فرحي في التليفزيون

[**تسابيح**]

السلام عليكم ورحمة الله وبركاته
بما اني فاضية فأنا مقضية وقتي ادام التليفزيون
انك تكون فاضي حاجة وحشة مش فاضية اوي يعني بس كثير
المهم فيه قناة اسمها مسايا كل لما اتفرج عليها اتقعد
ايه الناس دي بجد ...مين دول ونقعد بئا نحسب في الأسعار
مسايا دي قناة للأفراح بتذيع الفرح وكمان بالمرة مكان الكوافير اللي العروسة راحت عملت فيه شعرها
والحلاق اللي العريس عمل فيه القصة الجديدة إعلان بمعني أصح
والقاعة ...
بصراحة يعني الواحد لما يتأمل في الأفراح دي وخلي بالكم من التأمل دا
بيكتشف ان الأفراح دي بتبقي باهظة الثمن بالنسبة للقاعة وكمان الكوافير وكمان هتطلع ع التليفزيون
السؤال المهم هو العريس دا بيشتغل فين ؟ مش فاهمة ؟
ومش عارفة ليه بيسرفوا كل الحاجات الباهظة علي ليلة يعني مش يأخذها يعملها عمرة أحسن
والأغرب أن العروسة بتغير كل شوية فستان هي الناس دي بتغظنا ولا ايه
والأغرب بئا ان واحد وخطيبته عارضين الخطوبة في القناة
انا مش من أنصار الخطوبة اللي ع الواسع ,لان محدش عارف النصيب فين
كل واحد حر ..بس شايفة ان دلوقتي القناة تعتبر الوحيدة
بعد كدااا ...هتنتشر القنوات دي ..وكل عروسة هتطالبها بحقها في عرض فرحها في التليفززيون
المشكلة بجد أن العروسة بتبقي محجبة وزي الفل
وتلاقي هاتك يارقص بئا ...ومش بس اللي في القاعة بتفرجوا دا كل العالم بيتفرج
بس العقل حلو بس
هيرد حد يقول احنا لاقيين نتجوز
اومال اللي في التليفزيون دول جايين منين