ارجوكم حد يساعدنى ..مستقبلى بيضيع

[amir alromansia]

السلام عليكم ورحمة الله وبركاته

انا طالب فى 3 ث علمى رياضة ارجوكم حد يساعدنى لانى مستوايا ضايع خالص
خصوصا فى المواد العلمية ومش عارف اعمل ايه مزاكرتى قليلة جدا ومش بطلع بحاجة كتيير منها وعندى ياس جامد جدا جدا ومفيش اى نفس للمذاكرة خالص حتى فى الدروس بعد تايه جدا والمدرسين واهلى فى البيت بقوا بينتقضونى جامد وحاسس ان عليا حمل كتيير اوى ومش عارف اعمل ايه
المشكلة حتى لو جيت امسك كتاب بكون تايه ومش عارف اعمل ايه ولا ايه وطول الوقت عمال افكر فى الامتحان
ارجوكوا حد يقول اعمل ايه انا ضايع فى الفزيا خالص
ورياضة 2 تقيلة جدا مش عارف استوعبها حتى بسهولة
معلشى حد يساعدنى الم اذاى ال فاتنى فى المواد خصوصا فى الفزيا
وحد يقولى اذاى اهم حاجة اشيل الملل ال عندى

وشكرا جزيلا

[ابانوب ايليا]

بالنسبة للملل فلازم تعرف ان ده شعور بيواجه كل طالب فلو بدأت مذاكرة وحسيت بملل اعرف انك ابتديت تمشى صح ...لو استسلمت للملل اعرف انك خسرت معركتك اللى المفروض اساسها الاصرار والعزيمة ...

اما بالنسبة لموضوع اليأس وحاسس انك ضايع بسبب اللى فات فأحنا استاذ العربى فى المدرسة قاللنا :"احنا داخلين صحيح على شهر 1 وبعض الناس اللى لسه معملوش حاجة يفتكروا ان الاوان فات وده غلط...وقاللنا ان اللى عاوز يبدأ صح من دلوقتى حيتمكن وحيجيب الدرجات النهائية كمان لو عاوز" يعنى مفيش داعى للقلق ....ابدأ من دلوقتى ومتخافش ..ولو فيه حاجات متراكمة عليك ممكن كل يوم تذاكر منها مش حقلك صفحة...ممكن كمان نص صفحة الى جانب مذاكرتك اليومية....متخافش محصلش حاجة وحلمك لسه مستمر ومستقبلك مضاعش ولابيضيع ..بالعكس ده فى طريقه للأزدهار و ان شاء الله نشوفك مهندس قد الدنيا

[NeVeR CoMe BacK]

بص استهدي بالله كده وصلي وادعي ربنا انو يهديلك بالك واقرأ ايات من القرآن وصفي ذهنك خالص وزاكر وانت بالك رايق وان شاء الله هتلم اللى فات واللى جاى كمان والله انا السنة اللى فاتت حصللي نفس حالتك دى باظبط وكان عندى يأس واحباط وكنت برجع من الدروس افضل نايمة لتانى يوم وهكذا وكنت ملانة بس والله لميت نفسي ف اخر 3 شهور بس ضغطت نفسي ضغطة جامدة وكانت حالتى النفسية زى الزفت
فانت حاول متراكمش عليك حاجات من دلوقتى ولو بدأت صح من اول 1 او من النهاردة كل حاجة هتتظبط معاك
ولو الدروس مضيعة وقتك خدلك شهر او شهر ونص ريست منهم واقعد فيهم مع نفسك ف البيت انت والكتاب ولا حد تالتكو بس الموضوع ده مش دلوقتى يعنى علا شهر 4 كده لما تخلصو المواد وتراجعوها انما دلوقتى حاول تنظم وقتك صح وابدا مزاكرة من 2 بالليل كده ووقت الفجر بيبقا الذهن صافي جدا وان شاء الله ربنا هيوفقك

[amir alromansia]

شكرا كتييير لارائكم
بس انا جربت كل حاجة اقوم اذاكر بالليل والصبح وكل حاجة
وبردوا بلاقى نفسى ارجع فى الاخر زى منا
عمرى ما مشيت فى حاجة متساوية لالاخر

[NeVeR CoMe BacK]

المشاركة الأصلية كتبت بواسطة amir alromansia

شكرا كتييير لارائكم
بس انا جربت كل حاجة اقوم اذاكر بالليل والصبح وكل حاجة
وبردوا بلاقى نفسى ارجع فى الاخر زى منا
عمرى ما مشيت فى حاجة متساوية لالاخر

والله شئ عادى جدا وانا كنت زيك والله السنة اللى فاتت فضلت افكر كل يوم اخطط ازاى عشان ازاكر كويس والله لحد يوم الامتحان كنت بعمل خطة جديدة وكل شوية احس انها فشلت بس اوعي تيأس وخلي نفسك طويل ياجماعة هى الثانوية العامة كلها قرف وملل ونفسية وحشة وعياط وتشاؤم و... كل ده بيمر علا كل شخص عاش جو الثانوية بس مش اى حد بيحس بالحاجات دى مش بيحس بيها الا الانسان اللى عاوز ينجح انما الناس التانية بتاخدها تسالي ومش بيهمهم حاجة
والله حتى لو مش مزاكر كويس بس كونك انك مصر ومصمم انك تتفوق وبتعانى وبتحاول ده لوحده كفيل ان ربنا يوفقك والله اخر السنة هتلاقي نفسك بتحل اسئلة منتاش عارف عرفت اجابتها ازاى وهتلاقي حاجات حاسب انك هتنقص ععليها ومع ذلك هتكتشف انك مقفلها
ان الله لا يضيع اجر من احسن عملا
اوعى تيأس وخليك حاول وحاول وحاول وحاول وحاول لحد يوم الامتحان افضل حاول وربنا هيوفقك وعلفكرة انت هتفضل حاسس انك تايه كده لحد شهر 4 مع المراجعات بقا والحل اللى ف الاخر والامتحانات وكده هتحس انك اتظبطت والله مفيش حاجة بتيجي من مرة واحدة اهم حاجة اعصاااااااااااااااابك تبقا فى تلااااااااااااجة وخليييييك باااااااااااااااااااااااااارد جداااااااااا ونفسك يكون طويل وزاكر علا قد ما تقدر وهو اصلا معروفة ان شهرين الشتا دول مش بتعرفو تنجزوا فيهم كويس عشان برد واكيد معدل نومكو بيزيد وكده دى حاجات طبيعية
ربنا معاكو