شموخ _ سندريلا _ دكتور سعيد .................... اعتذر

[اوركيديا]

شموخ _ سندريلا _ دكتور سعيد .................... اعتذر
ليه ....................
هما ماشيين او مشيوا فعلا فليه
ليه كل ما واحد بيحاول يقدم حاجه تكون النتيجه زى ما كلنا شايفين دلوقتى
واحد ورا واحد بدا يزهق يفقد الامل
انا لسه من شويه قاريه اعتذار ميس رانيه عن الاشراف
ممكن ده يكون عشان حاجه مختلفه ماشى بس برده احنا السبب الاول و الاخير
شموخ قالت ماشيه النهارده ليه
عشان الخناقات ..........حتقولى يعنى ايه
يعنى كل لما الواحد يدخل على موضوع غالبا تحصل حاجه من الاتنين:

1-يرد رد جامد او ينصح كا تب الموضوع نصيحه متعجهوش

فالنتيجه ندخل فى سلسله من الاتهامات المتبادله وفى الاخر النتيجه
مرااااااااااااااء جدل ملوش فايده و ملوش اخر
ده لو الامر موصلش للاتهامات المتبادله فى الاخلاق (ودى لوحديها مصيبه كبيره)
اما بقى الاحتمال التانى
2-التهكم و السخريه من الاعضاء التانيين و ساعات توصل الاداره وخاصه فى حكايه الشات وان الاداره تشيل الاميلات
(ودى طبعا معليهاش نقاش الشات بين الولد و البنت من الشبهات اللى المفروض نتقيها )
و الاميلات اللى بتتشال دى وظيفه اخلاقيه بتقوم بيها الاداره
(بس برده مفيش داعى لجمل زى (اتشال يا جميل) او ان المشرف لما يحذف الموضوع انه يقول السبب و مفيهاش حاجه لما اللى تعبان فى الموضوع: يعرف هو غلط فى ايه على الاقل من الناحيه التربويه و ميتكررش الغلط)

المهم ان موضوع زى كده بدات الاتهامات ووصل الامر لحذف مشاركات كامله
طاب بعد ده كله ممكن اسال ليه
ليه كل واحد مستعد يرد قبل ما يكون متاكد جدا من رده
ولو مش عارف 10 دقايق بحث ع ال Googleحتخليه يعرف المعلومه و يعرف غيره و بالدليل
يبقى بالمنطق ده مش حيبقى فيه مشاكل و نقاش كتير الا نقاش بين الادله بس
الكلام اللى فات ده كله عن شموخ و ازاى احنا خليناها تمشى

اما سندريلا او زوزو فهى صحيح ممشيتش بس
هى دى زوزو بتاعت زمان اللى كانت بتملى المنتدى كل يوم
اكيييييييد اغلبكو تابعتو (دخلت قصر البارون)
و صراحه انا مع دكتور سعيد لما ندخل فى منطقه زى دى لازم نسال و ندور كويس و منعتمدش على المعلومات السماعيه و حدها
وماخدش عليه غير انه كان المفروض _من وجهه نظرى_ يعمل موضوع تانى يشرح فيه بالادله كلام عام عن الجن من مصادر موثوقه بالاضافه لمعرفته الواضحه للامر
اعتقد ان ده كان حيوفر كتييييييير قوى من الجدل اللى حصل (و صراحه انا حاولت اعمل كده بس اتلخبطت وخفت اجيب كلمه واحده غلط ممكن ربنا يحاسبنى عليها)
عشان بصراحه كلامه غامض فى اغلب الاوقات و مبتوصلش المعلومه صح
فده خلى سندريلا تزعل و تحس بالذنب وانها غلطانه بالموضوع بس ده غلط و الا كان (احمد خالد توفيق) اثم فى كل الروايات بتاعته و ده طبعا غلط و انما _اعتقد _ان الاعتراض كان على ربط الاعضاء الحكايه بالجن و الدين

المهم حتقلولى و ايه ذنبنا احنا فى الموضوع ده
الذنب على كل واحد بدا يفتى و يقول كلام عن الجن دون علم او قرايه متعمقه عن الموضوع
فبرده ادينا طلعنا غلطانين لتانى مره

اما الدكتور سعيد فواضح انه ماشى قريب وده باين من توقيعه
على حسب كلامه برده الاوضاع المترديه للمنتدى
يعنى الضوابط بقت ضعيفه جدا و قليل جدا لما تطبق كلها على موضوع واحد
ده غير بصراحه فى بعض المواضيع اللى ممكن نسميها تافهه يعنى لا بتقدم و لا بتاخر
و يومين و بتوصل لصفحه 100

حتقولوا و احنا مالنا بدى حاقول
فيها ايه لما تختار موضوع كل يوم او اتنين و تقرى عنه نص ساعه كده
وبعد كده تلخصلنا اللى عرفته و اعتقد اقسام المنتدى كتييييييييير ففى حريه فى الاختيار
وبلاش كله على الركن العام يعنى كل مره الاقى 30 عضو فى الركن العام
وكل الاقسام الدينيه لو وصل 5 يبقى كويس
وكمان بلاش نجيب مواضيع كتير ملهاش لازمه
(copy - past)
بدون ما انتى نفسك تكون فريته و لنتيجه للموضوع يفشل و محدش يرد عليه
او 9-8 يردواعليه ب (مشكووووووووووووووووووووووور) و80%مقرهوش
المهم انا اتكلمت كتير و اللى قرا ده كله فعلا ومعداش عليه بال(scroll ) يبقى اكيد عايز يعرف انا عايزه اوصل لايه

انا عايزه بكل بساطه انى اقول
شموخ _ سندريلا _ دكتور سعيد .................... اعتذر
اعتذر بالنيابه عن اخواتى و اخوانى فى المنتدى اللى و صلوكوا للنتيجه دى
اعتذر عن عدد الاعضاء المتزايد اللى بنفقده و عن الاعضاء الجدد و الزائرين اللى مبيرجعوش تانى
اعتذر عن كل اللى خلاكو تفكروا ان المنتدى فى الاقسام التعليميه بس
و ان الطلبه للاسف فشلوا فة انهم حتى يحافظوا على الحب اللى كان بينهم مش يجذبوا ناس تانيه
اعتذر عن الاحباط يا شموخ و الاكتئاب يا سندريلا و فقدان الامل فينا يا دكتور سعيد
اعتذر..............و لولا انى فعلا حاسه ببصمتكو ماليه المنتدى و ان المنتدى ما هو الا ناس زيكو او بيحاولو يبقوا زيكو
وان الامر لو ابتدى بيكوا فحينتهى المنتدى على 100 عضو فى الاخر بعد الجهد الرهيب بتاع الاداره

انا خلصت و طبيعى مستنيه الردود
بس انا مش عايزه (مشكووووووووور- موضوع رائع )و الكلام ده
انا عايزه اعتذار
شايف نفسك غلطان او مش غلطان .....................اعتذر
اعتذر و قول انا متاسف مش حتخسر حاجه بس حتكسب كتيييييييير
انا عايز كل اللى يقروا الموضوع ده يردوا ويقولو بس اعتذر
(انا عارفه ان ممكن ناس تكون مش شايفه للموضوع ده الاهميه دى كلها بس صدقنى لو قلت اعتذر و حاولت تنفذ و لو ربع اللى قلته فوق حتكسب منتدى كامل)

و اخيرا اسيبكم فى رعايه الله