبتطلع أوحش مافيهم توجهها للراقدين تحت التراب لانك بنفسك قلت ان الازهر فيه(((( نسبة شرفاء )))) مابتدافعش عنهم ليه ؟؟؟؟

[أ/مصطفى محمود]

و ماذا ترى في معلم يعمل بكفاءة و يشهد له الجميع بمن فيها شيخ المعهد ؟
و الحمد لله يتقدم تعليميا و مهنيا في مجال التدريس ليحصل على الماجستير دون ان توفر له ادارة الازهر أي نوع المساعدة المعنوية بل تضغط عليه ليل نهار ؟
و ماذا ترى في ان هذا المعلم يرفض الغش ؟ و هذا يغضب الكثير من زملاؤه ؟
و ماذا ترى في أن هذا المعلم اجتاز الكادر و مستعد أن يدخل الكادر مرة أخرى دون مساعدة أحد و سيجتازه باذن الله ؟
و مستعد لعمل مقابلات شخصية من قبل متخصصين تربويين ليقيسوا قدراته المهنية و التخصصية ؟
و يعمل ليل نهار للنهوض بمعهده في ظل غياب ادارة الازهر العقيمة .؟بل و يحارب من قبل من حوله ؟
و ماذا ترى في أنه يقدم المشكلات الواقعية بالازهر و المعاهد على طبق من فضه لشيخ الازهر و الحاشية التي أسفله ، مع مقترحات و حلول ممكنة و ليست خيالية و لا يعبره أحد ولو بالشكر ؟

ماذا ترى في كل هؤلاء
لا انكر لكل قاعدة شواذ ، لكن من ذكرته لك في الاعلى هم معلمين كثر في الازهر ؟
هل تعلم لماذا ؟ لأنهم عينوا بالمسابقات الرسمية و تقدم لها من تقدم و تم أخذ الصفوة ؟
و هنا تأتي دور الفشل الناتج عن العمالة المنضمة و التي أيضا هي مسؤولية ادارة الازهر
يا أخي الفاضل نهاية القول
أنا لا أختلف معك في النقاط التي ذكرتها لكنك ذكرت حالات فردية
فالمعلم هو المعلم
و على ادارة الازهر - إن كانت واعية و فاهمة لدورها ، و أكرر إن كانت --- فعليها فقط تشجيع الكفأ و مساعدة من لديه ضعف و معاقبة من يلجأ للفساد..
هذا دور الادارة التي تغيب تماما تماما في الازهر
و ليس معنى أن شيخ الازهر أنه لا يأخذ راتبه أننا لا ننتقد ادارته فالكل قابل للنقد الا صاحب هذا المقام
و لو كان على الراتب فليأخذ حقه ، متى يطور الازهر و ينميه ، و يحافظ على العدالة و المساواة المزعومة مع التربية و التعليم التي لم نرها ؟ بل و يكن سباقا للتطوير أكثر من وزارة التربية و التعليم ؟
لأنه قائم على امر العلم الديني و الدنيوي في مصر عن طريق ادارة مؤسسة الازهر
و هذا لم يحدث و انظر لحال خريجي ثانوية الازهر ، بل انظر لحال شهادات الازهر
لتعلم كم الترهل الحادث
و هنا يجب أن نفرق بين شيئن
بين شيخ الازهر كشيخ للازهر ، و بين أن مدير لمؤسسة تعليمية ، قد يكون هو الاحق في الاولى لكنه كرر و ما زال يكرر فشل سابق عهده ، و عليه أن يولي الامر التعليمي للازهر لمن يستحق أو يفهم معنى ادارة مؤسسة تعليمية.
تحياتي//

[Mr MohammedHassan]

المشاركة الأصلية كتبت بواسطة حسام الدين ريه

جاء الرد بثلاثة اسئلة وانا اجيب
1- الحمد لله متزوج وعندى ولد وبنت
2- انا بنيت لى شقة فى منزل والدى واعيش فيها منذ 10 سنوات عندما كنت اعمل مدرسا بالحصة لمدة 5 سنوات بعد التخرج وقبل التثبيت
3- لماذا لا تستقيل من الازهر وتذهب للعمل بالتربية والتعليم؟

طيب الحمدلله ربنا يباركلك فيهم
عموما من 10 سنوات كان الوضع أحلى بكتير
يعمل ايه بقى اللي تزوج بعد الثورة وساكن بالإيجار وفي مدينة (مش في بيته الخاص بيه) وانت عارف الأسعار شكلها ايه دلوقتي عن من 10 سنين
مش موضوعنا
الحمدلله اللي بيكلمك (تعليم عام) الأول على دفعتي وقريبا ان شاء الله ماجستير في التربية والحمدلله
لكن قدرا اشتغلت في الأزهر وكنت مبسوط وفرحان لكن تتصدم بالواقع اللي احنا فيه وذل ومهانة وقلنا نتحمل لما يتصلح الحال ولما تلاقي الدنيا كلها بيتصلح حالها وانت محلك سر تعمل ايه؟؟؟؟
وعموما اختلاف الرأي لا يفسد للود قضية
وقل يارب
...........................