لكل طالب فى ثانويه عامه قاعد زعلان من الإمتحان

[MohammeD el_SadaT]

بسم الله الرحمن الرحيم

السلام عليكم ورحمه الله وبركاته

بصراحه أنا مش عارف إن كان من حقى إنى أكتب الموضوع ده ولا لاء خصوصاً إنى مش ثانويه عامه السنه دى أنا خلصت ثانويه من 2 سنه بس بصراحه حال الطلبه واللى بقرأه كل يوم فى المواضيع اللى بتتكلم عن صعوبه الإمتحان وحاله اليأس اللى تملكت من معظم طلابنا هى اللى خلتنى

أكتب الموضوع ده فإسمحو لى

"قدر الله وما شاء فعل"
لأنّ المؤمن الحقيقي إما شاكرًا أو صابرًا، والشاكر والصابر في الجنة والخير لنا دائمًا في الصبر على الشدائد
قال تعالى: {لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ} [إبراهيم: 7].
إن الله
" يمهل ولا يهمل "
كما أنه
" لا يضيع أجر من أحسن عملاً "

لو إنت عملت اللى عليك وذاكرت طول السنه وتعبت وذاكرت فعلاً ياترى ده كان عشان تجيب الدرجه النهائيه
؟!
ولا كل ده كان إبتغاءً فى مرضاه الله عز وجل
أكيد طبعاً
إبتغاءً فى مرضاه الله عز وجل
طب ما إنت بتقول أنا عملت اللى عليا وذاكرت ورضيت ضميرى قدام ربنا سبحانه وتعالى يبقى ليه بقه شاغل بالك إن الإمتحان جه صعب ولا سهل ولا من خارج المنهج حتى
أنا خلاص اللى أنا بعمل كل ده عشان أتقرب منه
شايفنى وحاسس بيا يبقى عاوز إيه تانى من الدنيا عاوز أكون فى مكانه كويسه عاوز أدخل كليه كويسه عاوز أكون مشهور

قال النبي صلى الله عليه وسلم : { لو توكلتم على الله حق توكله لرزقكم , كما يرزق الطير , تغدو خماصا , وتروح بطانا }

يعنى مسأله الرزق دى حاجه فى إيد ربنا سبحانه وتعالى منشغلش بالنا بيها ونركز فى اللى جاى ونعتمد على ربنا سبحانه وتعالى ونخلى ثقتنا بعدل العادل كبيره ونعرف إن أكيد صوت الحق هو الأعلى دائما مهما طال الإنتظار


ونبطل بقى نبكى على اللى فات ونندب على حظنا ونقول ياريت اللى جرى ما كان وأصل وفصل والحكايه والروايه اللى حصل حصل وخلاص إنتهينا

ركزو فى اللى جاى هتفضلو لحد إمته عايش فى مود الإمتحانات ده لحد ما تحطم نفسك بنفسك وتخلى اليأس يسيطر عليك وعلى ما تبدأ تفوق يكون كل شىء ضاع من إيدك
يا جماعه بجد إنتو بحالتكم اللى إنتو فيها دى صعبنين عليا جداً
مش عارف أقولكم إيه بس بجد
اللى إنتو بتعملوه ده خطاً كبييييييييييييييييييييييييييييييييييييييييير

وبعدين أكيد اللى بيحصل لنا ده بسبب اللى الذنوب اللى إحنا بنعملها
قال رسول الله
" تركت فيكم ما إن تمسكتم به لن تضلو بعدى أبداً كتاب الله وسنتى "
هل إحنا فعلاً متمسكين بده
يبقى الحل بإدينا إحنا
" لا يغير الله ما بقوم حتى يغيرو ما بأنفسهم "
و
متقلقوش من رحمه الله
بسم الله الرحمن الرحيم
" قل يا عبادى الذين أسرفو على أنفسهم لا تقنطو من رحمه الله إن الله يغفر الذنوب جميعاً إنه هو الغفور الرحيم "
صدق الله العظيم

هنتوب إمته مستنين إيه الملك صبر علينا كتير وسترنا كتير وسامحنا كتير وسابنا كتير ويسرلنا كتير وجددلنا كتير وأمهلنا كتير بس لما يأخذ إن أخذه أليم شديد

ملحوظه
أنا ليا رأى فى الطلبه المصريين مش عارف ده بينطبق على الكل ولا لاء
بس يا جماعه لو خدتو بالكم هتلاقو إن المنهج اللى إنتو بتدرسوه
منهج المدرس اللى إنت بتاخد عنده درس
الكتاب الخارجى اللى إنت شاريه
يعنى كل مدرس بيمسك كتاب الوزاره يلخصه ويعمله مذكره الله وأعل بقه هو لخص إيه ولا كتب إيه ولا عمل إيه المهم إن كتاب الوزاره ده محدش بيفتحه
مع العلم إنى متأكد إن أى حد لو قرأ كتاب الوزاره واللى نازل فيه مقرر مش ماى وراء مذكره المدرس الخصوصى ولا السلاح اللى شاريه
كان حل
ده مجرد رأى ممكن يكون صح أو خطأ
على العموم ربنا يعنكو ويصبركو ويخرجو من المحنه دى على خير