المعلمون بين الحد الأدنى وعلاوة الأعباء الوظيفية - بقلم:د.عبدالرحمن المنياوي

[د.عبدالرحمن المنياوي]

إخواني المعلمين ..
-----------------------

الحد الأدنى لما نزلوه على العاملين المدنيين اشترطوا ان لا يطبق على اصحاب القوانين او الكوادر الخاصة .. واحنا من هؤلاء .. يعني احنا خارج الحد الأدنى ..

والوزير بتاعنا نزل العلاوة دي كتعويض لنا عن الحد الأدنى .. وهو شايف ان كده احنا أعلى من الموظفين العاديين لسبين الاول انهم هيقبضوا 340 جنيه حد اقصى لو هم ع الثالثة انما انت 425 على الثالثة كمعلم مساعد ..

ثانيا هم حسبولهم اجمالي مرتباتهم ومكافآتهم .. لكن انت مكافأتك بره الحسبة .. اللي عمل البلبلة دي فقط هو تصريحات الوزير الرنانة بالمبالغ الخيالية اللي كان بيقول عليها ان المعلم المساعد بدون المكافاة هيوصل 1527 لكن الواقع ان المعلم المساعد دلوقت الشامل بتاعه 838 + 425 = 1263 جنيها .. يخصم منها الأعباء التأمينية وحصة الحكومة تلاقي مرتبك الصافي حوالي 1090 تقريباً ..

اللي بنعمل عليه حالياً استغلال نقطة في قانون 155 لمعاملتنا مثل العاملين المدنيين في محاولة للضغط على الوزارة لتمتع المعلمين بالحد الأدنى كباقي العاملين المدنيين إضافة لعلاوة اعباء العمل اللي هي أصلا مشروطة ومش مستحقة للجميع ..

النقطة اللي في صالحنا داخل قانون 155 اللي أشرت ليها هي :

الماده 89 من القانون 155
يمنح شاغلوا وظائف التعليم المشار إليها فى المادة ( 70 ) من هذا القانون بدل معلم
ومقداره 50% من الأجر الأساسي ، مع استحقاقهم العلاوة السنوية وكل زيادة فى الأجور
تمنح للعاملين بالجهاز الادارى للدولة.

طيب ليه انت بتقول علاوة الأعباء دي مش لكل المعلمين؟؟؟؟؟

شوف بقى .. سعادتك كمعلم مساعد تعيين حديث ممكن يقولك مالكش فيها أقول له ليه يقولك هاتلي آخر تقريرين كفاءة !!!!!!! سيادتك تفاجأ إنك لمدة 3 سنوات لقدام مالكش العلاوة دي .. ليه 3 سنوات ؟؟ لأن أول تقرير كفاءة مش بياخد درجة كفؤ .. وانت محتاج تقريرين كفؤ .. والبس علشان خارجين ..

لازم المعلمين يكونوا ايد واحدة وانا عندي اعتقاد ان الوزير عاوز يعمل حاجة لكن فيه ترزية قوانين شغالين في ديوان الوزارة كل همهم يلبسوا المعلمين في الحيط ..


د.عبدالرحمن المنياوي